¹ Ndesire okuli muli Kristu.Ntasuma,n'omurhima gwani ye muhamiriza wani muli Muka Mutakatifu, ² oku ngwerwe n'oburhe bwinji n'obululu burhankahwa omu murhima gwani. ³ Neci nankasimire niene nkagwe nna ntezibwekwo Kristu erhi benewirhu barhuma,balya bomu iburwa lyani ly'omubiri. ⁴ Bo bene__Israeli.Bo Nnamahanga acishozire mpu babe bana bage anayerekana irenge lyage muli bo,bo bahirwe endagano n'amarhegeko n'obukozi bwa Nnamahanga n'eciragane cage. ⁵ Bashakuluza bali bo mu ishanja lyabo, n'oku maburhwa g'omubiri Kristu ali wakuli bo, ye mwami mukulu w'ebintu byoshi ye Nnamahanga mugishe emyaka n'emyaka.Amen. ⁶ Arhali kuderha oku akanwa ka Nnamahanga kakubire.Bulya arhali ababurhagwa n'Israeli boshi bo bene Israeli. ⁷ Arhanali aba rhengaga omunda ya Ibrahimu boshi bo bana bage.ci, "kuli Isaki iburha lyawe lyarhenza izino." ⁸ Kwo kuderha oku abana bo mubiri arhali bo bana ba Nnamahanga,ci abana b'eciragane bone lyo iburha ly'okuli. ⁹ Yunvagi oku eciragane cidesire:"Hano nshub'igera mw'aga mango,erhi Sara agwerhe omwana w'oburhabana." ¹⁰ Arhali okwola kwone,Rebaka naye arhozire izimi lya mulume muguma yene,ye larha Isaki___ ¹¹ erhi abana baba barhaciburhwa,barhacijira oli cinja oli ecibi,mpu lyo Nnamahanga ayerekana oku ajira nkoku alonzize omu kucishoga kwage,arhali mpu okenge bijiro,cikwone enyanya lyage okahamagala__ ¹² anacibwirwa,"Enfula yanashige omuziba." ¹³ Nkoku biyandisirwe: "Narhonyize Yakobo,nashomba Esau." ¹⁴ Kurhi rhwaderhaga? ka Nnamahanga ankabamwo obulyalya?Nta mango. ¹⁵ Karhi yene wabwiraga Musa,erhi: "Mbabalira oyu nnozize okubabalira nnambere lukogo oyu nnozize okubera lukogo." ¹⁶ Kusiga birhali byakulonza erhi byakulibirha,ci bya bwonjo bwa Nnamahanga. ¹⁷ Kandi amandiko gabwizire Faraho,erhi: "Nakuyimikaga nti nkuyerenekanemwo obuhashe bwani,lyo izino lyani likuzibwa omu igulu lyoshi. ¹⁸ Ntyola,anababalire oyu alonzize,n'oyu alonzize okudunduguza amudunduguze. ¹⁹ Okolaga wabwira,erhi: "Cirumaga aciheherera? Ndi wankalahira okujira ebi alonzize?" ²⁰ We muntu,oligi ndi mpu wajisa Nnamahanga kadali? K'akantu omuntu abumbaga kankamubwira,erhi: "Carhumaga wanjira ntya?" ²¹ K'omubumbi arha nkakolesa ibumba lyage nk'oku alonzize,n'okurhenza mw'eryo ibumba liguma akantu kinjinja n'akantu ka ntyantya? ²² Na Nnamahanga omukuyerekana obukunizi bwage,akaba alembire n'obutudu bwinji ebiremwa bwikwanine obukunizi byali hofi hokuhererekera? ²³ Akaba olonzize okuyerekana obuhirhi bw'obukuze bwage oku biremwa by'olukogo yene ali arheganyize obukuze? ²⁴ N'ebyo biremwa by'olukogo byo rhwe ahamagalaga arhali omu bayahudi bone,ci n'omu bapagani? ²⁵ Kwo adesire omu kanwa ka Hoseya,erhi: "Nayirika lubaga lwani abarhali lubaga lwani,na murhonyi wani orhali murhonyi wani. ²⁶ N'aba babwiragwa mpu, 'murhali lubaga lwani,'aho honene baderhwe 'bana ba Nnamahanga ozine.' " ²⁷ N'Isaya adesire okubiyerekire Israeli,"Ciru bene__Israeli bankaluga nka mushenyi gw'omu nyanja,emisigala yone yanacizibwa, ²⁸ bulya Nnahano ayunjuza duba na buzira kushubira nyuma akanwa kage omu igulu, ²⁹ Kandi Isaya ali erhi alebire,mpu:"Acibaga, Nnahano w'emirhwe arharhusigiraga iburha, singa rhwabire okwa Sodoma, singa rhwashushire Gomora." ³⁰ Kurhi rhwaderaga? Rhuderhe oku bapagani barhashimbaga bushinganyanya bayankirire obushinganyanya,bwo bushinganyanya burhenga omu bwemere. ³¹ Ci bene__Israeli bohe bakagishimba irhegeko ly'obushinganyanya,barhalihikako. ³² Carhumire? Bulya barhacikubagiraga obwemere,ci bacikubagira ebijiro na ntyo basarhala oku ibuye ly'okusarhaza, ³³ nka kulya biyandisirwe, "kamurhabwini oku mpizire omu Sayuni ibuye ly'okusarhaza n'ibuye ly'okuhirimya? Ci oliyemire arhakabonesibwa nshonyi."