¹ Yesu akhumaka empa ya mavekelo, wa mmotja wa awixutti awe ahinhimerya: Mwuintthutjihi, onwehe maluku owarya ni tjotekiya!. ² Yesu ahakhula: Munniweha tjotehiya innya tjulupale? Khunkela ohiya nluku watjulu wa nluku nihinrowa onyanyiya. ³ Ni, okilathiki Oyo omwako Olivera mpantti wa oholo wa empa ya mavekelo, Pedru,Yakobo,Yohani ni Andreya yahinkoha wephini: ⁴ Munihimerye, Itthu iya tjimrowa wiraneya tjilini? Ethonyeryo xeni enkela wonaneya itthu iya tjarowaka wiraneya?. ⁵ Yesu ahipatjerya wahimerya: Nkhalane ovilela wira ohikhale onowokani. ⁶ Entji animorwa mwa ntjinanaka ni anohimya: Miyo ka Kristo, ni animwawoka entji. ⁷ Ni mwaiwa ikhotto ni tjohimiya tja ikhotto, nhixanke; itthu iya tjihana wiraneya, numala khahi omala wa elapo. ⁸ Okhala wira ilapo tjinrowa owanaka ni ilapo tjikina, ni mittetthe ni mittetthe tjikina. Ohokhala etetere mapuro otene, ni etala. Iyo titjopatjerya tjowereya tja oyara. ⁹ Nkhale owireherya. Ayo animovahereryani makhulupale, ni nnamanakatjiya mpa mwa mavekelo. Nyuwo munorowa okhala oholo wa akhulupale ni mamwene mwaha wa Miyo, ntoko namona wa Yayo. ¹⁰ Numala wannirerela wira opatjerya ehapari elaleiye ilapo tjotene. ¹¹ Mwatthukweliya ni nkuxiwa wira mwaphukeliye, nhixanke nile enikelennyu ohimya, Okhala wira okathi ole, enkelinnyu ohimya innavahiya; khamunirowa okhala nyuwo munkela olavula, numala nnepa wawela. ¹² Ntthu onkela onvahereryaka munnawe wokhwani, ni tithi mwanawe. Anamwane ankela wanyokhaka axitithi aya ni awivaka. ¹³ Nyuwo nnanyokhiya mwaha wa ntjina naka. Numala ole onkela ovilela mpakha wokhitjeryani, Oyo onimopowa. ¹⁴ Okathi onikelennyu wona tjotakhala nipuro naharerela, ale ari oYudeya atjawele omwako, ¹⁵ ole onrowa okhala mitjulu ohikhuruwe arowaka owani, nnakhala ohikuxe etthu, ¹⁶ ole onrowa okhala omatta ohitthikele owani wira akuxe nlaya nawe. ¹⁷ Numala atakhaliya ale anrowa okhala orupala ni ankela wamwihaka mahiku yale! ¹⁸ Nvekeleke wira eyo ehiraneya elimwe. ¹⁹ Okhala wira onorowa okhala ohawa, wulupalexa ohinatthi wiraneya okhuma omaphattuwelani wa elapo, okhuma Muluku opattuxalya elapo mpakha vava, ni khinkhalakha yiraneyaka tho. ²⁰ Warokhala Apwiya khakhuveihale mahiku, khuvo akela ovuluwa. Numala mwaha wale othanliya, ale Oyo athanlalyawe, okhuveiha tjitjo mahiku. ²¹ Vano, ntthu ohimeryani: Munwehe Kristo olaa" wala: Munwehe oleiwe, nhikupali. ²² Okhala wira anowa atthu animowra yipakaka Kristo wala Profeta ni anopaka tjotikiniha numala arikimotha, wira yothe ni waweryaneya mpakha ale othanliya. ²³ Nkhale owireherya! Miyo kihohimeyani itthu iya tjihinatthi wiraneya. ²⁴ Vano, nomala ohawa wa mahoko ale, ntjuwa nnoripa, ni mweri khunrowa warya, ²⁵ itheneri tjinorowa omora wirimu, ni owerya ori wirimu onotathiya. Vano, ²⁶ anawehiya mwana a ntthu arwaka mmekuni ni warya wuntji. ²⁷ Oyo onkela oruma malaikha awe wira yathukumanye ale athanlalyawe mphantti tjomitjese, omakhitjeroni wa etthaya ni omakhitjeroni wa erimu. ²⁸ Mwinthutje ni mukukhu. Tjitjo irittha tjannuwaka ni ononiherya makukhwaya, ntjuwele wira elimwe ehanle ophiya. ²⁹ Ni tho, mwaweha itthu iya tjiraneyaka, ntjuwele wira Oyo ori wakhiviru, wankhora. ³⁰ Wekekhayi Kinohimeryani, nihimo nnla khannivira mpakha itthu iya wiraneya. ³¹ Erimu ni Elapo inovira, numala Mulumu aka khanvira. ³² Vano mwaha wa nihiku nne wala ekhatiri, khuvo ontjuwela, nnakhala malaikha wirimu, nnakhala Mwana, Tithi pahi. ³³ Nkhale owireherya! Nwehawehe ni nvekele, okhala wira khamuntjuwela okathi. ³⁴ Ori ntoko nlopwana onrowa wetta ekwaha awe: Oyo onnihiya enupa awe ahiyeryaka ananteko awe, wakhula m"motja ni nteko awe. Ni Oyo onniruma nanwehaweha wira okhale owireherya. ³⁵ Tivo nwehaweheke! Okhala wira khintjuwenle lini mwanene onikela awe otthika, wakhala othana, eriyari wa ohiyu, numala nthupi wipa, wala witjisu. ³⁶ Wakhala Oyo onikela orwa wohileiha, ohophwanyeni nrupaka. ³⁷ Enohimeryakani, kinahimerya atthu otene: Nwehaweheke!".