¹ Ngokudha kwazwo inini, Pauro, ndiri musungwa waDjesu Kirisitu ngopamusana penyu, mahedeni. ² Zvirokwazvo kuti makazwa ngo bhasa randakapaswa, rokutora nyasha dzaMwari kuti ndikupeyi. ³ Ndinotara ngokudha kwe tchipangidziro tchandakaona, itchi nditcho tchokwadhi tchakafisika tcha ndakatara padhoko patsamba imweni. ⁴ Mukazwierenga, mutchazo kwanisa kuzia zwandiri kurangaridza patchokwadhi tchakafisika tcha Kirisitu. ⁵ Kumadzinza amweni, tchokwadhi itchi atchizi kuziiswa ku ana o anhu, asi zvinouno tchinoso pangidzirwa ngo Mweya ku maphositori nomaphorofita ake akadzodzwa aya. ⁶ Tchokwadhi tchakafisika itchi ngetcho kuti mahedeni ndionawo anyanhaka pamwepo nomitezo dzo mwiri. Awona aripoho pazvaka pikirwa na Djesu Kirisitu, pamusoro peVangeri. ⁷ Nokudharoko, ndakadziita musenzi weVangeri pamusoro petchipo tcho nyasha dzaMwari, tchandakapuwa ngo bhasa rosimba Rake. ⁸ Mwari akandipasa tchipo itchi, nyangazi inini hangu ndingaita mudhoko ku atswene ese, kuitira kuti ndipembere kumahedeni Vangeri roupfumi waKirisitu. ⁹ Kwendiri tchipo tcha Mwari ndiko kubvenekerwa ko zwiro zwakaigwa kare naMwari pakupinda kwe makore, musiki we zwiro zwese, ¹⁰ kuitira kuti zvino pano ngokudha koanamati, anyautongi no anyasimba mu mbuto dzokudhenga akwanise kuzia ruziwo rakasiana siana raMwari. ¹¹ Izwi zwakaitika pamusana potchidho tchisingaperi tchaaka tondoedza muna Kirisitu naDjesu, Ishe wedhu, ¹² Ngokudha kwake taka shinga tetchi themba, pamusana pokutenda kwedhu Kwaari. ¹³ Nokudharo, ndimomukumbirai kuti musatsukware nokushupika kwangu kwemuri, ndiko kunorukudzo rwenyu. ¹⁴ Nokudha ko izwi, ndinogodhamira Bhabha; ¹⁵ Uwo okuti anyaukama okudhenga no opanyika atambire zina. ¹⁶ Ndetchinamata kuitira kuti mupaswe upfumi woUkuro wake, iyena amusimbisei nokudha kosimba, roMweiya wake, uri mukati mwenyu. ¹⁷ Ndinomata kuitira kuti Kirisitu ararame mukati me moyo dzenyu nokutenda, uye kuti imwimwi mubhambiswe murudho Rake. ¹⁸ Ndinonamata kuti muziisise, pamwepo noatendi ese, kuti kufara, kurebha, kudzika, nokukura korudho raKirisitu, ¹⁹ Ndinonamata kuitira kuti muziye rudho raKirisitu, rinopindiridza ruziyo, kuti mudzadziswe noutswene wese waMwari . ²⁰ Hino, Uya anokwanisa kuita zviro zwese nomushobho usikaperi kunze kozvatinokumbira kana kuti zvatinorangaridza, kubva musimba Rake ranoita metiri, ²¹ Kwaari rukudzo kuanamati uye no muna Kirisitu Djesu, kuma dzinza ese, nokusinga peri, Amem.