¹ Phimaana, assun'naka oofentiya, yaayo anaafentaaka ventji, otteeliyawaka niitthuvwaaka, weenan'na yeela kihokhala oolipa waaPwiya, assipatthani ² oofentiya. Kinanvekelela Evodia ni Sintique wiira akhalane muupuwelelo n'motja waaPwiya. ³ Weekhweeli kinaavekela tootho wanhu, mwaaminyaka okhweeli ojugo: Waakhavihere athiyanaala, kontha ayenatja anvara nteko nimi alalyaaka ehapari wamotja ni Clemente naatthu akhwaawe ankikhavihera nteko, matjinaaya ari nliivuruni yeekumi. ⁴ Ntthapeke mahuku ooteene waaPwiya, kinaahaatho wiira: Ntthapatjeke. ⁵ Ntjuweliyeke naatthu ooteene otthunawinhu. Apwiya ari wakhiviiru. ⁶ N'hirussiyeke. Wahinaaya, watjooteene tjoovekelatjinhu tjitjuweliyeke ohoolo wa Muluku, nimavekelo nuukhuwela, nimiteko tjomahala. ⁷ Ni nrettele wa Muluku, n'hoolela otjuwelatja wooteene, naahala ossuka mirimatjinhu tjooteene mwa Kristu Yesu. ⁸ Wuumaleloni assun'na, en'hala okhala yookhweeli yooteene, en'hala ottottopeliya yooteene, yossariya yooteene, yooreera yooteene, yoofentiya yooteene, yakhalaka yoopheela ohissimwiya, yakhalaka yoopheela ottittimihiya, muupuwele tjen'nho tjitthun'nho. ⁹ Tjitthu tjiitthutjaleenhu, tjaakhelaleenhu, tjiiwaleenhu ni tjoonaleenhu wami, tjen'nho npanke, ni Muluku onrettele n'hala okhala ninhu. ¹⁰ Kinaatteeliya ventji tjinene waaPwiya, kontha n'horeerihatho orattavenlawinhu wami, khalayi khalayi mwaanaakuupuwelaru khawaarivo owakathi wiira nkikhavihere. ¹¹ Akinuulumela yeela wiira kinaapheela. Maana kihofuntta okhala ootteeliya mwaha wotjitthu tjooteene. ¹² Kinaatjuwela omassikhini, ni kinaatjuwel okhala niifayita. Weenan'na tjooteene ni watjtthu tjooteene, kinaatjuwela essiiri yookhala onarupanle wala onavoliye, onarina ni ohirina wala opheelaka. ¹³ Tjitthu tjooteene wayoole nkilipihera. ¹⁴ Watjooteene n'hopanka ratta okhalela nkhayi mikuthakuthotjaka. ¹⁵ Nhu, atthu ooFilipe, ntjuwele wiira wuupatjeroni woolalyaa, wakhumalyaaka o Macedonia, khiivo ekeretja emotja yaakivahale nlipihero weetthu yoovaha niwaakhela, woovirikana ninhu. ¹⁶ Mpaka waaryaaka oTessalonica, nhu n'hokikhavihera mikuthakuthotjaka woovikana emaara emotja. ¹⁷ Kihirweelaka tjoovahiya, massi n'hokorokho wintjenrihiye mwaawelweenhu. ¹⁸ Kinawaakhelaka tjitthu tjooteene, ni kihaana tjintji. Kiri ootteeliya. Kihaakhela oPafrodito tjitthu tjiveleelihaleenhu. Tjen'nho tjiri tjitthu tjoonaa ni tjooreera, nteko woopheeliya ni wontjivela Muluku. ¹⁹ Mulukwaaka nkooweela tjitthu tjinpheeleenhu tjooteene wowiiwanana nimihakhutjinhu wowaarya waKristu Yesu. ²⁰ Vano Mulukweehu akhale owaarya womyaakha nimyaakha. Amem. ²¹ Mwaasalaamihe amwaamini ooteene mwaKristu Yesu. Assun'na ari nimi anawoossenlihani. ²² Amwaamini ooteene anawoossenlihani, wootepessa yaale ankhala watthokoni wa Cesar. ²³ Mahala aPwiya Yesu Kristu akhale nin'nepeenhu.