¹ Fi sabah bedri, ruwasa ta kahana ijtama sawa ma shuyuk wa al kataba wa kulu mejelis al yahudiin. homon gubudu Yesuah wa istelim Howo le Bilatus. ² Bilatus asalu Howo, "Hal Inta Melik ta Yahud?" Howo juwabu Bilatus, " Inta Yahu Kelim." ³ Reis ta kahana kan gi ishteki Howo bi hajat ketir. ⁴ Bilatus asalu Howo tani mara, " Hal inta ma gi juwabu? Ainu homon gi ishteki inta bi kam hajat!" ⁵ Wa Yesuah tani mara ma juwabu Bilatus, wa de sibu howo istagarab. ⁶ Yala biga fi zaman ta Id, Bilatus daiman gi fetisu le homon wahid musjun, musjun al homon talabu, ⁷ Wa fii zol fi sejin ma mutameridiin isem tuo Barabas howo kan amulu jerima ta katulu fi zaman ta tamarud. ⁸ Nas deel ja le Bilatus wa bada asalu howo ashan bi amulu le homon ze ma kan howo amulu. ⁹ Bilatus asalu homon wa kelim, " Intum deiru keli ana feku le intum Melik ta Yahud?" ¹⁰ Ashan howo kan arufu inu ruwasa ta kahana istelimu Yesuah le howo ashan hasada. ¹¹ Lakin ruwasa ta kahana arfau sut fok ashan keli nas kore kore ashan bi feku Bararbas. ¹² Bilatus juwabu homon tani mara wa kelim, "Yala ana bi amulu shunu ma Melik ta Yahud de?" ¹³ Homon kore kore tani mara, " Keli selibu Howo!" ¹⁴ Bilatus kelim le homon, " Howo amulu shunu batal?" Lakin homon kore shedid wa shedid, " Keli Selibu Howo." ¹⁵ Bilatus deiru keli nas kun farhaniin, biga howo feku Barabas le homon. lakin howo kan jeledu Yesuah yala howo wodi ashan bi selibu. ¹⁶ Asakir dakalu ma Howo fi bet ta welaya ( Al howo Re-asa ta hakuma), wa homon lemu ketiba ta Jesh kulu. ¹⁷ Homon lebisu le Yesuah gumash ahmar urjuani, wa kutu tegiya ta shuk fi ras Tuo. ¹⁸ Wa homon bada hai Howo wa homon kelimu, Salam , Ya Melik Ta Yahud!" ¹⁹ Wa kan homon gi dugu Howo fi ras bi asaya wa gi tufu buzak le Howo. Wa kan homon dengiru ma rukuba le Howo. ²⁰ Zaman homon alisu Howo, homon shilu gumash al ahmar al urjuani de min Howo wa homon lebisu le Howo gumash Tuo, Yala homon shilu Howo ashan bi ruwa selibu Howo. ²¹ Wa kan fi wahid zol tani Simon Al Ghiyrawani, kan gi ja min mahal zara( Howo kan Abu ta Alexandar wa Rufas) wa homon asuru howo ashan bi arfa selib ta Yesuah. ²² Asair jebu Yesuah fi mahal al isem tuo Gologota ( Al mana tuo " Mahal ta adum Ras" ). ²³ Homon wodi le Howo khamra al mulakbat ma dawa ta waja jesim, lakin Howo ma shurubu. ²⁴ Homon selibu Howo wa gesimu gumash Tuo bi teriga ta gumar, al kef kulu zol bi shilu. ²⁵ De kan saa talata zaman homon selibu Howo. ²⁶ Wa fi ras selib de fok homon katibu gal Melik al Yahud. ²⁷ Kan homon selibu ma Yesuah itniin haramiya, wahid fi yemin Tuo wa wahid fi shamal Tuo. ²⁸ Biga kalam al kan katibu fi kitab de temu al gi kelimu gal, 'Hasibu Howo ma nas al katiyiin. ²⁹ Nas kan gi ruwa jambu Howo gi hagiru Howo wa gi hezu ras tomon wa gi kelimu, " Aha Ya zol al gi demeru Haikal wa gi abinu fi talata ayam, ³⁰ Kalisu nefsak wa nezil min selib. ³¹ Be nefsa teriga ruwasa al kahana al kan gi hagiru Howo fi bein tomon, sawa ma kataba, wa homon kelimu, "Howo kalisu nas taniin, Lakin Howo ma agdeir ashan bi kalisu nefsa Tuo. ³² Keli al mesi Melik ta Israel nezil tehet min selib, ashan nina bi ainu wa bi amin." Wa nas al kan selibu sawa ma Howo de kan kaman gi hagiru Howo. ³³ Wa kan saa seta, wata tala duluma lahadi saa tesa. ³⁴ Fi saa tesa Yesuah kore be sut shedid, " Eloi, Eloi lama sabachathani?" Al mana tuo gal, "Ya Rab, Ya Rab, Leh inta sebu ana?" ³⁵ Fii baad min nas al kan gi wogifu hinak asuma kalam de, homon kelimu, "Ainu, Howo gi nadi Eliya." ³⁶ Fii wahid min nas de, kutu karma fi ifunj, wa kutu fi kasab wa wodi le Howo ashan bi ashrabu. Zol de kelim, " Keli nina ainu kan sei Elija bi ja nezilu Howo tehet. " ³⁷ Biga Yesuah kore bi sut shedid wa mutu. ³⁸ Setara ta Haikal sheretu le itniin min fok le tehet. ³⁹ Zaman kaid ta Jesh al kan gi wogifu hinak wa ainu Yesuah Howo mutu bi teriga de, howo kelim, " Hagiga Rajil de Jena ta Allah." ⁴⁰ Wa kaman kan fi Nusuwan homon kan gi ainu min beyed. Min homon kan Mary Magdalina, Mary ( Uma ta Yacob al askhar wa Joses ) wa Salome. ⁴¹ Al kan zaman How fi Galilee homon duwuru wara Howo wa akdim Howo, wa nusuwan taniin al kaman ja ma Howo fi Jerusalem. ⁴² Zaman wta tala mesa, De kan yom ta tejhizat , De yom,, Al gubal sabath, ⁴³ Wa Joseph al kan min Rama kan ja hinak, howo Rajil muhtaram ta mejlis, howo kan gi intezir malukut ta Allah, howo ruwa le Bilatus wa asalu Jesim ta Yesuah. ⁴⁴ Bilatus kan mustagarab inu Yesuah kan kalas mutu; howo nadi kaid ta jesh wa asalu howo kan sei Yesuah mutu. ⁴⁵ Zaman Bilatus ligo kabara min kaid ta jesh inu Yesuah kalas mutu, howo wodi jesim ta Yesuah le Joseph. ⁴⁶ Joseph ishteri gumash, howo nezilu Yesuah min selib, wa kati Howo ma kufuna, wa kutu Howo fi turuba. Yala howo kutu hajer kebir fi bab ta .turuba. ⁴⁷ Mariya al Magdalina wa mariya Uma ta Joses kan ainu mahal al dufunu Howo fogo de