¹ Isalizi mukasi munsiku izi, ahabhalilizyo habhwinji ya bhasundikwa peyamile bhahonjelaga, isyononeko lya Bhayahudi abha Shiyunani lihanda mubha Eburania, panongwa abhafwile bhabho bhamile bhahabhaluvwaga mukugabhana mwisiku zyonti izya shakulya. ² Abhasundikwa ishumi na bhabhili bhahabhaholela ubhwinji bhwonti ubhwa bhasundikwa bhahayanga, "Te mumo kukwitu kulileha izwi lya Mulungu nukubhalisya pashakulya. ³ Pengalumo, bhamanyani, sebha, abhanavuli bhasano na bhabhili, kufuma mumwinyu, abhantu abhinza, bhebhizuye Umupepo na bhanjele, bhe tuhondeye kubhapa imbombo ino. ⁴ Ni swe, tulijendelela shima mukubhomba na mukulumbilila izwi." ⁵ Amzwi gabho gahahobhosya ubhwinji bhwonti. Pe, bhahamusebha Usitefani, umuntu weayizuye ulwituho nu Mupepo Umufinjile, nu Filipo, Prokoro, Nikanori, Timoni, Parmena, nu Nikolao, muntu wafumile Antiokia. ⁶ Abhasubhila bhahinza na bhantu abha pilongolela ya bhasundikwa, bhebhalavile na pilongolela bhahabhishila inyobhe zyabho. ⁷ Pe, izwi lya Mulungu lihazyungula; nu bhwinji bhwa bhasundikwa bhuhonjela nukonjeleha uko Yerusalemu; nu bhwinji ubhupiti bhwa bhivwila lwitiho. ⁸ Nu Sitefani, weamizuye ubhwila na maha, amali ahambombaga ivisukumizyo ni vimanyilo ivipiti mukasi mubhantu. ⁹ Loli pe bhahabhuha bhamo mubhantu bhabhasundikwa Bhasinagogi lye likutakwa Lisinagogi lya Bhasatushe, ni lya Bhakireni ni lya Bhaeskanderia, na bhamo kufuma Kilikia na Asia. Abhantu abha bhamile bhahabhuzilizan'waga nu Sitefani. ¹⁰ Loli, bhatahabhwezya kupotana ni njele nu Mupepo we Usitefani amali ahabhombelaga mukuyanga. ¹¹ Pe bhahitinkana bhamo mubhantu kubhwilu kuyanga, "Twivuye Usitefani akuyanga amazwi gamusamu izya Musa ni zya Mulungu." ¹² Bhahabhahalambiha abhantu, abhasongo, na bhamanya karata, pe bhahamujendela Usitefani, bhahamulema, nu kwinza pilongolela lya shilonjelwi. ¹³ Bhahinza nabhakusimishizya abha luma ilenga, bhahati, "umuntu uno atalesile ukuyanga amazwi amabhibhi izya bhuzilo ubhu ubhufinjile ni nkomelezyo. ¹⁴ Pe twivuye akuyanga ukuti uno Uyesu wa Nazareti kuti ananganye ubhuzilo ubhu nu kugalunsanya amiho getuhapewa nu Musa." ¹⁵ Wonti wula weamalipo mukasi mushilonjelwi, ahenyelezya aminso gakwe kumwenyelezya Usitefani, bhope bhahamwenya isheni shakwe shamile inzavwe sheni sha bhahabhizya.