¹ Woomalihera, assun'naka, ntteeliyeke mirima waaPwiya. Wamiivano nanlelo kinawantikhelani tjitthun'nha woohootjyaa. Tjen'nha tjitthun'nha tjinaahala woossunkani. ² Ratta niilapwa, ratta nimahooleli on'makeretja, ratta naatthu ohinamantjira. ³ Maana hiivano naatthu owuula, tjitjon'mo, ninkokhorela N'nepa wa Muluku ninaatteeliya mwaKristu Yesu, ni khaninkhuluvela erutthu. ⁴ Hta tjitjon'mo, miivano kaanaahala okhuvela erutthu. Wakhalaka wiira haavo nkhuluvela erutthu, mi kaanaahala okhalana ventji. ⁵ Kuulihiye nihuku nonanaane, kintthu owiisrael, onikhoto na Benjamim, n'heperi aaheperi, en'himya ehissima yokettelo, nfaritji n'motja. ⁶ Wokhweeli, kihoomolaniha ekeretja. Tjoohimiya nlamulo nossariya, kaari ntthu oomamatjiya. ⁷ Massi tjitthu tjoonaka wiira tjinaakiphwanhiha etjaaira, kaahokupali ohiya mwaha waKristu. ⁸ Weekhweeli, nen'navaa tjooteene kihokhala oopwetessa mwaha wootjuwela omuunuwiha Kristu Yesu, Pwiiyaaka. Mwaha woyena tjooteene kihohiya akoonale okhala etthu, wowiira kikhale niKristu. ⁹ Ni ophwanhiya ni Yena, wowiira kipanke nlamulo wossariyatjaka. Ohiya tjon'mo, mi kihaana essariya mwaha wowaamini wa Kristu, essariya en'mwa wa Muluku mwaha wowaamini. ¹⁰ Phimaana, kinpheela otjuwela, otjuwela ekuru tjomunwenlwaawe ni makhalelo omahuvihwaawe. Mi kinpheela opittikussiya toko okhwawawe. ¹¹ Wiira weenan'na yeeyo, ophwanha wunwenla mwaatthu ookhwa. ¹² Khunakhala wiira timi kaakhelale tjitthun'nha wala kintthu oomalelatja. Maasi nanlelo kinaarwaa wiira kiphwanhe, maana wayeeyo kiphwanhiye mwaha waKristu Yesu. ¹³ Assun'na, akinuupuwela woveekhaaka wiira kihophwanha, massi etthu emotja kin'nopanka: Kinaaliyala ehanle ottuli ni kinawiilipiha wayeele eri ohoolo. ¹⁴ Kinrweela yeele enpheelaaka, wiira kittheme yooyo niihaniya mwene owiirimu mwaKristu Yesu. ¹⁵ Hii ooteene, niri naatthu oottokottha, nuupuweleke enan'na yeela. Ni, muupuwelaka woovirikana niitthu ekhwaawe, Muluku tjitjon'mo nawoothoonherani yeeyo. ¹⁶ Watjooteene nikhaleke oolipa weetthu ephwanhaleehu. ¹⁷ Assun'na, nkhaleke ookitakiha. Mwaaweheke atthu yaale anttharihenla tjinoothoonhihereehuni. ¹⁸ Maana ahaavo entji yoohimeeryalyaakani ni n'navaa kinaakulela nimeethori, ari awanani onssalapa waKristu. ¹⁹ Wuumaleloniwaya okwanhuwatja. Kontha mulukwaayatja napwiipwi, ni waarya orinaaya ehaayatjaya, woonanyaaka wiira ayenatja anuupuwela tjitthu tjovatuniyani. ²⁰ Massi elapweehu eri wiirimu, on'mwariiheehu moopoliihu, Pwiya Yesu Kristu. ²¹ Yena naahala otatussa erutthutjihu tjowiiyeviha worutthu tjoolikana niirutthweenhu yowaarya, mwaha wokurweenhu en'wehaweha tjitthu tjooteene.