¹ Petero, omurume wa Yeso Kirisito, khu bakeni bala abasalaana Pontio, Ebugalati, Kapodosia, Esia nende Bitania, ² Abalobolwa khulondana nende obumanyirisi bwa Nasaye Sefwe, khubirira mukhwelabia khwomwoyo, mukhuria nende khuchukhirisibwakho amabaanga ka Yeso Kirisito: Obukoosia bube nang'we nende muleembe mubwichufu. ³ Afumisibwe Nasaye oli Samwana Omwami wefwe Yeso Kirisito, owo khulondana nende obungi bwesisa , yarwibula khandi mulinaya eliobulamu khubirira mukhulamusibwa khwa Yeso Kirisito khurula mubafu, ⁴ mbwe khunyoole obulaame oburanyasikha, obubulamo bumali, khandi oburakhabwayo, obwa mwabikhirwa mwikulu, ⁵ nang'we mwalindwa nende amaani ka Nasaye khubirira mubusuubiri bwobuonia obuli bwerekekhe khufunulwa mubikha ebimalirikha. ⁶ Muli nende obusangaafu bungi khulwa kene kano, kata kario ni khulwe bikha bidiidi bino, nbili mbwe bienyekhana, mwasinyisibwa khulondana nende amateemo kakabukhane: ⁷ ne okhuteemwa khwobusubiri bweng'we, khuli nende bukusi lukali okhukhira idakhabu eyisasikhanga, kata kario iteemwanga khubirira mumuliro, mbwe mube nende ifuma, oluyaali nende esiriibwa mubikha bia Yeso Kirisito achia khufunulwa: ⁸ Owa musiri khubona, ne mwamukheera; khandi khasi mumubona mubikha bino, arali muli nende obusuubiri, nende obusangaafu alala nende oluyaali mubwichufu oburakhanyala khulomalomakhwo: ⁹ Bulano muli khunyoola akaruliramo mubusubiri bweng'we, obuonia bwemioyo kieng'we. ¹⁰ Obuonia buno obwa banabii bareeba nende khubukoonya nende esinani, barusia obunabii khulwo bukosia obuchia khubechera: ¹¹ bakonyeresia khumanya mbwe niwina khandi nibikha sina ebia Roho wa Kirisito owali mukari mwabwe yekesianga, ngolwa yarusia obuloli khumanyakhano ka Kirisito achia khunyoola alala nende oluyaali olwakhalondekho. ¹² Ne bafunulirwa mbwe khasi nikhulwabwe ebene khaba, arali balomalomaanga amakhuwa ako khulweng'we, akamubolerwe nende bala ababayalire ifanjili khulwo bunyala bwa Roho mulafu owarumwa khurula mwikulu; amakhuwa kabamalayika bekoomba khukalola. ¹³ Khulwako muboye ebibuno bia mapaaro keng'we, mube meeso, khandi mube nende linaaya eliobukoosia bwichufu obwa muchia khurererwa ngolwa Kirisito achia khufunulwa; ¹⁴ kori ngabaana abokhuria, mureyekesia mubwekoombi bweng'we obwamberi obwomubusiru bweng'we. ¹⁵ Arali kori ngolwa ula owabalanga ali mutakatifu, eng'we mwesi mube abatakatifu mumbeera yoosi eyeikhola yeng'we; ¹⁶ khulwo khuba kaandikwa mbwe, mube abatakatifu; khulwo khubeera esie ndi mutakatifu. ¹⁷ Ne nikali mbwe mulangaanga Sefwe, ula okhalakiranga abaandu mukhurakwirikhira, khulondana nende emirimo kiomuundu, muchiire muburi muchinyaanga chieng'we ochiokhuba nga bakeni. ¹⁸ Okhirao ngolwa mumanyire mbwe khasi mwanunulwa nende ebiindu ebinyasikhanga muyifeda kose idakhabu, mbwe munyoole okhurula mumulukha kweng'we okurakhoyera okwa mwanyola khurula khu baseng'we, ¹⁹ arali khumabaanga akobukosia, kori nga akomwana we likoondi akabulamo obufwola kose esiboondo : ²⁰ Niye owamanyikhana okhurula mukhuchaaka omuse kwesialo nikusiri khubao, arali yafunulwa muchinyaanga chiobumalirikhi chino khulweng'we. ²¹ Khubirira muniye, mwasuubira Nasaye owamulamusia khurula mubafu, nende okhumuberesia oluyaali; mbwe obusuubiri nende linaya lieng'we libe khu Nasaye. ²² Nimumala okhwelabia emioyo kieng'we mungeri yokhuria obwadieri, nimusirisia obukheeri bwa bakheerwa obubulamo obwekaadi, mwedinye okhukherana abene khu bene khurula mumioyo kieng'we milafu. ²³ Khasi mwebulwa elikhabi lia khabiri khurula khu yimwo yo khusasikha, arali khurula khu yila eyirasasikha, khubirira khulikhuwa lia Nasaye elilamu khandi eliakhabeo chinyaanga chiosi. ²⁴ Khulwo Khubeera emibiri kioosi nibunyaasi, khandi oluyaali lwomuundu lwosi luli kori ngesimuli siobunyaasi. Obunyaasi bwomanga, ne esimuli silakakha asi. ²⁵ elikhuwa lio Mwami lichia khumenya chinyaanga chioosi. Ne lino nilio elikhuwa elie ifanjili eyamwayalirwa.