¹ Balaao woonalyaawe wiira waahaatjivela aPwiya onreeriha Israel, yena khapankale, phanka emaara tjikhwaawe, onanhanka. Ohiyavaa, aarwaale nphantte owoothakoni. ² Aahovussa meethwaawe ni aahoona wiira Israel aaholukamiya, khula ntthu ninihimonawe, ni n'nepa wa Nluku waahon'weela. ³ Yena aahaakhela yowooniheriya ni aahiira: Balaao, mwaana Beor, naapheela wuuluma, nlopwanooyo meethwaawe ari ootthukuwa. ⁴ Yena nawuuluma ni nawiiwa moolumo aNluku. Yena nawoona nthoonhero aTjoowerya tjooteene, yooyo nonkokhorelaawe nimeetho ootthukuwa. ⁵ Aheemeenhu phooreeratja, Jaco, nipuro ninkhalaa, Israel. ⁶ Phanka emuro tjinkawanyaaya, phanka ekerekhere muro, phanka miri tjowaaliya naapwiya, phanka cedro nphantte womaatji. ⁷ Maatji anaamwaryaa nmamyaapuniwaya, ni epyootjaya tjinaamitjeriya ratta. Mwenyaaya naahala ovuwa tjinene onvikana Agague, omwenyaawe onaahala ottittimihiya. ⁸ Nluku non'waana wiigipitu mwaha wokuru yomope. Naahala okwanhulatja elapo tjin'wana niyena. Naahala opwessakatja makhuveenhu, n'nohala waavikana nimattheeryaaya. ⁹ Yena nkhala phanka havara, nkwanhulatja? Ooteene an'hla oreeriha areerihiye; ooteene an'hala otakhaliha atakhalihiye. ¹⁰ Vano, orussiya wa Balaque waahopharela waBalaao ni yena aahaattaniha matataawe noorussiya. Balaque aahomwiirela Balaao: Kihooweela wiira waatakhalihe awananyaaka, massi nkaweha, onaareerihaka emaara tthaaru. ¹¹ Vano, okihiye ni orwee nipuronaa. Iirale naahala wookhuneela ninttittimiho, massi aPwiya ahowaateeliha okhalana etthu. ¹² Vano, Balaao aahomwaakhula Balaque: Kihaahimeerya arumeyi yaarumalyaa: ¹³ Balaque hata nakivahale enupaawe tjootjara ewooru, akaahala orwaa woohikhala moolumo aPwyiya nokipanka yooreera wala yootakhala. Kin'hala ohimya yeele aPwiya ekirumalyaaya ohimya. Akaahimeeryale tjitjon'mo? ¹⁴ Kinaahala ohokoleela waatthwaaka, massi nkihiye kaahimeerye atthwaala tjin'halaaya waapanka atthu oohoolo. ¹⁵ Balaao aahantjera olalyaa: Balaao, mwaana Beor nawuuluma, nlopwanooyo meethwaawe ari ootthukuwa. ¹⁶ Olaleiya wantthu niiwa moolumo aNluku, rina otjuwelatja wowiirimu, rina tjooweha atjoowerya tjooteene, yooyo nonkokhorelaawe nimeetho ootthukuwa. ¹⁷ Kinaamoona, massi yena khaavovaa. Kinan'weha, massi yena khaavo vakhiviru. Etthontto enaahala owa waJaco, niicetro enaahala owela wiisrael. Yena naahala waakwanhulatja ahooleli aMoabe. ¹⁸ Vano, Edom naahala okhala n'hooleli owiisrael, ni Seir n'hala okhala n'wanani owiisrael, yooyo Israel n;haalaawe onkelela niikuru. ¹⁹ Wa Jaco naahala owa mwene okuru, ni naahala wakwanhula ankoohala epoomeele. ²⁰ Vano, Balaao aahon'weha Ameleque ni aahantjera olalyaa. Ameleque horwaa elapo tjintji, massi n'malela okwanhulatjiya. ²¹ Vano, Balaao aahoweha nphantte waaqueneneu ni aahantjera olalyaa. Iiraka: Nipuro ninkhaleenhu phinoolipa, niinupatjinhu tjiri n'mamwala. ²² N'nava, nqueneneu naahala okwanhuwatja Assur ootthukelatjani. ²³ Vano, Balaao aahantjera omalihera olalyaawawe. Yena aahiira: Vaava! Tupani n'hala okhala nkumi Nluku apankaka eyo? ²⁴ Ekalawa tjuulupale tjinaahala owa oQuitim; ayenatja anaahala on'wananatja Assur ni anaahala onkussatjaEber, massi ayenatja, anaahala waakwanhulatja. ²⁵ Vano, Balaao aahovuwa ni aahorwaa. Aahaakulela owanuwawe, ni Balaque aahorwaa.