¹ Peyihalajiziwa ukuti tukwanzibhwa kujenda paminzi kubhala Italia, bhahamupa Upauli na nabhapinywe abhanji kumulongozi woka uwa bhasilikali bha Shiloma we izina Julio, uwa bhantu bha Agustani. ² Tuhazubha mumeli kufuma Adramitamu, we yamile lujendo mulubhazu lwa shibuma sha Asia. Pe tuhinjila mwinjeje. Aristaka kufuma Tesaloniki ya Makedonia ahabhala poka niswe. ³ Isiku lwelihalandanta tuhafiha munkaya ya Sidoni, pe Julio ahamubhombela Pauli kubhutosu peahamwititshizya kubhala kubhajenza bhakwe kuposhela ubhutosu bhwabho. ⁴ Kufuma apo tuhinjila mwijenje tuhajenda kuzubngulila kulusungo lwa Kipro lwe lwamila shadinzite inkungu, panongwa inkungu yamile kwilongolela. ⁵ Pe lwe twamile tukujenda mukasi munkaya yeyili papipi ni Kilikia na Pamfilia, tuhinza Mira, inkaya ya Lisia. ⁶ Pala wula mulongozi wabhasilikali bha Shiroma, ahayaga imeli kufuma Alexandria ye yamile yihajendaga kubhala Italia. Ahatwinjizya munkasi yakwe. ⁷ Lwe twapela twajenda hansihansi kunsiku inyinji petuhayifumwa twapela twafiha kumayimba kupipi Kinidas, inkungu yitahatwitishizya sona kubhala idala ilyo, pe tuhajenda mulubhazu lwashizungani sha Krete yitahatwitishizya sona kubhala idala ilyo,petukujenda mutende ya shizyunguli sha Krete tuhadindaga inkungu,mupipi na Salmone. ⁸ Tuhajenda muntende ya shizyunguli shashibumila kubhugomo, paka tuhafiha pabhzilo peizina Fari Haveni lyelilipapipi ninkaya ya Lasi. ⁹ Twamile tuhega ahabhalilizyo ahinji nkani, na habhalizyo hakufunga aha Bhayahudi bhamile bhajendeye bhope, ni salizi yamile habhibhi kujendelela nulujendo. Pe Upauli ahatuhalipila, ¹⁰ nukuyanga, "Bhanavuli, nenya idala lwe tukwanza tujende yilibha namayibha nukulunanjiho ulwinji, te bhwelele ya vinatulwa ni meli, loli bhope mubhulanzi bhwitu." ¹¹ Loli umulongozi wa bhasilikali washiloma ahamutejelezya inkani umwene wakwe numwenesho wa meli, kushila zyonti zila zyezihayangwa nu Paul. ¹² Panongwa aminzi gatamile bhuzilo bhwinza kutendama muhabhalilizyo habhuhatazu, abhantu abhinji bhahayanga tujendaje kubhala pala, ingape kwekuti kulyolyonti tuhondeye kufishila inkaya ya Foinike, tutendame pala muhabhalilizyo ha bhuhatazu. Foinike lwe ijenje uko Krete, yeyikwenyezyanya kubhuswelo nu kumongo na kubhuswelo kundilo. ¹³ Inkungu ya kumongo lwe yataliha kuvugula hansihansi, abhantu bhahasibha bhahashaga shila shebhamile bhahashanzaga. Bhahakwesa inyagulo nu kujenda mulubhazu lwa Krete papipi na kuzenjezya. ¹⁴ Loli lwe twajenda muhabhalilzyo hansi inkungu impiti, yeyihatwaga iyakumongo kubhuswelo, nihanda kuvugula kufumila kwisyila lyi jenje. ¹⁵ Abhabhalilizyo meli yihalema peyihapotwa kwilogolela ikungu, tuhivwana na muhabhele iho, tuhajendaga nahope. ¹⁶ Tuhashimbila kujenda ulubhazu lwelwamile kudinda inkungu kulusungo lwelukutakwa Kauda; pena kumayima inkani tuhayikungula kupoha ivoti. ¹⁷ Lwe bhapela bhazuvwa, bhahabhombela ulukusa kuyipinya imeli. Bhahayinyila ukuti twahondeye kubhala kubhuzilo lwa lusesenga ulwinji ulwa syiti, pe bhahisya ukwiha pe bhahajenzwa mulubhazu. ¹⁸ Pe tuhahomwa kumaha nkani namayimba, pe isiku lye lihalandata abhamukasi bhahanda kusumba kufuma mu meli . ¹⁹ Isiku lya bhutatu, abhantu bhahanda kwefwa aminzi kunyobhe zyabho bhabho. ²⁰ Ilelo pe izubha ni nzota zihatulamila kunsiku inyinji, amayimba gashili amapiti yihatuhoma, nu lusubhilo kuti tuhapona gegahepa. ²¹ Lwe bhapezile bhaahasogola ahabhalilizyo ahatali kusita kulya, apo u Pauli ahimilila pakasi kasi yabhamukasi ahayanga,'' Bhanavuli, muhondeye muntejelezye, penge tutefizye ukujenda kufuma krete, inga pe kuzyaga izi amayimba nukwinjililwa. ²² Nisalizi nkubhabhuzya muyigomwaje amoyo, panonga mutalibha ubhutuzyo bhwabhulanzi mukasi yinyu, loli kwinjililwa ya meli bhwelele ²³ Pa nongwa ubhusiku bhwebhwashilaga uhabhizya wa Mulungu, wewuyo u Mulungu, ine ne wakwe, pewe nkumuputa wope - uhabhizya wakwe ahimilila mulubhazu lwane ²⁴ nukuyanga , "Utahogope Pauli uhondeye uyimilile pilongolela ya Kaisari, pe yenya, Umulungu mubhwinza bhwakwe akupiye abha bhonti bhebhahajendaga poka niwe. ²⁵ Pe abhanavuli, muyigomwaje amoyo, panongwa nkumusubhila Umulungu, ukuti yilibha inzavwe nkabhabhuzyaga. ²⁶ Loli tuhondeye tuvwale nu kuhomwa vimo ivwa visungo." ²⁷ Lwe wafiha ubhusiku bhwa 14 twamile kujezwa uku nuko muminzi ga Adratik, inzavwe bhusiku bhwa pakasi uhu, pe abhamukasi bhahasibha ukuti bhasejelele pa ntope ingomo. ²⁸ Pe abhasubhila ishijela kupima ubhutali bhwa minzi nukuzyaga imita 36, muhabhalilizyo ahansi bhahapima ulwa bhubhili bhahazyaga imita 27. ²⁹ Bhahogopa isuti tuhondeye kuhoma iyalabhwe, pe bhahisya inyagulo zine kufuma mukasi ya bhuzilo bhwa kubhishila inyagulo nu kubhalabha ukuti inzanchi nkeyinzaga nzila. ³⁰ Bhala abha mukasi bhamile bhahanzaga idala lya kuyisumba yila meli bhahazisya muminzi ivoti ilinsi linsi zyakuponela ubhulanzi, pe bhahayibhiha ukuti bhakusumbila inyagulo kufumila ubhuzilo bhwa Pilongolela yi voti. ³¹ Uwene Upauli ahamubhuzya wula umulongozi uwa bhasilikali wa bha Shiloma na bhala asikali, "Mutahondeye kupona lole abha abhantu bhakusyala mu meli." ³² Pe bhala silikali bhahadamula ulukusa lwa zila ivoti pe yihaloleha yejelwe na minzi. ³³ Ahabhalilizyo ubhuzelu bhwa nzanchi bhwamile bhukwinza, Pauli ahabhabhuzya bhonti pashi bhalye hansi. Ahayanga, "Ino lisiku lya 18 mukugulililana kusita kulya, mutaliye nashimo. ³⁴ Bhwebhulo nkubhabhuzya mweje ishakulya hansi, panongwa ino panongwa nu kutendama kwinyu; Peatalipo nu wansinsi woka mwitwe ginyu we ulitega nawo. ³⁵ Lweamala kuyanga ago, ahega mukasi ahabhala Umulungu pilongolela lya minso ga muntu wonti. Pe ahamensulanya mukati ahanda kulya. ³⁶ Pe bhonti bhahatendamiha amaoyo na bhope bhahega ishakulya. ³⁷ Twamile abhantu 276 mukasi mu meli. ³⁸ Lwe bhamala kulya ivwa kubhakwila, bhahagomba meli yipepusu kwa kusumbila ivintu mukasi muminzi. ³⁹ Lwe yafiha umusanya, bhatahayimanya insi ingomo, loli bhahenya ubhuzilo bhwa nsi ingomo yeyiliyinjila muminzi yeyamile musenga umwinji. Bhahayanzanya inzavwe bhahondeye kujenzya imeli kubhala papo. ⁴⁰ Pe bhazegevwa inyagulo zyabho bhahazileha muminzi. Muhabhalilizyo hanaho bhahazegevwa inkusa zya tanga pe bhahazuvwa pabhuzilo bhwa pilongolela kubhala kungu, pe bhahabhala uko kubhuzilo bhwa lusenga ubhwingi. ⁴¹ Loli bhahinza pabhuzilo pe sososheye yibhili iya minzi yikuhomana ni mweli yihabhala ku lusenga. Nu bhuzilo bhula pilongolela ya meli yihatipila pala pe yitahabhwezya kwepa, loli bhuzilo ya pilongolela ya meli yihanda kuvunziha panongwa ya bhuhali bhwa mavilingwa. ⁴² Bhahayanga bhala abha silikali bhamile bhaku bhagoga abhapinywa, ingape atalipo we angaziyanga nizya kushimbila. ⁴³ Loli wula umusikali wa bhasikali wa shi Roma ahanzaga kumupoha Upauli, pe ahawimilisya inyango zyabho; pe ahabhalajizya bhala bhe bhahondeye kuyanjila, bhahadomoshe kufumila mumeli ukuti bhabhale munsi ingomo. ⁴⁴ Pe abhanavuli abhinji bhali landata, abhamwabho pamwanya ya vibhanza vwa bhena bhanji pamwanya ya vintu ivwinji kufuma mumeli. Kwidala ili yihafumila kuti bhonti tukufiha ahinza munkaya ingomo.