¹ Ohiyu yoole, atthu ooteene yaahunla tjinene. ² Atthu ooteene owiisrael yaahonssakihatja Moises ni Arao. Atthu ooteene yaahiira: Waanaaphwanela ninakhwale elapo yowiigipitu wala moothakonimu! ³ Apwiya aniwaanale elapweela wiira nikhwe nikatana?Assaarihu naasaaneehu an'hala okhala tjitjon'mo. Khawaareerela ohokoleela weegipitu? ⁴ Yaahiirelana yaayoru: Ninthanle n'hooleli nkhwaawe ni ahokoleele weegipitu. ⁵ Vano, Moises ni Arao yaahooromatja ohoolo waatthu owiisrael. ⁶ Josue, mwaana Naum, ni Calebe, mwaana Jefone, yaari atthu yaarumiye okooweha elapweele, yaahaahulatja ekuwotjaya. ⁷ Ni yaahowiirela atthu ooteene owiisrael. Elapo yaaviraleehu niwehawehaka phiyooreera. ⁸ Apwiya yatjiveliyaka nihi anaahala onikussa ni anaahala onivahenra, elapo yomihakhu. ⁹ Massi n'hiihele nrima woohiloka waaPwiya ni n'hoovatje atthu ovathi. Ninaahala waalya woohipitja phanka eyoolya. Nkhaviherwaaya onaahala okumhiya, kontha aPwiya ari nihi. N'hiwoovatje. ¹⁰ Massi atthu ooteene yaahowoopopihatja waahomakatja npaka okhwa. Vano waarya waaPwiya waahokhuruwela N'heemani wonthukumano waatthu owiisrael. ¹¹ Apwiya yaahomwiirela Moises: Atthwaala am'hala okitanhifu npaka eyaakhani? An'hala okaanhihera npaka eyaakhani, wohissima womithoonhero tjaathoonheralyaaka? ¹² Kinaahala waakelela naassinttunttu, kin'hala waakhaliha amutjyaa elapo emotja en'hala okhala yuulupale ni yoolipessa ovikana yawayeeyo. ¹³ Moises aahowiirela aPwiya: Mwapankaka eyo, atthu owiigipitu anaahala wiiwa, kontha atthwaayo n'haakumiha n'matataniwaya, wooweryawinhu. ¹⁴ Anaahala waattonkela atthu ooteene onlaponi. Wala atthu aniiwa wiira nhu, Pwiya nriwakhiviru naayena, kontha nhu n'nowooniya ekhove niikhove. Nihutteninhu nikhale naayenatja ni nrwee ohoolowayatja wanipottoni wonihutte nihuku nooteene ni wonipotto nooteene ohiyu wooteene. ¹⁵ Vano, mwawiivaka atthwaala toko ntthu n'motja, elapo tjinwale mitekotjinhu tjinaala ottokutta tjiiraka: ¹⁶ Kontha Apwiya ahaakusse atthwaaya elapo yaakhuluvelihalyaaya, ayena ahiiva moothakoni. ¹⁷ Vano, kinawoolepelani, niikurutjinhu tjuulupale. Kontha n'hohimya: ¹⁸ Apwiya phoopiyja noorussiya ni okiriri tjintji. Ayena anaalevenla tjoottheka. Ayena anaakwetja tjoottheka yawaanaka ehukhumu tjotanpi tjaatthu okhalayi womakhotwaaya, npaka nikhoto noneeraru ni noneetjesse. ¹⁹ Mwaalevenle, kinawoolepelani, tjoottheka tjaatthwaala mwaha wokiriritjinhu, tjitjon'mo toko tjinaalevenlakeenhu, okhuma owakathi waaryaaya weegipitu npaka n'nava. ²⁰ Apwiya yaahiira: Kinawaalevenlaka, kivirihaka, tjitjon'mo, elepelalyaa. ²¹ Massi, toko tjinkhalaaka, tjitjon'mo toko elapo yooteene en'halaaya otjara oweryawaka. ²² Atthu ooteene yoonale oweryawaka nimithoonhero tjokuru tjipankalyaaka weegipitu ni woothakoni, ayenatja ahokittehatteha weemaara khuumi ni khayiiwale ntjuunaka. ²³ Kinaahimya weekhweeli khan'hala woona elapo yaakhuluvelihalyaaka atthwaaya okhalayi. Khaavo n'motjaaya kihanhurihale. ²⁴ On'hiya nrumeyaaka Calebe, kontha yena aarina n'nepa nkhwaawe. Yena naakittharaka; Kinaahala onkussa elapo yaarwaalyaawe owehaweha. Atthwaawe okhalayi anaahala omoona. ²⁵ N'hokolyaatje meelo ni nrwaatje moothakoni nttala wopahari yoosseerya. ²⁶ Apwiya yaahomwiirela Moises niArao: ²⁷ Kin'hala waavilela tjani tjani atthwaala? Kinawiiwaka okittokutta waatthu owiisrael. ²⁸ Mwaahimeeryatje: Phanka tjinkhalaaka, Apwiya aneera, toko tjin'himyakeenhu nmaaruniwaka, kinaahala woopankani tjitjon'mo. ²⁹ N'naahala okhwatja moothakoni moomu, ooteene yaakittokutta, ooteene yaalikeliye, oyaakha ssiriini woorwaa ntjulu. ³⁰ Weekhweeli khan'nophiya elapo yookhuluvelihalyaakani yaahaleenhu oteka enupatjinhu, on'hiya Calebe, mwaana Jefone ni Josue, mwaana Naum. ³¹ Yaayo assaaneenhwaayo, phan'halaaka waakussa elapweeyo. Ayenatja anaahala ottehattehatja elapo enkhottatjakaaya! ³² Massi nheenhuvaatja, mun'hala okhwelatja moothakoni moomu. ³³ Assaaneenhu an'hala okhala moothakoni woyaakha arupayini. Ayenatja ahaana avilelaka mwaha watjoovaratjinhu npaka okhwawinhu. ³⁴ Tjitjon'mo toko tjaarwaalyaaya owehaweha elapo mahuku arupayini, ahaana avilelaka tjootthekatjinhu woyaakha arupayini, mwaakha n'motja wakhula nihuku ni nhu n'haana otjuwela okhala n'wananiinhu essiyani. ³⁵ Mi Pwiya kinaattonkaka. Weekhweeli kinawaapanka eyo atthu ooteene tjootakhala tjinkivarelaaya. Ayena anaahala okhwatja. ³⁶ Vano, atthu Moises yaawiirelalyaawe wiira awehe elapo yaahokhwa ohoolo waPwiya. ³⁷ Yaala phaatthu yaahokolyaale ni awaanaka moolumo oohikhala nlaponi. Ni yeeyo atthu ooteene phiyaattokuttiha wa Moises. ³⁸ Waatthu yaale yaarwaale oweha elapo, Josue, mwaana Num ni Calebe, mwaana Jefone yaahokhalatja akumi. ³⁹ Moises waahimeeryalyaawe moolumwaala atthu owiisrael, yaahotjukulatja ventji. ⁴⁰ Yaahovuwatja ohinassa ni yaahorwaatja wiikaani mwaako i yaahiiratja: Hiivano, niriiva, ni ninaarwaa npaka aPwiya okhuluvelihalyaaya, maana naanamattheka. ⁴¹ Moises, aahiira: Essiyani ohanhurihaka mweettihero waPwiya? Khan'nohala ophwanha etthu. ⁴² Khan'norwaatja, kontha Apwiya khaarinhu wiira yookhavihereni awananiinhu. ⁴³ Amalequita naacananeu phuritjyaaya ni n'nohala okhwatja niikatana kontha n'noohiya ontthara Pwiya. Vano, yena khan'hala okhala ninhu. ⁴⁴ Ayenatja yaahowelatja wamwaako; Vano, Moises, nivuku nowaataana khaahiyale nipuro noothukumana. ⁴⁵ Vano, amalequita acananeu yaahokhuruwatja yaakhala n'mamyaakonin'mo. Yaahowaattakan'na an'naisrael npaka Horma.