¹ Mbabhuzizye zyonti izi pemutahondeye kupunuzwa. ² Bhalibhafumwa munsi ya vibhanza; nalyoli ahabhalilizyo hakwinza he wonti wealifwa alisibhilila ukuti akubhomba imbombo inyizya panongwa ya Mulungu. ³ Bhalibhabhombela zyonti izi panongwa bhatamumanyile Utata pamo bhatamanyile ine. ⁴ Imbabhuzizye zyonti izi ingape ukuti ahabhalilizyo hakwinza ahizi zyeziliyinza, muhondeye ukuzikumbuha inzavwe nabhabhuzizye muhondeye abhene. Ntabhabhuzizye izyavintu ivi kufuma pabhwandilo panongwa namile poka nimwe. ⁵ Loli, isalizi nkubhala kwa wula weantumile; loli nawumo mukasi mumwinyu weakumbuzilizya, "Ukubhala kwiyi?" ⁶ Panongwa nkuyanga amazwi aga kukwinyu, ubhuswime bhwizuye mumoyo ginyu. ⁷ Inza bhwebhulo, nkubhabhuzya ubhwanalyoli: pe hinza kukwunyu inganepa; shekuti ingantakwepa, umwimilizi ataliyinza kukwinyu; loli inganabhala ndimutuma kukwinyu. ⁸ Ingayinza, uyo umwimilizi alisimishizya insi izya mbibhi, nizya bhugolosu nizyakulongwa. ⁹ Nizya mbibhi, panongwa bhatasubhiye ine, ¹⁰ nizya bhugolosu, panongwa kubhala kwa tata, pe mutalinenya sona; ¹¹ nizya kulongwa panongwa numupiti wa nsi ino alonjilwe ¹² Namile nazyope inyinji izya kubhabhuzya, loli temuzimanyisanye isalizi. ¹³ Loli, uwene Umupepo wa nalyoli, ayinza, alibhalongozya mubhwanalyoli bhwonti; kwekuti ataliyanga panongwa yakwe wuyo weka; loli zyonti zyealiyivwa, aliyanga ivintu ivi; pe alisimishizya kukwinyu ivintu vwe viliyinza. ¹⁴ Uwene alinkuzya ine, panongwa aliganyatula gonti nukuziyanga kukwinyu. ¹⁵ Ivintu vwonti vwealinavwope Utata vwe vwane; pengalumo, njanzile ukuti Umupepo aliyega ivintu vwane pealivilolesya kukwinyu. ¹⁶ Hashili ahabhalilizyo hansi, temunenye sona; lwe hashila ahabhalilizyo ahansi sona, mulinenya." ¹⁷ Bhamo mubhasundikwa bhakwe bhahayanzanya, "Shoni she akutubhuzya, "ahabhalilizyo hansi, te munenye sona,' nukuti ahabhalilizyo ahansi kutimunenye,' pe,'panongwa nkubhala kwa Tata?" ¹⁸ Pengalumo bhahati, "Shintu shoni sheakushiyanga, 'Hashili ahabhalilizyo ahansi'? Tutamanyile vweakuyanga." ¹⁹ Uyesu ahenya ukuti bhahanzaga kumubhuzilizya, wope ahabhabhuzya, "Mukuyibhuzilizya mwenemwe mweka izyili, lwenayanga, 'Hashili ahabhalilizyo hansi, mutalinenya sona; pe lwe yashila ahabhalilizyo hansi mulinenya'? ²⁰ Subhila, subhila, nkubhabhuzya, mulilila nu kushesya, loli insi yilidobha, mulibha nu bhuswimililwe loli ubhuswililwe bhwinyu bhuligalunkana ukubha luseshelo. ²¹ Umwantanda akubhanga nu bhuswimililwe ahabhalilizyo peakubha nu bhubhavu panongwa ahabhalilizyo ahakupapa ukufuha; loli ingapapa umwana, atakukumbuhaga sona ubhubhavu panongwa ya luseshelo lwakwe ukuti umwana apafilwe munsi. ²² Imwe bhulo bhwebhasulumanye isalizi, loli pemulinenya ulwa bhubhili sona; pe nampoyo ginyu yiliseshels nawumo wealibhwezya kwefwa uluseshelo lwinyu. ²³ Isiku iyo mutalimbuzilizya amabhuzyo. Subhila, Subhila, nkubhabhuzya, Inga mukulabha lyolyonti kwa Tata, alibhapa kwizina lyane. ²⁴ Paka isalizi mutalavile nashimoshimo kwizina lyane; labha, nimwe muliposhela ingape ukuti uluseshelo lwinyu lukwilaje. ²⁵ Nayanaga nimwe ku njango yeyitakumanyiha isalizi yikwinza pe ntaliyanga ku njango yeyitakumanyiha loli iwe na ndibhabhuzya pa bhuzelu izya Tata. ²⁶ Isiku iyo mulibha mwi zina lyane, pentankubhabhuzya ukuti ndibhabhuzya kwa Tata panongwa yinyu; ²⁷ kwekuti Utata wuyo abhaganile panongwa muganile ine panongwa musubhiye ukuti ukuti ifumile kwa Tata. ²⁸ Nafumile kwa Tata pe nkinza munsi; sona, nkepa munsi pe nkubhala kwa Tata". ²⁹ Abhasundikwa bhakwe bhahamubhuzya, "Ukwenya, salizi ukutubhuzya pa bhuzelu pe ujakuyanjla mu vwili. ³⁰ Isalizi, tumanyile ukuti umanyile ivintu vwonti pe utakwanza umuntu wowonti akubhabhuzilizye suti. Panongwa ili tumanyile ukuti ufumile kwa Mulungu. ³¹ Uyesu ahabhamula, "Isalizi mwasubhila?" ³² Yenya, hakwinza ahabhalilizyo, nalyoli ubhugolosu bhwa fiha, pe mwakusantana mwenti wula nu kukwabho mwakundeha neka. Loli ine neka panongwa Utata ali nine. ³³ Nkubhabhuzya zinizi pekuti mukasi mumwane mubhe nu bhwihalo. Munsi mulinamayimba, loli muyigomwaje umoyo, injiposite insi.