¹ Chekitupche matanam kayane nyebo kiptayandenyo, nyebo torornate, amawelel biik alak. ² Ngiticho chii wolo atuyejini, ngotinye peteyo nyibo koitab komonut, ak nguroik chokororneen, akicho ambo kibanania nyotinye nguroik cheyachen' ³ Ak akonyit kinyenda nyoloche ngoroik chokororneen, akoleji tebee yu kararan, ak oleji kibananiante tonon mu yo, nde itebe ng'wony yu bo kelyegyu, ⁴ ku mobeisyoji akweka ak ayoku kirwogik chebo kapkotut chayachen. ⁵ Agas anyu chekitupche, aki chamanichu, muche kimolewen Jehovah cho benene mu ng'wony kuloku mogorek mu kayane ak kuloku chonyoru baunate nyekimwoji kichega chemenye kinyenda? ⁶ Aku kasaas kibanania! Tos mo mogorek che nyolilok? Tos ma kicheka chowirjinook ng'echorosiekab kapkirwok? ⁷ Mechure kichega kaine nyebo tekisto nyekimwoitoenok? ⁸ Ngitimuch isultae n'atutie nyebo kaplaitoria kileyo mwae sirutik kile cham chitab kokweng'ung' kileyo ichomtogei, ooiye nyakararan. ⁹ Ako ngitalewene biik alak, ki kaikai tengek kirwokwok ng'atutye kile chebistoi. ¹⁰ Amu chito aka togol nyoriibe ng'atutye kimugul akubiit mu ng'olyonde agenga, kiname kiroge mu togol. ¹¹ Amu nekimwa kile, " Amoibgei" kemwa kinyile kile, " Mebarishe." Nyone aanyu, ngitimeii ibetabgei, ak ibarishe, ki kaiyegu nyomotoi ng'atutie. ¹³ Amu matinye kirwoge riranetabgei mu kinyenda nyo moboru rirenetabgei, tororogei rirane mu kirwoge. ¹⁴ Nyorunee chii tupchosyekyu ngitimwa kile atinye kyanee akumatinye boisionik? Muche kusoru kinyende kayanee? ¹⁵ Ngiti weti kileen wering'wong, nde ku cheptang'wong, akimatinye kiy nyoome betusiek togol, ¹⁶ ak kileji chii mu akwee, "Aba mu kalye, awas wolo lalang', ak biyeny." Akimogoji kichega tuguk chomeche borto, kitorotonee? ¹⁷ Ambo kayane kinyenda , nematinye boisionik, ki kikima. ¹⁸ Aku muche kimw chiitage kile, " Itinye kayane, ak atinye boisionik, borwo kayaneng'ung' nyematinye boisionik, soboruung' boisionikyu mu kayane. ¹⁹ Iyane kile agenga Jehovah; iie nyakararan. ku ambo oik kuyene kile nyone, akubotonsot. ²⁰ Mache inai ,ee, chito nyomatile kiy, kile, kayanee ni matile kiy, ki buch? ²¹ Tos kimakiityi imanda aboonyo Abraham mu boisionik , kinegoita werinyi Isak mu kapkoros? ²² Irooti kile kiboisye kayane kuboto boisionik, si kuloku kayanee nyachulaat mu boisionik. ²³ Ak kisulta sirutye nyomwoe kile, " kiyan Abraham Jehovah ako kikiit kinyenda kile bo iman," ak kikuree kinyenda charwap Jehovah. ²⁴ Aroti ole kiityini chii imanda mu boisionik, ma kiityini mu kayane kityo. ²⁵ Ak kile nyone, tos kimokiityi Rahab chepkesesio imanada ambo mu boisionik, amu kitaach che kiyoktoi, ak kiwekta kicheka kibaa aree aka? ²⁶ Amu kileyo meat borto nymatinye tamirmirye, kile nyone kayane nyimatinye boisionik, meat ambo.