¹ Mfumu Davite pefwika paunkhalamba ngako, enzokumvwalini kufunda,ngankhale amuyambatike mabulangete anyinji. ² Teto anchito bake bemuzya kuti, "Lekani tikafune moye wakuti akokusamalilani mfumu yasu. Kuti akolala pafupi m'manja mwanu kuti mfumu yasu yikokumvwa fundila." ³ Teto beyamba kufuna-funa moye wokongola mziko lonse la Israeli. Ndipo becizopeza Abisagi mwanakazi waku Sunemu nakuza naye kwa mfumu. ⁴ Uyu moye enze okongola ngako. Eyamba kusamalila nakutumikila mfumu, koma mfumu yeve yiliye nkhale naye malo yamozi. ⁵ Pa nthawi iyo Adoniya mwana mwanalume wa Hagiti, eyamba kuzitukumula ngako, ndipo enzokuti, "Nineo natininkhale mfumu." Teto ezikonzela magareta na akavalopamozi na madoda fifite batiakoutuka pasogolo pake. ⁶ Koma awisi aliyemkoshepo kuti, "Ko nicinji caucitila teti?" Ndipo Adoniya enze soti munthu wokongola ngako, ndiye enze msaza wake wa Absalomu. ⁷ Adoniya egwirizana na Joabu mwana mwanalume wa Zeruya ndipo egwirizana soti na Abiata wansembe. Peyamba kumkonkha Adoniya nakumthandiza. ⁸ Koma Zadoki wansembe, Beniya mwana mwanalume wa Jehoyada, mneneri Natani, Simei, Rei ndipo na asilikali amphamvu ba Davite baliyemkokhe Adoniya. ⁹ Koma Adoniya etwala nsembe za mbelel, ng'ombe na matole ya ng'ombe woyina ngako ku mwala wa Zohereti, wamene uli pafupi na Eni Rogeli. Yeve ethanisa anekwao onse, bana bamfumu analume, na madoda onse ba Ayuda na anchito ba mfumu. ¹⁰ Koma aliye eite mneneri Natani, Beneya, kapena asilikali amphamvu, kapena mkwao Solomoni. ¹¹ Teto mneneri Natani eciti kwa Batisheba nyina wake wa Solomoni, "Ko muliye kumvwe kuti Adoniya mwana wa Hagiti waloba ufumu, cosaziba Davite mbuya wasu? ¹² Lomba neo nufuna kuti nikuuzyeni m'mungapulumushile moyo wanu na wa mwana wanu Solomoni. ¹³ Nkhoyani kwa mfumu Davite, ndipo mkanene kuti, "Ko muliye lumbile kuti nicendi Solomoni mwana wanu akaloba pa ufumu, ndipo akuyo nkhala pa m'mpando wangu?" Lomba nicifukwa canji Adoniya ndiye waloba pa ufumu?' ¹⁴ Lomba mkalikulabila teto kwa mfumu, neo niwele kuzosimikizyila mau banu." ¹⁵ Teto Batisheba eloba mcipinda ca mfumu. Ndipo mfumu yenzeyekalamba ngako, Abisagi waku Sunemu ula ndiye enzosamalila mfumu. ¹⁶ Ndipo Batisheba egwada mwaulemu kwa mfumu. Teto mfumu yeciti, "Ufunanji?" ¹⁷ ndipo eyankha kuti, "Mbuya wangu, mwelumbila pa kapolo wanu pameso ya Yehova Mulungu wanu, kuti, 'Cacendi Solomoni mwana wako mwanalume ndiye wati akankhale mfumu malo mwangu, ndipo akuyonkhala pa mpando wangu.' ¹⁸ Lomba, onani, Adoniya ndiye wankhala mfumu, ndipo mweo mfumu mbuya wangu, muzibalini kanthu. ¹⁹ Watyala nsembe zinyinji za ng'ombe, matole oyina, mbelele, ndipo wathanisa bana onse ba mfumu, Abiata wansembe, Jowabu mkulu wa nkhondo, koma Solomoni kapolo wanu aliyemuyite. ²⁰ Koma mweo, mfumu mbuya wangu, meso ya Aisraeli onse yali pamweo, kuyembekeza kuti watiankhale pa mpando waufumu nibani m'malo mwanu, mbuya wangu. ²¹ Nbaba caticikacitike ni ici, mweo mkayotisiya kulondola kweluta makolo banu, neo na mwana wangu Solomoni bakatiyese ngati oukila." ²² Teto akalikunena teto kwa mfumu, mneneri Natani eloba mkati. ²³ Anchito euzya mfumu kuti, "Mneneri Natani wawela alipano." Pewela pafupi na mfumu egwada noponsesha cinso pansi. ²⁴ Natani ekosha kuti, "Mbuya wangu mfumu, ko mwalengeza kuti, 'Adoniya ndiye watiankhale pa ufumu m'malo mwangu, ndipo azankhale pa mpando wangu?' ²⁵ Pakuti watwala nsembe zinyinji lelo, nsembe za ng'ombe, matole yoyina, na mbelele. Wathanisa na bana ba mfumu onse, na mkulu wa nkhondo, ndipo soti na Abiata wansembe. Bakulya na kumwa pamozi, nakunena kuti, 'Amkhale na moyo utali Mfumu Adoniya!' ²⁶ Koma neo, kapolo wanu, Zadoki wansembe, Benaya mwana wa Jehoyada, na kapolo wanu Solomoni, aliyotiyiteko. ²⁷ Ko mfumu mbuya wasu mwacita ici kusatiuzyako, seo akapolo banu, kuti watiankhale pa mpando waufumu m'malo mwanu?" ²⁸ Ndipo Mfumu Davite eyankha kuti, "Muyiteni Batisheba awele soti kuno. "Ewela pameso ya mfumu nakuzo panama pasogolo. ²⁹ Mfumu yelumbila kuti, "Yehova wamoyo, waniombola ku mavuto yonse, ³⁰ nulumbila kwa weo pameso ya Yehova, Mulungu wa Aisraeli, kuti, 'Solomoni mwana wako ndiye watikakhale mfumu m'malo mwangu, ndipo akuyonkhala pa mpando wangu m'malo mwangu,' nicite ici lelo." ³¹ Batisheba egwada nakuponesha cinso cake pansi ndipo eonesha ulemu kwa mfumu nakuti, "Lekani Mfumu mbuya wangu Davite ankhale na moyo kosasila!" ³² Mfumu Davite eciti, "Muniitileko Zadoki wansembe, Natani mneneri, na Benaya mwana wa Jehoyada." Teto bewela pameso ya mfumu. ³³ Mfumu yeciti kwa beve, "Tolani akapolo ba mbuya wanu, ndipo mtole Solomoni mwana wangu ekwele pa bulu wangu ndipo mulute naye ku Gihoni. ³⁴ Kwamene kula Zadoki wansembe na Natani mneneri akamzoze kuti ankhale mfumu wa Aisraeli ndipo mkalizye na lipenga nakuti, 'Ankhale na moyo utali Mfumu Solomoni!' ³⁵ Lomba pakuza mkomkonkha m'mavuli, ndipo anzankhale pa mpando wangu; pakuti akuyonkhala mfumu m'malo mwangu. Namsankha kunkhala ulamulila Israeli na Yuda." ³⁶ Benaya mwana wa Jehoyada eyankha mfumu kuti, "Lekani zinkhale teto! Lekani Yehova, Mulungu wa mfumu mbuya wangu, asimikikizyile teto. ³⁷ Yehova mwenzele na mfumu mbuya wangu, lekani zikankhale teto nakwa Solomoni, ndipo ufumu wake ukankhale wamphamvu kuposa ufumu wa mbuya wangu mfumu Davite." ³⁸ Teto Zadoki wansembe, Natani mneneri, Benaya mwana wa Jehoyada, Akereti na Apeleti, beluta onse atamkwezeka Solomoni pa bulu wa Mfumu Davite; ndipo bemufwisha ku Gihoni. ³⁹ Zadoki wansembe etola limphondo la mafuta yozozela kufuma mu tenti nakumzoza Solomni. Teto belizya na lipenga, teto banthu onse eciti, "Munkhale namoyo utali Mfumu Solomoni!" ⁴⁰ Teto banthu onse enyamuka nakumkonkha m'muvuli olizya namitolilo nokondwela ngako, cakuti ziko legwendezeka kamba ka kubuma kwao. ⁴¹ Adoniya nabalwendo bake onse benzenao becimvwa zamene izi pebenzosilizya tyala kulya. Jowabu pecimwva kulila kwa lipenga, eciti, "Nanga congo ici m'mzinda cafuma kuni?" ⁴² Akalulabila Yonatani mwana wa Abiata wansembe ewela. Adoniya eciti, "Loba mkati, ndaba weo niwe munthu olemekezeka ngako ndipo uleta nkhani za bwino." ⁴³ Yonatani eyankha kuti kwa Adoniya, "Mfumu mbuya wasu Davite wayika Solomoni pa ufumu, ⁴⁴ ndipo mfumu yamutumizya pamozi na Zadoki wansembe, Natani mneneri, Benaya mwana wa Jehoyada, pamozi na Akereti na Apereti. Teto bamkwezeka Solomoni pa bulu wa mfumu. ⁴⁵ Zadoki wansembe na Natani mneneri ndiye amzoza kunkhala mfumu ku Gihoni, ndipo bawelako ukuosangalala, cakuti muli zungo m'mzinda. Ndiye congo camwamvwa. ⁴⁶ Ndipo soti, Solomoni wankhala kale pa mpando waufumu. ⁴⁷ Kuwonjera apo, nduna za mfumu zawelakale kuzodalisa Mfumu mbuya wasu Davite, banena kuti, 'Lekani Mulungu wanu achukise zina la Solomoni kuposa lanu, ndipo na ufumu wake kuposa ufumu wanu.' ndipo mfumu yabelama kupembeza pabedi. ⁴⁸ Mfumu nao yalabila kuti, 'Adalisike Yehova, Mulungu wa Aisraeli, wamene wapasa munthu kunkhala pa mpando wangu lelo, nakuti meso bangu aoneko ici cinthu.'" ⁴⁹ Teto onse alwendo ba Adoniya becita mantha ngako. Benyamuka ndipo aliyense eluta kanjira kake. ⁵⁰ Adoniya ecita mantha na Solomoni ndipo enyamuka, nakuyambapo,kuyo kata mamphondo yapa guwa la nsembe. ⁵¹ Teto Solomoni euzyiwa kuti, "Onani, Adoniya wacita mantha na Solomoni, ndaba waluta kuyokata mamphondo yapa guwa la nsembe, nakunena kuti, 'Lekani mfumu Solomoni alumbile kuti sazpaya kapolo wake na lupanga.'" ⁵² Solomoni eyankha kuti, "Ngati yeve mwinewake aoneshe kuti ni mutnthu wakhalidwe yabwino, paliye ngankhale sis imozi yati ikapone pansi, koma ngati ciyipa cupezeka pa yeve, akufwa." ⁵³ Teto Mfumu Solomoni etuma madoda, eciyomtola Adoniya kufuma ku guwa la nsembe. Ewela nakuzogwada pameso ya Mfumu Solomoni, ndipo Solomoni elabila kuti, "Nkhoya ku ng'anda kwako."