¹ Ndipo masiku wakufwa Davite peyefwendelela, emulangizya kuti, ² "Nilipafupi kuluta kwakuluta munthu aliyense ofunikila kuluta kufuma pano pa ziko. Teto unkhale wolimba, mwaici, uzuwoneshe kuti niwe mwanalume. ³ Usunge malamu ya Yehova Mulungu wako pakuyenda munila yake, nakumvwila malangizo, na malamulo, navakufuna Mulungu, na cipangano cake, nakunkhala chelu pakusunga malamulo ya Mose, kuti ukambane pavocita vonse, kulikonse kwati ukalute, ⁴ kuti Yehova akakwanilishe mau becilabila kwa neo, kuti, 'Ngati mubadwo wako ukankhe bwino cinkhalidwe, nakuyenda, nakuyenda pameso yangu na mtima wao onse na moyo wao, unkankhale osasoba munthu onkhala pa mpando wa ufumu mu Israeli.' ⁵ Soti uziba welo zenicita Jowabu mwana wa Zeruwa, navecita kwa akulu ankhondo ba Israeli babili, kwa Abineri mwana wa Neri, na Amasa mwana wa Yeteri, bamene bepaya. Ebapaya pa nthawi ya mtenere monga ni nthawi ya nkhondo, ndipo epaka magazi yao ku lamba yake yamuliwunda na ku sapato zaku mendo. ⁶ Ukacite naye Jowabu mwanzeru zawaphunzira, koma osamlola kuti akalute ku manda na sisi za yimvwi m'mtendere. ⁷ Koma, bana ba Barizilai wa ku Giliyadi ukabawamile mtima, ndipo amozi ba bala bati ukokulya nao pa thebulo imozi, cifukwa bewela kwaneo penenzoutuka mkwanu Abisalomo. ⁸ Ona, osaluwa kuti uli na Simei mwana wa Gera, wa fuko la Benjamini waku Bahurimu, uyu enitemberera na temberero iyipa pa siku yenenzeneluta ku Mahanimu. Semei enzewela kuzokumana nane ku Yorodani, ndipo nelumbila kwa yeve pameso ya Yehova, kuti, 'Sinizakupaya na lupanga.' ⁹ Lomba pa ici, osamlekelela kuliye cilango. Niwe munthu wanzeru, ndipo uzibe mwatiukacitile naye. Ukamtwale kumanda na imvwi zake m'magazi. ¹⁰ Teto Davite elala mwalalile makolo bake ndipo eyikiwa m'mzinda wa Davite. ¹¹ Ndipo Davite masiku yelamulila pa ufumu wa Aisraeli yekwana vyaka fote. Elamulila ku Hebironi vyaaka seveni ndipo vyaka satefili mu Yerusalemu. ¹² Teto Solomoni enkhala pa mpando wawisi wake Davite, ndipo ulamilo wake wenkhazikika bwino ngako. ¹³ Lomba Adoniya mwana wa Hagiti ewela kwa Batisheba nyinawene wa Solomoni. Batisheba emukosha kuti, "Ko wawel m'mtendere?" Ndipo eyankha kuti, "Nde ni m'mtenedere." ¹⁴ Teto enena kuti, "Pali cinthu cunufuna kukuuzyani." Batisheba eyankha kuti, "Labila." ¹⁵ Adoniya eciti, "Muziba kuti ufumu wenze wangu, ndipo Aisraeli onse enzoyembekezera neo kunkhala mfumu. Koma vinthu vezintha, ndipo ufuma weoisiwa ku mkwasu, pakuti wenzewake kufumila kwa Yehova. ¹⁶ Neo nina cinthu cimozi cunufuna kukusengani, ndipo osanikanila pempho yangu." Batisheba eciti kwa yeve, "Labila." ¹⁷ Ndipo elabila kuti, "Napapata mulabile nayo mfumu Solomoni, pakuti angakanelini pempho yanu mweo, kuti anipase Abisagi mwanakazi waku Sunemu kuti nikwatile." ¹⁸ Batisheba emuyankha kuti, "Iyo ni nkhani ya bwino ngako, yai nilabile nayo mfumu." ¹⁹ Mwaici Batisheba enyamuka kuluta kwa Mfumu Solomoni kuoyalabila naye m'malo mwa Adoniya. Mfumu yenyamuka kulandila nyinawene Batisheba ndipo ebabelamira anyinawake. Ndipo enkhala pa mpando wa ufumu ndipo etola na mpando wuyakine kuti anyina ba mfumu ankalepo. Ndipo enkhalila caku kwanja lake la kwendi. ²⁰ Ndipo teto eciti, "Nina kanthu katotho kanufuna kusenga ndipo nuziba kuti unganikanilelini." Mfumu yeyenkha kuti, "Labilani amama, ningakukanilenilini." ²¹ Teto eciti, "Melole Abisagi waku Sunemu kuti ankhale mwanakazi wa Adoniya mkanu." ²² Mfumu Solomoni ebayankha anyina kuti, "Mwanisengelanji Abisagi waku Sunemu kuti ankhale mkazi wa Adoniya? Mulekelanji kumusngela soti na ufumu, pakuti nimkulu wangu, m'musengele na Abiata wansembe, na Jowabu mwana wa Zeruya?" ²³ Teto Mfumu Solomoni pameso ya Yehova, kuti, "Mulungu anilange, ndipo anilange ngako, ngati Adoniya sapayiwa kamba ka pempho ykae iyi. ²⁴ Lomba Yehova wamoyo, wamene waninkhazikisha pa mpando watata Davite, ndipo waniyika kunkhala ng'anda kulingana na lonjezo yake, ndithu Adoniya apayiwe lelo." ²⁵ Teto mfumu Solomoni elamulila Benaya mwana wa Jehoyada ndipo Benaya empeza Adoniya ndipo emkantha Adoniya nakufwa. ²⁶ Lomba kwa Abiata mfumu yeciti, "Nkhoya ku Anatoti, kuminda yako. Cifukwa uyenera kufwa, koma nikupayelini lomba, cifukwa wenzonyamula likasa ya Mbuye Yehova pameso pa Davite atata ndipo wevutika monga mwevutikila atata munjira zinyinji." ²⁷ Teto Solomoni emucosa Abiata pa udindo wa wansembe wa Yehova, kuti akwaniilisike mau ya Yehova, yamene yecilabila pa ng'anda ya Eli ku Silo. ²⁸ Jowabu ecimvwa, cifukwa niyeve enzemuthandiza Adoniya, ngankhale kuti aliyemthandizeko Absalomu. Teto Jowabu eutukila ku tenti ya Yehova nakuzo kata mamphondo ya pa guwa ya nsembe. ²⁹ Ndipo bemuuzya Mfumu Solomoni kuti Jowabu wautuka ndipo ali mu tenti ya Yehova ndipo ali peneme pa guwa ya nsembe. Solomoni elamulila Benaya mwana wa Jehoyada, kuti, "Nkhoya, umumupaye." ³⁰ Teto Benaya efwika ku tenti ya Yehova ndipo eciti kwa yeve, "Mfumu yanena kuti, 'Fuma panja.'" Jowabu eyankha kuti, "Yayi, neo nifwele mwamene muno." Teto Benaya ewelela kwa mfumu, nakuti, "Jowabu wanena kuti ofuna kuti efwele pa guwa ya nsembe." ³¹ Mfumu yeciti kwa yeve, "Cita monga mwawafunila mwinekazi. Umupaye ndipo umuwindile kuti unicosele neo na ng'anda ya atata magazi ba banthu bepaya Jowabu baliye cifukwa. ³² Lekani Yehova abwezele magazi yake pamutu wake yeve, cifukwa cozaziba atata Davite ekantha banthu abili enzeolungama ngako ndipo ba bwino kuposa yeve nakubapaya nalupanga, Abineri mwana wa Neri, mkulu wa ankhondo wa Israeli, ndipo na Amasa mwana wa Yeteri, mkulu wa ankhondo wa Yuda. ³³ Teto lekani magazi bao awelele pa mutu pa Jowabu ndipo na pa azizukulu bake kosasila. Koma kwa Davite nazizukulu zake, na pa panja yake, na pa ufumu wake, pankhale mtendere kufumila kwa Yehova." ³⁴ Teto Benaya mwana wa Jehoyada eluta nakuyo kantha Jowabu nakumupaya. Ndipo eyikiwa m'manda yamung'anda yake-yake mcipululu. ³⁵ Mfumu yeyikapo Benaya mwana wa Jehoyada kunkhala mkulu wa ankohondo m'malo mwayeve, ndipo etola Zadoki kunkhala wansembe m'malo mwa Abiata. ³⁶ Ndipo mfumu yetuma banthu kuyoyita Simei, ndipo nakuti kwa yeve, "Uzimangile ng'anda yako mu Yerusalemu ndipo ukankhale kwamene kula, ndipo osafumako ku.uta kumalo yayikine. ³⁷ Cifukwa pa siku yati ukafume, ndipo nakupyola cigwa ca Kidroni, uzibe kuti ndiye yati ikabe imfwa yako. Magazi bako bakankhale pa mutu pako." ³⁸ Teto Simei eciti kwa mfumu, "Izi zamwanena ni zabwino. Monga mwa mwalabilila Mfumu mbuya wangu, kapolo wanu acite teto." Teto Simei eciyonkhala mu Yerusalemu kwanthawi itali. ³⁹ Koma pothela pa vyaka vitatu, anchito bake abili Simei beutuka kuluta kwa Akisi mwana wa Maka, mfumu yaku Gati. Teto bemuuzya Simei, kuti, "Ona, ba nchito bako bali ku Gati." ⁴⁰ Simei enyamuka, nakukwela bulu yake kuluta kwa Akisi ku Gati kuyofunafuna anchito bake. Ndipo eluta nakuwela nao anchito bake kufumila ku Gati. ⁴¹ Solomoni pecimvwa kuti Simei enzefuma mu Yerusalemu kuluta ku Gati nakuwelako, ⁴² mfumu yemuyita Simei ndipo emukosha kuti, "Ko niliye kulumbilishe pameso ya Yehova nakukucenjezya kuti, 'Uzibe kuti pa siku yatiukafumepo kuluta kulikonse, ndiye siku yati ukafwe?' Ndipo weyankha kuti, 'Mwanena cinthu cabwino.' ⁴³ Lomba cawakangiwila kusunga lumbilo kwa Yehova na lamulo yenekuuzya nicinji?" ⁴⁴ Mfumu yenena soti kuti kwa Semei, "Uziba m'mtima mwako viyipa vonse vewecita pa atata Davite. Mwaici Yehova akuwezyele kuyipa kwako pa mutu wako. ⁴⁵ Koma Mfumu Solomoni ankhale odalisika ndipo mpando wa ufumu wa Davite unkhazikike pameso ya Yehova kosasila." ⁴⁶ Teto Mfumu yelamulila Benaya mwana wa Jehoyada. Ndipo eluta kuyomkantha nakufwa. Teto ufumu wenkhazikika m'manja mwa Solomoni.