¹ Israel aahohala oSitim, ni alopwana yaahantjera oraruwa naasaarawe Moabe. ² Maana amoabe yaahaalattula atthu wookutthoni waanlukwaaya. Ni atthu yaaholya ni yaahooroma ohoolo wanlukwaaya. ³ Atthu owiisrael yaahothukumana wonthamala Baal-Peor, ni orussiya waaPwiya waahopharela wiisrael. ⁴ Apwiya yaahomwiirela Moises: Owiive ahooleli ooteene ni waathomyee ohoolowaka wiira kaathoonhere nthuko woothana, orussiyawaka okhume wiisrael. ⁵ Vano, Moises aahaahimeerya anamuuluma milattu owiisrael: Khula ntthu wanhu naahala owiiva atthu onikhotonaya n'hala onkokhorela Baal-Peor. ⁶ Vano, n'sraelita n'motja aahaawaana amutjyaawe athiyana amotja. Yiiranyaale ohoolo wa Moises ni waatthu ooteene owiisrael, weeraaya yunlaka ohoolo woheema wonthukumano. ⁷ Fineias, mwaana Eleazar, mwaana Arao, nankuttho, wiiwalyaawe eyo, aaheemela eriyari waatthu ninivaka. ⁸ Yena aahontthara nlopwana mwiisrael npaka oheemani, ni aahonvikana nlopwana ninthiyana. Vano, assinttuuttu aPwiya yaakurussalyaaya waatthu owiisrael, yaahomaala. ⁹ Yaakhwale mwaha waassinttuuttu yaari atthu ekonto siriini natjesse. ¹⁰ Apwiya yaahomwiirela Moises: ¹¹ Fineias, mwaana Eleazar, mwaana Arao, nankuttho, aahohulussa orussiyawaka wiisrael, kontha yena waanantjivela tjaavaraaka. Tjitjon'mo, akaakussale atthu owiisrael orussiyawaka. ¹² Phimaana, waahimeerye: Apwiya aniira: Mi kinonvaha Fineias waataanawaka wonrettele. ¹³ On'hala okhala waataana wonankuttho woohimala, wayena nimakhotwaawe, kontha aanokitjiveliha, Nlukwaawe. Yena ahaakhuneela atthu owiisrael. ¹⁴ Ntjina nanlopwana aakhwale wiisrael ninthiyana aari Zinri, mwaana Salu, n'hooleli an'napaapaawe. ¹⁵ Ntjina nanthiyana aakhwale iihaniya Cozbi, mwaana Zur, n'hooleli onloko naamutjaawe. ¹⁶ Apwiya yaahomuulumanatho Moises: ¹⁷ Waawanane amidiatita. Kontha ayenatja anookhalihatjani phanka awanani, niwiithepyawaya. ¹⁸ Ayenatja ahoweettiherani mootakhala, mwaha wa Peor ni mwaha wamwanrokoraa Cozbi, mwaana an'hooleli ooMidia, yaakhwale nihuku nomwattuuttu, mwaha wa Poer.