¹ Jaco aahotjuwela wiira wiigiipitu yaahaavo eyoolya yintji. Yena aahowiirela asaanaawe: N'nowehanani ntthu ninkhwaawe? ² Yena aahiira: Kihiiwa wiira wiigiipitu ehaavo eyoolya. Nrwaatje npaka woowu ni mwathume eyoolya, wowiira nikhale ni nihikhwe. ³ Assihimaawe ookhuumi aJose yaahorwaatja othuma eyoolya. ⁴ Masii Benjamim, mwaamun'nawe Jose, Jaco khantthunihale orwaa naassuulupalyaawe, kontha aanawooha omwiiraneela etthu. ⁵ Asaana aIsrael yaahowa othuma naatthu akhwaawe yaawaale, kontha etala yaahophiya elapo yooCanaa. ⁶ Vano, Jose aari n'hooleli olapweele. Yena phaatumihera atthu ooteene olapweele. Asihimaawe Jose yaahowa ni yaahooromatja ohoolowawe. ⁷ Jose aahaaweha asihimaawe ni aahaatjuwela, massi yena aahowiirelatja. N'nokhumatja vayi? Ayenatja yaahiiratja: Elapo yooCanaa, naawaale othuma eyoolya. ⁸ Jose aahaatjuwelela asihimaawe, massi ayenatja khayaantjuwelenle. ⁹ Vano, Jose aahuupuwela tjoolohatjawe mwaha waayenatja, ni aahowiirelatja: Mwaanoohankawaani! Nwaatjale owehawehatja elapweela. ¹⁰ Ayenatja yaahiiratja: Mena amwene. Anantekweenhu yaawaale othuma eyoolya. ¹¹ Naasaana antthu n'motja. Naatthu oohitjuwela etthu. Khaninakhala naanoohankawaani. ¹² Yena aahowiirelata: Nwaatjale owehawehatja elapweela. ¹³ Ayenatja yaahiiratja: Hi niri khuumi neeli, asaana anlopwana n'motja nkhala elapo yooCanaa. Omwankaani rinaathumwanihu, mwaamun'nihu nmotjooyo khaavo. ¹⁴ Jose aahowirelatja: Phanka tjiwiirelalyaakani: Mwaanoohankawaani. ¹⁵ Phimaana, n'naahala olawihatjiya. Mwaha wokumi yaFarao, khan'nokhumatjatho, woohinwaana mwaamun'ninhu nkhwaawe. ¹⁶ Munrumatje nmotja anrweele hanlyooyo. N'nohalatja nkhattya, wowiira moolumweenhu alawihatjiye, wakhala wiira ekhweeli. ¹⁷ Yena aahaatthukela nkhattya mahuku mararu. ¹⁸ Jose aahowiirelatja nihuku noneeraru: Npankatje yeeyo ni nkhalatje kontha mi kinaamoova Nluku. ¹⁹ Mwakhala atthu ohiira etthu, mun'hiyatje mwaamun'ninhu n'motja nkhattyaa, n'naakussatja eyoolya mwaha wotala yon'mawan'nhinhu. ²⁰ Nkiwiihatjere mwaamun'ninhu omwankaani, wowiira moolumweenhu akhale okhweeli ni khan'nohala okhwa. Vano, ayenatja yaahopankatja. ²¹ Ayenatja yaahiirelana yaayoru: Nihonkossera mwaamun'nihu, kontha naahomoona tjaaryaawe, owakathi waanikhuwelaawe ni khanimwiiwale. Phimaana, mahuvihwaala awaale mwaha wahi. ²² Ruben aahowaakhulatja: Akoohimeeryatjaleni: n'hikosse mwaha wamwan'hima, n'hikiiwelelatjaka? Vano nkawehatjani: Ephomyaawe ehonaatja. ²³ Ayenatja khayaatjuwela wiia Jose aanawiiwa, kontha aahaavo aataphulela. ²⁴ Yena aahaahuluwatja ni aahunla. Jose aahohokolyaa ni aahuuluma naayenatja. Yena aahonkussa Simeao ni aahontthuka ohoolowayatja. ²⁵ Jose aahowiirela anantekwaawe wiira atjalihe eyoolya nmasaakhoni waassihimaawe, ahokolosseriyaka missurukhutjaya nookhalenliya ekwahaaya. Ni yaahopankatjiya tjitjon'mo. ²⁶ Assihimaawe yaahokussatja enamatjaya ni yaahorwaatja. ²⁷ N'motjaaya owkathi waakumihaawe eyoolya wiira avahe enamaawe waamumulaaya aahophwanha nssurukhwaawe. Kontha waari omalakuni wonrupaawe. ²⁸ Yena aahowiirela assihimaawe: Nssurukhwaaka ohohokolossiya. Nwehatje nssaakhonimwaka. Mirimatjaya tjaahokhala tjowoova, yaahowehanatja yaayoeu yiiraka: Essiyaniila Nluku enipankalyaawe? ²⁹ Ayenatja yaahorwaatja wa Jaco, athumwanatjaya, elapo yooCanaa, yaahaattonkelatja tjiiranyaale. Ayenatja yaahiiratja: ³⁰ Mwene olapweele, honuuluma tjinene oona wiira naanoohankawaani. ³¹ Hiivano naahomwiirela: Khiivo entjuweleehu. Khaninakhala naanoohankawaani. ³² Niri khuumi neeli, asaana aathumwanihu. N'motja khaavo ni omwankaani ri naathumwanihu elapo yooCanaa. ³³ Mwenyooyo, honiirela: Niyeeyo kinaahala otjuwela wiira khiivo entjuwelatjeenhu. Nkihiyeratje mwaamun'ninhu n'motja, nkussatjeke eyoolya mwaha wotala yon'mawan'ninhu, ni nrwaatjeke. ³⁴ Nkiwiihatjere mwaamun'ninhu omwankaani. Vano, phun'halaaka otjuwela wiira khan'nakhala mwaanoohankawaani. Vano, kinaahala ontthukula mwaamun'ninhu mwamwiireke nakosso elapweenhu. ³⁵ Weeraaya emalaka eyoolya, khula ntthu iira narina nssurukhwaawe munrupaniwawe. Ayenatja naathumwanaya woonalyaaya nssurukhu munrupani, yaahoovatja. ³⁶ Jaco, athumwanatjaya, yaahowiirelatja: N'naakaakhatja asaanaaka. Jose khaavo, Simeao horwaa, ni n'nopheela onkussatja Benjamim. Tjitthu tjooteene tjiri wamiivano. ³⁷ Ruben aahowiirela athumwaane: Mwiivakatje asaanaaka ooyeeli kaahinwaane Benjamim. ³⁸ Jaco aahiira: Khan'nonkussatja mwaamwanaka. Kontha mwaamun'ninhu hokhwa ni yooyo phihanle. Yamwiiraneela etthu ninttala onrweenhu, kinaahala woona owerya.