¹ Nayan neg-aneng-aneng a den nga eked a komidoen kenyo kon meelegan olo heman se kenyo peduwan. ² Kay kon melegan ko sikeyo, den man kowani se meleluba kanak? Wedad den. ³ Iyan yan se lekatan kon nenga migsulat a ona kenyo, amon kon komidoen a kidoen, eked a pekegool te menge otaw nga yan peden se mekeluba kanak kay nengintoo a nga kon mekeluba a, meluba kaw heman. ⁴ Sidekey mona nga pegsulat ko kenyo nelibog aw negool a aw kimelag pa gani kena ko pakay nga elegen se kenyo peduwan, kon kena ibeg ko olo nga metegahan niyo nga igmahal ko onto sikeyo. ⁵ Seini, kon mehitepad te otaw kedoen nga mekesala, kena ko olo se kandin binegayan te kegool kon kena doen kegool heman nga binegay din te kelahat niyo. Nekeikagi a nga doen kegool heman kona eked a ibeng pelebihen. ⁶ Meneng botong den se pelemun nga binegay niyo kandin. ⁷ Nayan peseyloi den niyo sikandin aw desigi heman kay basin aw da'gen sikandin te kegool. ⁸ Aw megpeido-ido a heman kenyo nga pekilai niyo kandin nga igmahal niyo sikandin. ⁹ Gani sini se lekatan nga migsulat a kenyo kay ibeng ko metegahan niyo kon kesilegan kaw ba te pegtolo te kelahat inikagi ko kenyo. ¹⁰ Koy peseyloen niyo se nekesala, peseyloen ko heman sikeyo Kay kon doen mekesasa kanak peseyloen ko den sikandin te sinelowan i Cristo alang kenyo. ¹¹ Angay tadon ini inangen amon eked kidon kebatog i Satanas kay netegahan tadon kon eden se kandin menge pemeokit. ¹² Pegdateng ko doton te Troas amon megwali te mepiya belita tepad ki Cristo. Kenita ko nga pigtegilan den tapay te Timanem se kandan posong te pegpenenakan kanak. ¹³ Meneng weda a kehimotang kay wedad doton si Tito nga kedowa tadon ki Cristo. Nayan migsabi a te menge egpemenal aw dimoton te Macedonia. ¹⁴ Samat te Timanem kay gayed sikandin eg una te kenitadon perada te pegdaog. Ininang din ini tepad kay kedoen kidon den ki Cristl. Iling te penadeg iggamit kay din te pegpeila kandin bisan kenan lugari. ¹⁵ Kay iling kay te penadeg nga dogso i Cristo doton te Timanem nga meedekan te menge otaw nga nekelowa aw bisan menge nengetading. ¹⁶ Te menge otaw nga nengetading se kenami igpekalap nga kebenalan iling te nadeg te matay nga egpengibing te kemetayen; meneng se menge otaw nga nekelowa iling ini te penadeg te menge buhi nga egpengibing te pedowan, sini lebo se mekeinang kani nga inangenen? ¹⁷ Meneng egpeibing kay te Timanem, aw tepad kay sikandin neketengteng kenami, aw kenami kidoen ki Cristo matinod-anon kay te pegsangyaw te kagi te Timanem, eked kay iling te doma nga ininang dan penelapi se pegwali te kagi te Timanem.