¹ Hiramu mfumu ya ku Tura peyecimvwa kuti Solomoni amuzoza paufumu m'malo mwa awisi; etuma anchito bake pakuti Hiramu enzomkonda ngsako Davite. ² Solomoni etumizya mau kwa Hiramu, kuti, ³ "Muziba kuti atata Davite eliyamange ng'anda ya Yehova Mulungu wao cifukwa cakuti enyata ngako nkhondo, ndaba munthawi ya umuyo wao Yehova enzoyika adani bao kunyansi kwa mendo yao. ⁴ Koma lomba, Yehova wanipasa mtendere mbali zonse. Kuliye adani kapena covuta ciliconse. ⁵ Teto nufuna kumanga tempele ya Yehova Mulungu wangu, monga mwelabilila Yehova kwa Davite atata, kuti. 'Mwana wako mwanalume watinikayike pa ufumu m'malo mwako, ndiye wati akamange ng'anda yangu.' ⁶ Teto lomba lamulilani kuti naitendeleko mikunguza yaku Lebanoni. Anchito bangu bazasebenzele pamozi na anchito banu, ndipo nizalipile anchito banu malipilo yemwenkhazikisha mweo. Pakuti muziba mweo kuti paliye pakati pasu oziba kuceka mathabwa angalingane na Asidoni." ⁷ Hiramu pecimvwa mau ya Solomoni, ekondwela ngako ndipo elabila kuti, "Lekani Yehova adalisike lelo, wamene pasa Davite mwana mwanalume wa nzeru kuti alamulile mtundu wa banthu ukulene teti. ⁸ "Hiramu etumizya mau kwa Solomoni, kuti, "Namvwa mau yamwanitumizyila. Ndipo nimpeni mathabwa yonse yamufuna ya mkunguza na payini. ⁹ Anchito bangu bekanyamule vimiti kufumya ku Lebanoni kuza ku nyanja, nikoyomanga mitolo-mitolo kuti ikalute bwino pa nyanja kuyofwika kumalo kwatimuniuzye kuti mkalindille. Ndipo nikuyomasulile kwamene kula, ndipo kwati mkanyamulile. Canufunako kwamweo nikupasilako cakulya ku manja langu la ufumu." ¹⁰ Teto Hiramu emupasa Solomoni mathabwa yonse yamkunguza na payini yenzofuna. Ndipo ¹¹ Solomoni emupasa Hiramu mitanga ya tirigu yokwana twente sauzande ngati cakulya ca pa banja pake ndipo sotieonjezerapo na migomo ya mafuta ya olivi yokwana twente sauzande. Solomoni enzopasa Hiramu ivi vinthu caka na caka. ¹² Yehova emupasa nzeru Solomoni, kulingani namwemulunjezera. Ndipo penze mtendere pakati pa Hiramu na Solomoni, ndipo aba banthu bepanga na pangano. ¹³ Mfumu Solomoni esonkhanisha banthu anchito mokakamizya mziko lonse la Israeli. Ndipo anchito bocitokakamizya bala benzebekwana sate sauzande madoda. ¹⁴ Ebatumizya ku Lebanoni, ndipo benzositanthana teni sauzande pa mwezi. Teto benzonkhala mwezi umozi ku Lebanoni ndipo myezi ibili kung'anda. Ndipo Adoniramu ndiye enzoyanganila anchito aba ocitokakamizya. ¹⁵ Solomoni enze na banthu sevente sauzande benzonyamula vinthu volema ndipo eiti sauzande ndiye benzophwanya myala mulupili, ¹⁶ kuyikilapo na 3,300 akapitao enzoyanganila nchito nakugwila nchito ziyakine. ¹⁷ Molamuliliwa na mfumu bekumba myala ikulu-ikulu nakuphwanyamo myala yabwino yoyambilako fandeshoni ya tempele. ¹⁸ Teto omanga ba Solomoni na omanga ba Hiramu pamozi na banthu aku Gebala beceka mathabwa nakuphwanya myala kuti bamangile tempele