Usambi 1
1
Feteo mutumwa wama Yesu Kristo, gwa aghenyi nivifaghatie, anyohwaniwa, gini Ponto ong`e, Galatia, Kapadokia, Asia na Bithinia,
2
ufuma na ihaa rama Mungu, Tatra, ukiria ioywa ra Nkhoo gwa witegheyi na uhunwirwa saghami ama Yesu Kristo. Neema itendeke guni nyenye , na majighana iingife.
3
Akumbasuwe Mungu Tatra wama Bwana witu Yesu Kristo. Ugu ukuu wa rehema yakwe, akagufa ufafo wa gaviri gwa ugijaghumbua gwa urindi ukiria ifitywa rama Yesu Kristo ufuma ugwa akuyi,
4
gwa urindi niutriuhia, ututendeka wina ikhwe wala uhia. Wiikiwe ugirunde gwa soko anyu.
5
Gwa nguu ya Mungu mudimwa ukiria ihuvia ra wokovu niugikhee wiindie urughwirwa umakhondo ompeo.
6
Yanji ugu iriyi, unifanoi mujogitregheya ivi gwasoko amakhasiko hiya hiya.
7
Uu, ni gwa soko aihuvia ranyu isoyiswia, ihuvia nirikuu guliko sahabu, ni iuruvika ukiria moto iusoywa nimpese inoneye. Iyii iufuma ili ihuvia ranyu rihange ufafa hesima gini ukunukuo wama Yesu Kristo.
8
Mutina muona mweso, nyeso mumuyanjitre. Mutimukengee fanoi, nyeso muhuvie gini mweso na mwina uyanjo niutiudaha uhanyika niugijue weru.
9
Fanoi muhoa aghonjo matokeo aihuvia ranyu, utyuri wa nkhoo yanyu.
10
Aghanga vikafenja na uwiya gwa uringahiya utyuri urui uhusu neema naari ijotendeka guni nyenye.
11
Vikafenja umanya ni utyuri wafei niujie. Vikafenja umanya ni ikhondo rafei ni Roho wama Kristo ni wi mukhatri awe uguvakhania ntuni. Iyii iugighea gikhondo naari uguvakhania rui uhusu makhasiko ama Kristo na weeru naari ujomusambiya.
12
Ikarughwirwa gwa aghanga gwasoko arii viutendaa mantu ayai, natri gwasoko awe aghonjo.
13
Gweso rughui iino ya mahaa anyu. Mukhave umaghemo anyu. Mugijaghumbue gwa trutri na neema niirifo gini nyenye ikhondo rorughwirwa gwama Yesu Kristo.
14
Ginya ang`inya ni vina gitwi, mutatrungwe nyenye na iyanja niari mukasambiya nari khii mutrina mahaa.
15
Nyeso ginya naari akavaitrana nimweru, nyenye, nomutrendeke mwaeru unyenendo anyu ong`e auduvi.
16
Gwa sokho ihadiwe "trendeki mwaeru gwa sokho nene ni mweeru"
17
Na mpese mukaitrana "Tratra" uyoo niugu hukhumu gwa trutri ugwikweywa na mwino wa mumuntu.
18
Mumanyie niari trigwa hela au sahabu - mantu niuruvikha nimwakhomowe ufuma untendo yanyu ya ufutru naari mukagifundisia ufuma gini va tratra vanyu.
19
Nyeso mwakhomowe gwa saghami ahesima ama Kristo, ginya ankhoo niitiketre uvi.
20
Kristo wahwaniywe nearii kii misingi a urimi, nyeso fanoi matriku ayai ompeo, warughwirwa gini nyenye.
21
Mumuhuvie Mungu ukiria gini mweso, uni Mungu akamufitya ufuma ugu akhuyi na akamufa weru gino ihuvia ranyu na ugijaghumbua gutrendeke gini Mungu.
22
Mwatrendie nkhoo yanyu itrendeke njeru gwa umitegheya trutri, gwa ighemo ra uyanjo waginyandughu nirighokie, uyi giyanji gwanguu ufuma unkhoo.
23
Mwafafiwe ufafo wa gaviri, trigwa mbeyu niuruvika, ukiria ufanga wa ukhani wa Mungu niusaghie.
24
Gwa sokho "miiri ong`e ginya mahwa, na weru wayo wong`e ginya giruva. Giruva giugwa,
25
nyeso ukhani wama Bwana ugusagha khae na khae" Irii ni iraghiyo nira tranantiywe ginya injili guni nyee.