¹ Hama, pamusoro po kuuya kwa Ishe Djeso Kirisitu uye kubhatana kwedhu Naye, tinokumbira ² kuti musadzimanikidze uye musanyeperwe, kana nemweya, kana nomasoko kana netsamba itchaita hingana yatarwa neso, sekunge zuwa raIshe raguma. ³ Musatsotsuwe nemunhu nomushobho upi hao. Ngokuti izvi azviitiki kusati kaonekwa anhu etchiramba Mwari uye nokuuya komunhu weushaishe etchiratidzuwa, mwana wokuputsa. ⁴ Yena ndiye unodzikudza ega uye ndiye asikadhi zviro zvese zvinobva kuna Mwari kana tchinonamathuwa. Yena atchadzigadzika pamusoro peanhu ese uye atchapinda mumba maMwari wodzita Mwari. ⁵ Imwimwi amurangariri kuti, pandanga ndiri nemwi, inini ndakakuvunzai zviro izvi? ⁶ Zvino makuzviziya zvinomu imisa, saka yena atchapangidzuwa kana nguwa yakwana. ⁷ Sezvakuri kusenza kusarurama, zvinodhikwana bhasi kuti abvisuwe mugwanza uya akamu imisa. ⁸ Saka muhedeni utcharatidzuwa, uye Djeso atchamuputsa nomwiya watchafuridza nomuromo Wake. Ishe atchamupedza nokuuya Kwawo. ⁹ Kuuya kwe muhedeni uyu kutchaitika nosimba raSathani, zviratidzo uye nozvishamiso zvisiri zvetchokwadhi, ¹⁰ uye noutsotsi wese wekusarurama kuna aya ese arikufa, ngokuti aona azikutambira rudho retchokwadhi kuti aponesuwe. ¹¹ Ngondaya yazvo Mwari warikuwapasa simba reushaishe wese kuti atende muzvekunyepa ¹² uye ese atonguwe, ese aya asikatendi mutchokwadhi, asi akanakirwa nokusarurama. ¹³ Asi isusu tinodhikana kupa mbiri kuna Mwari ngondaya yenyu, hama dzinodhikwana naIshe, ngokuti Mwari wakakusanangurai sezvibhereko zvekutanga zveruponeso mukutchenesuwa me Mweya uye mukutenda metchokwadhi. ¹⁴ Ngokuti Yena akakudhainzai ngokudha kwe Vangeri redhu kuti muwe nokugwinya kwa Ishe Djeso Kirisitu. ¹⁵ Saka, hama, rambai makabhamba uye itai zvetsika dzamakafundisuwa, nemasoko kana netsamba. ¹⁶ Zvino, kuti, Ishe watcho Djeso Kirisitu, uye Mwari, Bhabha edhu, akatidha uye akatipa runyarodzo uye notariro rakanaka kuitira kunguwa irikuya kubhudhikidza nenyasha, ¹⁷ simbai nekudhakara uye dzadzai mwoyo dzenyu nemabhasa uye nemasoko akanaka