¹ Khoma edudwe m Sayuni, na khoma eholo mwigamba elyane ilinza! Akhaya bhonti abhensi bhayingaje na yete; fananaje isiku elya Ngolobhe lihwenza; lyoli lilipapepe. ² Lisiku lye nkisi nowila isiku elye mabhengo nenkisi evilima, neshe esahwiti yezyamiye mmagambo, ejeshi igosi na lyenguvu lipalamila. Seliwohileabhe ijeshi neshe elyo, na selyeyibha nantele, hata amaha ega vikholo vivinji. ³ Omwoto gulya hwitagalila lyabho, na khosi yakwe, omwoto guhwaha. Ensi eyo eli neshe e bustani eye Edeni hwitagalila lyakwe, lelo akhosi hwakwe huli amagona lyalinanchishe. Lyoli nahamo hahonti hahayiselenga. ⁴ Shahubhoneha ijeshi neshe oga dogomi bhabhashembela nenshe bhabhinjie edogomi. ⁵ Bhaluha huholo nenshe ila eye magali pamwanya eye malisholo ye magamba, nenshe eholo shaguna omwoto gwa gupemba amapelele nenshe ijeshi elye mahaa lyalitayari hwibho. ⁶ Hwitagalila lyabho abhantu bhabho bhalabhabhalabha amaso gonti aggalishe abha mazelu huwoga. ⁷ Bhashembela neshe bhabhalwa bhali namahaa; bhazubha okuta neshe askari; bhabhasojela shilaomo, sebhanankanya evikundi vyabho. ⁸ Nantele nomo omo yahuhuba owamwabho anshenje bhasojela shila omo mwidala lwakwe; bhahale bhahudula hwidala elye ulinzi na sio agwe hwonze eyestari. ⁹ Bhashembelela iboma, bhashembelela hulubhomba bhazuha bhati yembyumba, na bhashila ashilile amadilisha nenshe abhibha. ¹⁰ Ensi eyinga hwitagalila lyabho, emwanya eyinga isanya no mwezi nkisi, ne ntondwe zileha alavyee. ¹¹ Ongolobhe abhosiya izi lyakwe kwitagalila elya sikari bhakwe; afwanaje bhabhalwa abhantu bhakwe, bhinji tee afwanaje abhahale bhana mahaa, bhala bhabhabhomba endajizyo zyakwe. Afwanaje isiku elya Ngolobhe ligosi na lyakwogofwe tee wenu yagawezya akhale? ¹² ''Lelo hata eshi, ''Ayanga Ongolobhe, ''Bweleli ane humoyo genyu gonti. Nanali, lila na dhonde.'' ¹³ Zembulanyi amoyo genyu, siyo amenda genyu tu, na awele hwa Yehova Ngolobhe wenyu. Afwanaje aline neema na anolusajilo semwepesi avitwe mwinji owa sajila wape asajila amabhibhi. ¹⁴ Wenu yamenye? Aje agagaluha nabhe nolusajilo, natileshele urusayo kwisalo lyakwe, esadaka eyeusune sadaka eyamwele hwa Yehova, Ngolobhe wenyu? ¹⁵ Khoma endundwe ohwo hu sayuni, ozi amoyo libhonganyi, ibongano igosi. ¹⁶ Bhonganyi abhantu, lyozi ibongano. Bhonganyi abhana nebho bhahwoha ibele. Yehova oweweji afumila mpanda yakwe, noyakwengwa afumila mwihenje lyakwe. ¹⁷ Ebho adimi, bhatumishi bha Ngolobhe, bhalile kati ya papalieputo pamadhabahu. Nabhayanje, ubhasajile abhantu bhaho, awe Ngolobhe, wala uganjehwefwe ulugalo lyaho uhapata esoni, hata amataifa bhalongozya juu ya bho. Yenu bhayanje kati ya bhantu, ''Alihwi Ongolobhe wabho?'' ¹⁸ Epo ndipo Ngolobhe alolile owivu kwajili ya ensi yakwe wabhasajila abhantu bhakwe. ¹⁹ Ongolobhe wagalula wabhabhola abhantu bhakwe, Enyaji, embabhaletele evyalye, ne divai mpya, na mafuta. Namwe mbhakute huvintu evyo, wala sembabhabhombo nantele abhe ngoni kati ya bhe mataifa. ²⁰ Emba bhefwe bhabhanyaganila abhakaskazini bhana bhe hutali namwe, na embabhashizye mnsi enyumu na yelehwilwe. Esehemu eya hwitangalila eye jeshilyabho ibhahwinjilw entombe egahumashariki, ne sehemu ya hukhosi yayinjila entombe ya humaghalibi. Obhozu wakwe ubhahwemelele pamwanga, na onusi wakwe obhibhi ebhahwemelele pamwanya lyoli. Abhambile, amambo amagosi. ²¹ Mgajehwogope, nsi, seshelelaji na shime afwanaje Ongolobhe abhabhombe amambo amagosi. ²² Ogajehwogope, amakoko agamwigona, afwanaje odimo ugwa mwigoma gayibha, makwi amafyolesi gakwe, na makwi ga mizabibu na mizabibu ibhapape akonje hwabho hwonti. ²³ Shimaji, amwe mbhantu bhahu Sayuni, na shime Yehova, Ngolobhe wenyu. Afwanaje abhahupele evula eyevuli hushepimo shakwe eshe haki wape atonyezyao evula eye masika nevula eye vuli neshe owande. ²⁴ Obhongolo olwapetele zibhameme engano, na vyelelo viwahwitihane edivai epya na amafuta. ²⁵ ''Nane embabhawezyezye ego amaha gagalewelwe nenzigene , Palale, ne madumadu ne tunutu - ejeshi lyane ligosi lyendisontezyezye kati yenyu. ²⁶ Mwayilya eshalye nomwiguto na kute nalisombe, itawa lya Ngolobhe uwenyu, yabhombile amahajabu kati yenyu, wala sembabhaletele nantele abhantu bhane. ²⁷ Mbhamanye eyaje ane ehwendi kati ye Israeli, ne yaje ane ne Yehova, Ngolobhe waho, nantele momo owamwabho nantele sembabhalete ensoni abhantu bhane. ²⁸ Yayibha baada yeyo nayisuhanya Roho yane juu ya bhemabele bhonti, na bhana bhenyu na lendu bhenya bhayikuwa. Azee bhenyu bhayikota endoto, asahala bhenyu bhayilola endolezyo. ²⁹ Antele juu ya tumishi bhenyu aume na bhashe ensiku naisuhanya e Roho yane. ³⁰ Nane nayilolezya amantu ageajabu humwana na pansi, idanda, no mwoto ne minara eye lyosi. ³¹ Isanyaayiligaluzanya abhe nkisi no mwesi abhelidanda, salisele ahwenze isiku elya Ngolobhe lyalili ligosi na lihwogofya. ³² Na yayibha yaje omuntu yayibha yayonti yayililwe zya itawa elya Ngolobhe ayipona. Afwanaje mwigamba elya Sayuni nam Yerusalemu bhayibha abhantu bhabhayipona, neshe Ongolobhe shayanji na masagalizyo ebho bhabhakwizya Ongolobhe.