¹ Yolo le, ndogo jyawa ghamelani kwa Mwegeri . Ntibone ebahadeka ebandekela lenge bubugu bilya bilya. Bibugu bibi mbikebaha sayo . ² Emahelei na sese . Emahelei na baghaya milemo babeju. Emahelei na balya belegire mibele yobo . ³ Kwa bulya eshe tule bamudadi . Eshe mbo tughorate Mugwe kweraserigwa ni nkolo. Tweghorerate kwa Kristo na balya bati bujaghamba kwa mubele . ⁴ Ejagha bobyo , kola ngugekolwa na monto wedinya mubele jojo , niye ninkehikya eghaya bobyo mno . ⁵ Kwani namuradirwe nkya ya kanana , mabarwe bantu baisraeli. Nde wa kabira ka Benjamini .Nde Mweburania wa Baeburania. kwe merye gaba syaria ya Musa nale Barisayo. ⁶ Kwa buhalidu bwawa natiririre Kanisa . kwojya saba ya Kanisa , ntyale na nughunughu kwa gisyeria . ⁷ Ale kwa bibugu byonse bilya nabande eba mbiju kwawa niye , natarire manga ng'ororo nkwa bulya naje Kristo. ⁸ Lya saba , natarerere bibugu byonse eba tigantu ebokana na bujaregu bwe emanya Kristo Yesu Mwegeri wawa . Kwa lilyo lyehe nimbahaba bibugu byonse , mbajatala ebuga ni ng'ororo ebuga mbane Kristo . ⁹ Mbanekane ndane yehe . Ti saba tawa niyeka eboka kwa syeria , ale ninde elya ekebanekana kwa mughiso jwa Kristo, eboka kwa Mugwe , jule tereni la mugiso. ¹⁰ Yolo nkondate mumanye wene na nguru , lya eroka lyehe na hamwe kwa etirirwa lyehe . Nkondate njelajwe na Kristo kwa angania lya lokyo lwehe, ¹¹ ale egera ngikye kolwa na nedinya lya mirokyele eryoka . ¹² Ti lya saba abwa nisubire ebana bibugu , nanga abwa nisubire eba mwemelu kwa bobyo . Bwegada ninjesumate ebuga ngikye ebana kilya nange kilya kya banekane Kristo Yesu. ¹³ Ndogo jyawa , ntikolate ebuga nisubire ebana bibugu bibi. Bwegada ghayatye kibugu kimwe : nobelwa bya suha nabetela bya bushone . ¹⁴ Njesumate ng'ikelen kilya ng'abile bulya ebuga mbane gitalu kyegolo kyebugelwa Mugwe kwa Kristo Yesu . ¹⁵ Enyonse balya tukorere ehonoka , tuhikire nansa bobyo . Na kolwa onge nakedemererya kwa binge byekekerane kwa ekalaga lyonse , Mugwe nakelibahingola lelyo kulya mule . ¹⁶ Ejagha bobyo , tutyimine ehikela na tugende kwa ngendelo eyo. ¹⁷ Ndogo jyawa, ngheghai nie . Bamahelei kwa bugharehi balya bagendate kwa angania linga lya hara yeto. ¹⁸ Baneni balya batore mbalya sei nkya jyonse nimbabelaga, na ryolo mbabelate kwa mesori- baneni batore bo bahoma ba msalaba jwa Kristo. ¹⁹ Mugero jwobo negharagharya . Kwa bulya Mugwe wobo nkiburi, na bururuganu bwobo bule kwa nsoni jwobo. Bandemereregya bibugu bya nseeno. ²⁰ Bwegada butolo bweto bule kwegolo , kuilya tubetelate muhonoki weto Yesu Kristo . ²¹ Akelaja mibele yeto jinaghanaghu jiba bo mubele jwehe jwa ghorona kwa ngalu jilya jimughairye egerere binto byonse .