¹ Vano Apwiya yaahomwiirela Moises: ² Waahimeerye atthu owiisrael: Mwaphiya elapo en'haleenhu okhala, yeeyo Apwiya en'halaaya woovahani. ³ Mwatthonkomanihe yoovaha en'hala waatjivela. Okuttho woopahiya wiira evirihiye yoothanliya, ovaha wowiivahenra, wala yoovaha tjossukuhuulutjinhu, ni n'nohala okhala niinamatjinhu. ⁴ Mwawaanaka okutho woopahiya, n'nohala waavaha Apwiya yoovaha yooreerela yonphantte wonakhuumi yonluwa yophepa yootakaniheriya makhura. ⁵ N'nohala ovahatho okuttho woopahiya, nphantte vakaani wonipha toko yoovahiya yonipha wakhula enama. ⁶ Mwavahaka enama emotja, n'naahala otthonkomaniha yoovaha yooreerela womiphantte miili tjonakhuumi yophepa yootakaniheriya makhura. ⁷ Wayoovaha yonipha, n'naahala ovahatho, yowaatjivela Apwiya. ⁸ Mwatthonkomanihaka enama toko okuttho woopheela oviriha yoothanla, wala toko yoovaha yooreerela waaPwiya. ⁹ N'nohala ovaha enama, yoovaha yooreerela yomiphantte miraru tjonkhuumi yonluwa yophepa yootakaniheriya makhura. ¹⁰ N'naahala ovaha nipha, toko okuttho woopahiya wowaatjivela aPwiya. ¹¹ Npanke tjitjon'mo wakhula enama, epuri yoolopwana wala yoothiyana. ¹² Okuttho wooteene on'haleenhu otthonkomaniha ni nvahaka npanke toko yowantikhiya. ¹³ Ooteene ayariye wiisrael ahaana apankaka tjitthun'nha, awaanaka ntthu pintthu okuttho woopahiya, wowaatjivela aPwiya. ¹⁴ Wakhalaka wiira nan'mwa rininhu, wala yoole n'hala okhuma nikhoto nikwaawe, yena haana awaanaka okuttho woopahiya, wowaatjivela aPwiya. Yena haana opanka toko tjinpankeenhu. ¹⁵ En'hala okhala ekettelo emotja naale an'mwa arineenhu,ekettelo en'hala 0khala mahuku mentji. Toko tjiryeenhu, n'haana okhala tjitjon'mo ninroromelo orineenhu. Yena haana wuupuwela toko tjinuupuweleenhu ohoolo waaPwiya. ¹⁶ N'haana ovarela nteko ekettelo emotja ninlamulo nimotja naanan'mwa ooteene arininhu. ¹⁷ Apwiya yaahomuulumanatho Moises, yiiraka: ¹⁸ Waahimeerye atthu owiisrael: Mwakelaka elapo en'halaaka woorweehani, ¹⁹ mwalyaaka n'hokorokho wonlaponin'mo, n'nohala okiwiihera yoovahiya. ²⁰ Tjowantjera ohephiya tjoolimatjinhu n'haana ovaha nkatthe tjitjon'mo toko tjinpankiyaaya yoovahiya yoEira. ²¹ N'nohala okivaha tjowantjera ohephiya nmakhotoniwinhu, ²² Emaara tjikhwaawe n'nokhala mwana oohipheela okssa, mweehiiweleleke moolumo ooteene anon'himeeryessaaka Moises, ²³ okhuma nihuku nantjeralyaaka woohimeeryani npaka ohoolo, eriyari womakhotweenhu. ²⁴ Vano atthu ooteene anaahala ovaha enama toko okuttho, wowaatjivela aPwiya, mwaha wotampi tjoohitjuwela atthu. Wamtja niiyo enaahala otthonkomanihiya yoovahiya yonipha, toko tjaahimyalyaaka, toko yoovahiya yotanpi. ²⁵ Nankuttho naahal waakhunela atthu ooteene owiisael.Ayenatja anaahala olevenlatjiya kontha etanpi yaari yoovonha. Anaahala okiwiihatjera, okuttho woovonhawaya, okuttho woopahiya toko yoovahiya yotanpi. ²⁶ Vano nssovo wooteene waatthu owiisrael anaahala olevenliya, nanan'mwa aritji yaayoru, kontha atthu ooteene ahokossa woohilakela, ²⁷ Ntthu akossaka woohilakela, vano yena naahala ovaha epuri emotja yoothiyana yomwaakha n'motja yeeyareelo toko yoovahiya yotanpi. ²⁸ Nankuttho naahala onkhuneela waPwiya ntthu kossale woohilakela. Ntthuuyo naahala olevenliya akhuneelyaka. ²⁹ Nkhalane nlamulo nimotja wayoole npanka khula eethu woohilakela, nlamulo nimotja wayoole yariye naatthu owiisrael ni anan'mwa ari yaayoru. ³⁰ Massi ntthu n'hala opanka etthu woopatjapatja, akhale ooyariya wiisrael, akhale nan'mwa, akirussihaka. Oyo ntthuuyo naahala woomoliya eriyari waatthu. ³¹ Kontha hothanha nuulumonaka ni khiiwelelale moolumwaaka, oyo ntthuuyo haana ofutthiya. Etanpyaawe en'hala okhala niyena. ³² Atthu owiisrael weeraaya anari moothakoni, ayenatja yaahonphwanha nlopwana alokotthela miri nihuku nosaapatu. ³³ Yaale yaanphwanhale yaahon'waanatja wa Moises, Arao, naatthu ooteene. ³⁴ Ayenatja yaahonvaratja kontha yaari ehinahimyatjiya yaavaralyaawe. ³⁵ Vano Apwiya yaahomwiirela Moises: Weekhweeli nlopwanooyo haana okhwa. Atthu ooteene ahaana an'homakatjaka nphantte woota wonipuro nonthukumano. ³⁶ Vano atthu ooteene yaahonkumihera ni yaahon'homakatja npaka okhwa toko Apwiya tjaamwiirelalyaaya Moises. ³⁷ Apwiya yaahomwiirelatho Moises: ³⁸ Waahimeerya anamanloko owiisrael wiira apankatje ephatta tjoopheela othomyaa ekuwotjawe, ni mon'mo onaahala otthukenliya nkhoyi woopipila. Ayenatja an'hala opankatja tjitjon'mo makhoto ooteene. ³⁹ Mwan'wehaka yena, on'hala okhala muupuwelelo omoolumwaaka, woohipheela otthara tjomirimatjinhu womeethenhu ankussakeenhu woohipheela oraruwa. ⁴⁰ Npanke yeeyo wowiira muupuwelele ni mwiiwelele moolumwaaka ooteene, ni n'naahala okha oottakattifihiya, nkhalaka nphanttyaaka, Nlukweenhu. ⁴¹ MikiPwiya, Nlukweenhu, yooyo ookumihaleni elapo yoweegipitu, wiira akhale Nlukweenhu. MikiPwiya, Nlukweenhu.