¹ Menge kedowa egkedekelan te pedowan, eka niyo egpemenal te menge otaw mikagi te kandan pegpemenal lekat te Espirito Santo, una niyo susihi aw benal ba se kandan egtulada aw benal gaw lekat te Timanem, so medita den menge mini prupita se dimagsa te keneyonan. ² Se pemeokit nga metagahan niyo aw kidoen kandan se Espirito te Timanemyan ini: Kilelaen dan se Jesus Cristo negpekeotaw, se Timanem yan se simogo kandan. ³ Meneng se wala kilala nga si Jesus negpekeotaw, se negsugo kandin kana yan Timanem aw kana se Espirito te Anti Cristo dinineg niyo den dumateng ini aw dini den sikandin te keneyonan. ⁴ Meneng menge bata ko, Timanem den se tig-apo kitadon, aw ne batog niyo den se kana benal menge propeta: Kay se Espirito Santo kidoen den kenyo onto metolos kay te ki Satanas negagahom te menge otaw te keneyonan. ⁵ Se menge mini propeta siini keneyonan se teg-apo nini. So nayan se mene kedonan te keneyonan yan se kandan i-indan-indan, aw se menge otaw te keneyonan nenalan kandan. ⁶ Meneng sikitadon menge bata te Timanem se menge kimilala te Timanem egpenenalan te kenitadon pigtulada. Meneng se oda kilala te Timanem eked penenalan kenitadon. So nayan te inikagi siini pemeokit nini amon metegahan tadon aw sine se negtulada te kebenalan lekat te Espirito te Timanem aw kon sine se negtulada te kebolalaw lekat te Espirito Santo. ⁷ Menge keduwan egkedekelan ko te peduwan, keilangan megkedakelay te peduwan lekat te Timanem. Se dakel pedowan, bata te Timanem aw kimilala te Timanem. ⁸ Se dakel kehigugma weda kilala te Timanem, so se Timanem dakel onto se pedowan din. ⁹ Egpekita te Timanem se kandin kedakel pedowan kenitadon pineokit te kandin pegpengibing te kandin bugtong bata dini te keneyonan, amon pineokit kandin meketig-apo kidon te peduwan wedad temanem. ¹⁰ Yan ini se benal dakel se pedowan, kana tepad kinita se dakel pedowan te Timanem, aw kana tepad kay se Timanem se dakel se peduwan kenitadon, so nayan egpeibing din se kandin bata amon pineokit te peghalad kandin mepesaylo se kinitadon menge sala. ¹¹ Menge kedowa egkedekelan ko te pedowan, yan ini se kedekel te pedowan te Timanem kenitadon keilangan heman megpedakelay kidon te peduwan. ¹² Wedad pa otaw kinita te Timanem. Meneng aw megpedakay kidon te peduwan, se Timanem megpetanan dini kenitadon aw se kandin kedakel pedowann mehingpit dini kenitadon. ¹³ Netagahan tadon diya kidon te Timanem aw se Timanem diyan heman kitadon, so binegay din kenitadon se kandin Espirito. ¹⁴ Kinita day aw mig-indan-indan kay nga igpeibing te Amay se kandin bata megpeluwa te keneyonan. ¹⁵ Pengkey nikagi si Jesus bata te Timanem, se Timanem kidoen kandin, aw sikandin diya te Timanem. ¹⁶ Netagahan to den aw nemenal nga onto dakel se pedowan te Timanem kitadon. Se Timanem dakel pedowan aw se negkinebugi doen onto dakel pedowan, diya te Tmanem, aw se Timanem kidoen kandin. ¹⁷ Se gugma gihingpit dini kitadon amon eked kiden kelemitan te aldaw nga se Tiamnem meg-ukom, kay se kenitadon pegkenibuhi dini te keneyunan iling te pegkinebuhi i Cristo. ¹⁸ Wedad ketalaw kidoen te gugma. Se hingpit nga guguma nengabat te kelahat ketalaw, se otaw nelemitan so doen pigtagadab din silot. So oda din pa ketegahi se peghigugma te Timanem kandin. ¹⁹ Dakel kidoen onto pedowan te Timanem so sikandin yan se mona nehigugma kenitadon. ²⁰ Se mikagi igpedekelan din te peduwan se Timanem. Meneng eda din kedekeli te pedowan se kandin kedowa, se otaw siyan bolalawen. So se kandin keduwan mismo kinita weda din kedekeli te pedowan, menonen din naan peghigugman te Timanem nga oda din kitai? ²¹ So nayan yan ini se insugo binegay i Crsito kenitadon, se otaw nga nehigugma te Timanem keilangan heman mehigugma te kandin kedowa.