¹ Amatuloku chachaang mu akwe konet, tupchosyekyu, anget ale tun kenyoru kirwoge nyo o kiya. ² Amu kibutsoot ache togol mu tuguk chatya; ngitimabut chii aka togol mu ngolyo, kibokyinotgei chichone, ak kumuche kuriib borto kimugul kinyenda. ³ Ngutu kugoji karik kotuwaigab mbartanyishek, si kisich kugasech it, kuweche borwekwak kichega togol. ⁴ Aroo melisiek agiche, ambo ngitikiindon kiya, aku kweryote koriisto nyonyogis, kewese baoyo katigin nyo kindojine kuwo wolo makyinikei rong'inde. ⁵ Lee nyone ambo ng'alyapta kamasta nyomining' ak kilasagei mu tugun chokindoon. Oroo, bele maat nyomining' karti nyo oo. ⁶ Aku ng'alyapta ku ma', ng'wenyu nyobo tengek mu komoswekyo. Ng'ayepta nyo murwone borto kimugul, aku kunoome ma' mu bandab chii kitee kusabe ak kunome mu maatab geena. ⁷ Amu kibaye tyong'in aka togol ako toriit ako togol cho chuutekei, ak tuguk chomi araraita, ku kii kubaibai biik. ⁸ Aku momuche chii kuboyu ng'alyap. oiin nyomomunye, aku nyiitaat ng'wonetab meet. ⁹ Kilosune nyone Kiptaiyat ako Aboo, aku mu nyenyi, ke bane biik cheki kwaii mu kerkeindab Jehovah. ¹⁰ Mu kotee agenga, kumong'unee kaberure ako banisye. Tupchosyekyu, kutumoayokis tugun chele chu. ¹¹ Ara kutunee kebene agenga beek cho anyinyen ako cho ng'wonen? ¹² Cho kitupche, ara muche mogoiwo kiyii yemit? Nde kiyii ketitab sabibu kiyii mogoi? Ai momuche mbo beekab baarik kipka bei cho anyinyen. ¹³ Ng'oo nyong'om mu akwee nyo kuisot? Kany kuborto chichone boisionikji mu atebe nyakararan mu kamining'etabgei nyobo ng'omnate. ¹⁴ Ako ngutu oting'e ng'atkoong' nyang'wan ak toye mu muguleikwok, kutu malasgei ak aberberishe mu imanda. ¹⁵ mo bo barak ng'omnatoni, bo ng'weny, bo borwek, bo oinde. ¹⁶ Aku wolo mito ng'atkonda, ako toiye, kumito bolote ak yautye aka togol nya ya. ¹⁷ Aku ng'omnate nyobunu barak, ku nyebo tai , kutilil, aku chame kalye, muitoi, aku kase kiy nyokimwojini, aku nyitaat rirane ako beek chokororonen, ama wolokse aku ma tinye chombile. ¹⁸ Ak logoyekab imanda chekikugool mu kalya mu kichega cho oiye kalya.