¹ Vano, atthu owiisrael, yaahorwaa moothakoni Zim, mweeri woopatjera. Ayenatja yaahokhala oCades. Miria okhwelalyaawe. ² Atthwaale khayaarina maatji, phimaana, yaahotakaneela wa Moises ni Arao. ³ Atthwaale yaahomwiirela Moises: Waanaaphwanela ninakhwale toko assun'nihu tjikhwalyaaya ohoolo waaPwiya. ⁴ Waawaanenleni atthu aaPwiya moothakonimu wiira akhwe, hi niinamatjihu? ⁵ Ni onikumihenreni weegipitu oniwiihaka nipuro nowoopiha? Khatjivo epyoo, etthema, ni khaavo maatji oopheela ovurya. ⁶ Vano, Moises ni Arao yaahokhumatja ohoolo waatthu. Ayenatja yaahorwaatja omakhumenloni woheema wonthukumano ni yaahokokhoratja. Vaavale, waarya waaPwiya waahaaweelatja. ⁷ Apwiya yaahomuulumana Moises: ⁸ Okusse nttonttwaa ni waathukumanihe atthu, we ni mwaamun'na Arao. Wuulumele nluku ohoolo womeethwaaya ni wiire akhume maatji. N'naahala okumihatja maatji ni n'naahala waavahatja atthu ooteene niinamatjaya wiira avurye. ⁹ Moises aahokussa nttonttwaawe ohoolo waaPwiya, phanka Apwiya tjaahimyalyaaya. ¹⁰ Vano, Moises ni Arao yaahaathukumaniha atthu ohoolo womwala. Moises aahowiirelatja: Nviriyanatje, attiyamaaru. Nookumihatjerekeni mwaloola maatji? ¹¹ Vano, Moises aahovussa ntatanawe ni aahaatta mwala emaara piili ninkopwaawe, ni yaahokhuma maatji mentji. Atthu ooteene niinamatjaya yaahovuryatja. ¹² Vano, yaahomwiirela Moiss ni Arao: Kontha khankikhuluvelale ni khankuunuwihale phanka ttakattiifu ohoolo waatthu owiisrael, akin'hala waakussa atthwaala elapo yaavahalyaaka. ¹³ Nipuron'na niihaniye maatji ooMeriba kontha atthu owiisrael yaahiithoonhera waPwiya, ni yena aahaathoonhera okumyaawe. ¹⁴ Moises aahaaruma anamitthaka aCades wamwene aEdom: Mwaamun'nawe Israel phaahimyale: ¹⁵ Onaatjuwela ikuthakutho tjinkhalaneehu. Onatjuwela wiira atthweehu okhalayi yaahokhuruwela weegipitu ni yaahokhala owakathi mwintji. Atthu aweegipitu yaahonivara ratta naattweehu okhalayi. ¹⁶ Waakhuwelaleehu aPwiya, ayena yaahiiwa ntjuunehu ni yaahoruma nlaikha ni naahonikumiha weegipitu. N'nawoona, niri oCades, epooma yomwiinano niilapweenhu. ¹⁷ Kinawoolepelani wiira n'nihiye nikele epoomeenhu. Hi nivirale n'mattani, wala khanin'hala ovurya maatji on'himeniwinhu. Nin'hala ovira ottayi niiparapaara. Khanin'hala ohapuwela moono nlopwana wala moono nthiyana, npaka wan'haleehu ovira n'mwiinanoniwinhu. ¹⁸ Massi mwene Edom aahomwaakhula: Khan'nohala ovira vaa. Mwapanaka, kinaahala owaattakan'na. Vano, atthu owiisrael yaahiira: ¹⁹ Ninaahala orwaa niiparapaara. Hi niinamatjihu navuryaka maatjiinhu, ninaahala olivela. N'nihiye nivire mwentta vathi, woohivaratho etthu ekhwaawe. ²⁰ Massi mwene Edom aahaakhula: Khun'hala ovira. Weenan'na yeeyo, mwene Edom aahowa wiisrael nintata noolipa, naanakhotto entji. ²¹ Mwene Edom aahokhotta on'hiya Israel aviraka n'mwiinanoniwawe. Mwaha woyeeyo, Israel aahohuluwa elapo ya Edom. ²² Tjitjon'mo, yaakhuma oGades. Attu owiisrael yaahophiya omwaako Hor. ²³ Apwiya yaahomwiirela Moises ni Arao omwaako Hor, nimwiinano wa Edom iiraka: ²⁴ Arao naahala othukumana naatthwaawe, kontha yena naahala orwaa epooma yaavahalyaaka atthu owiisrae. Kontha khan'niiwelela nuulumonaka nmaatjini Meriba. ²⁵ Onkusse Arao ni Elezar, mwaamwana, ni nawookussa omwaako Hor. ²⁶ Nrule ekuwo tjeenankuttho tja Arao ni onwarihe Eleazar, mwaamwana. Arao naahala okhwa ni naahala othukumana naatthwaawe. ²⁷ Moises aavara phanka aPwiya tjaahimyalyaaya. Ayenatja yaahowelatja mwaako Hor ohoolo waatthu ooteene. ²⁸ Moises aahonrula ekuwo tjeenenkuttho ni aahonwariha Eleazar, mwaamwanawe. Arao aahokhwa woomaleloni mwaako. Vano, Moises ni Eleazar yaahokhuruwatja. ²⁹ Atthu ooteene woonalyaaya wiira Arao hokhwa, elapo yooteene yaahomunlela mahuku talaathiini.