¹ کی اسی فیر اپنی نیک نامی دَسنا شُروع کر دتی اے؟ ساہنوں دوسریاں وانگوں نیک نامی دے خط تہانوں دین دی ضرورت اے نہ لین دی ـ ہے نا؟ ² تُسی آپ ساڈے لئی نیک نامی دے خط جے ـ جیہڑے ساڈے دِلاں اُتے لکھے نیں۔ جناں نوں سارے لوک جاندے تے پڑھدے نیں۔ ³ تُسی وکھاندے اوہ کہ ٹُسی مسیح یسوع دا اوہ خط جیڑا ساڈے ولّوں دِتا گیا تے جیڑا تہاڈے دِلاں اُتے لکھیا گیا اے، اے سیاہی نال نئیں پر زندہ خُدا دے روح نال لکھیا گیا اے۔ اے پتھر دِیاں تختیاں اُتے نئیں لکھیا بلکہ تہاڈے انسانی دِل دیاں ٹختیاں اُتے۔ ⁴ تے اے بھروسا ساہنوں خُدا ولّوں یسوع دے وسیلے نال مِلیا اے۔ ⁵ اسی اپنے آپ ایس قابل نئیں کے کسے طرح دا دعویٰ کر سکیئے۔ جیڑا ساڈے اپنے ولّوں ہووئے۔ بلکہ ساڈی قابلیت خُدا ولّوں اے۔ ⁶ اے صرف خُدا اے جس نے ساہنوں ایس قابل بنایا کہ اسی نوے عہد دے خادِم ہویئے۔ اے لفظاں دا عہد نئیں بلکہ روح دا اے۔کیوں جو لفظ مار دیندے نے تے روح زندگی دیندا اے۔ ⁷ ہُن جِس خدمت نے موت پیدا کیتی، اوہدے حرف پتھراں اُتے کھودے گئے سن، ایسے جلال والے سن کے اسرائیل دے لوک موسیٰ دے چہرے اُتے جلال دی وجہ توں نظر نہ پا سکے۔ کیوں جو اوہدے چہرے دا جلال گھٹ دا جاندا سی۔ ⁸ اوہ خِدمت کِتنی زیادہ جلالی ہووے گی، جیڑی روحِ پاک لیاوے گا؟ ⁹ ایس لئی جے مُجرم ٹھہران والا عہد جلال والا سی، تے راست بازی دا عہد تے ضرور کِنا زیادہ جلالی ہووے گا؟ ¹⁰ یقینی طور تے جیڑا کسے وقت جلالی سی ہُن جلالی نئیں رہیا کیوں جو اوہدا جلال بے اِنتہا اے۔ ¹¹ کیوں جو اگر مِٹ جان والی چیز وچ جلال سی تے قائم رہن والی چیز وچ کِنا زیادہ جلال ہووے گا۔ ¹² ہُن جدون ساڈے کول ایسی اُمید اے تے اسی بڑے دلیر آں۔ ¹³ اسی موسیٰ وانگوں نئیں، جنیں اپنے چہرے اُتے نقاب پا لئ تان جو اسرئیل دے لوک اُس گھٹدے ہوئے جلال نوں ختم ہوندیاں سِدا وہکھن دے قابِل نئیں سَن۔ ¹⁴ اُہنان دے ذہن بند ہوئے سَن کیوں جو اَج دے دِن تک پُرانے عہد نوں پڑھدے وقت اوی پردہ اُنہاں دے دِلاں اُتے پیا اے۔ اے پردہ اجے تک ہٹایا نئیں گیا، کیوں جو صرف یسوع وچ اے پردہ اُٹھایا گیا اے۔ ¹⁵ پر اَج وی جدوں موسیٰ دی کتاب پڑھی جاندی اے اُہناں دے دِلاں اُتے پردہ پیا رہندا اے۔ ¹⁶ پر جدوں کوئی شخص خُداوند ول مُڑدا اے تے اوہ پردہ اُٹھ جاندا اے۔ ¹⁷ ہُن خُداوند روح اے ، تے جِتھے خُداوند دا روح موجود اے، اوتھے آزادی اے۔ ¹⁸ ہُن اسی سارے بے نقاب چہریاں دے نال، خُدا دا جلال ویکھنے آں۔ خُداوند جیہڑا روح اے، اسی وی اوہدے طرح درجہ بہ درجہ اوہدے جلال ورگے ہوندے جانے آں۔