¹ Kan fadulu itniin yom le id al Feash wa al Feteir wa kan. wa kan ruwasa ta kuhana a al kataba gi fetesu teriga ashan kef homon bi gubudu Yesuah wa bi katulu Howo. ² Wa homon kelimu, "keli ma bi kun fi zaman ta id, ashan nas keli ma shakil." ³ Zaman Yesua kan fi Bethany fi bet ta Simon al ta judam, wa ze ma Howo gi teky fi ras terebiza, fii mara ja ma gezaza al jemil shedid wa fogo reha al taman tuo ghali shedid. hiya kasuru gezaza wa kubu reha de fi ras ta Yesuah. ⁴ Lakin fi baad min nas kan zalaniin. Homon bada kelimu fi nefsa tomon gal, " De kasara ta shunu ze de? ⁵ Kan reha de bi agdeir buyu bi aktar min tultumiya denar, wa bi wodi le masakiin." Yala homon kore kore ma hiya. ⁶ Lakin Yesuah kelimu, " sibu takum hiya baru. Leh intum gi azibu hiya? Hiya amulu haja al jemil le ana. ⁷ Intum daiman indu nas al masakiin ma intum, wa kulu ma intum kan deiru , intum bi agdeir amulu kwes le homon, Lakin intum ma bi ligo ana kulu yom. ⁸ Hiya amulu haja al hiya bi agdeir, hiya masa jesim tai le dufunu. ⁹ Hagiga ana kelimu le intum, kulu ma gi bashiru injil fi duniya bi wonusu haja al mara de amulu le zekira ta hiya. ¹⁰ Biga Yahuza al Iscariuti, wahid min talamiz, ruwa le ruwasa ta kuhana ashan bi selimu Yesuah le homon. ¹¹ Zaman ruwasa ta kuhana asuma kabara de, howo kan tala farhan wa howo waad ashan bi wodile howo gurush.Howo bada fetesu fursa ashan kef howo bi selim Yesuah. ¹² Fi yom al aweil ta fteir, zaman homon gi gedimu kuruf ta feash, talamiz Tuo keimu le Howo, "Inta deiru keli nina ruwa ween ashan bi jahizu, wa ashan inta bi akulu akil ta feash?" ¹³ Howo rasulu itniin min talamiz Tuo wa Howo kelim le homon, " Ruwa takum fi medina, wa intum bi ligo zol gi arfa jak kebir maliyan ma moyo, ruwa takum wara howo. ¹⁴ Kan howo dakalu fi juwa bet, ruwa takum wara howowa kelim takum le sedu bet de, ' Mu-alim kelimu , " wenu bet al ana bi akulu feash fogo ma talamiz tai?" ¹⁵ Howo bi wori le intum guraf al kebir fok jahis, Yala hinak nezemu takum le nina." ¹⁶ Talamiz gum ruwa fi medina. Homon ligo kulu hajat ze Howo kelimle homon , wa homon jahisu akil ta feash. ¹⁷ Zaman kan fi mesa, Howo ja ma talamiz al itnashar. ¹⁸ Zaman homon bada akulu, Yesuah kelim, " Hagiga ana kelimu le intum, wahid min intum al gi akulu ma ana bi selimu ana," ¹⁹ Kan homon kulu tala haznaniin, wa kulu wahid kan gi kelimu le Howo, " Hal de ana, de ma ana?" ²⁰ Yesuah juwabu wa kelimu le homon, " De bi kun wahid min al itnashar, wahid al gi dakalu ish ma ana sawa fi sahan. ²¹ Le Ibin al insan bi hasil ze ma al muktub le Howo. Lakin taab le zol al gi selimu Ibin al insan! kan bi kun kwes iza kan zol de ma weledu. ²² Ze ma homon kan gi akulu, Yesuah shilu ish wa baraku, wa kasuru. Howo wodi le homon wa kelimu, " shilu takum de. de yahu jesim tai." ²³ Howo shilu kubaya,wa wodi shukuran, wa wodi le homon, homon kulu ashrabu. ²⁴ Howo kelim le homon, " De yahu Dom tai ta al ahad, dom al kubu min ajil nas ketir. ²⁵ Hagiga ana kelimu le intum ,ana ma bi ashrabu tani mara min asir ta shejera de, lahadi yom dak al ana bi ashrabu al jedid fi mamlaka ta Allah." ²⁶ Zaman homon guna ternim, homon ruwa fi jebel zeitun. ²⁷ Yesuah kelim le homon, " Intum kulu bi jere, leanu muktub, ' Ana bi tugo raeyi wa kurfan kulu bi shetetu.' ²⁸ Lakin baad ma kan ana gum, Ana bi ruwa aweil min intum fi Galilee." ²⁹ Pitar kelim le Howo "iza kan nas kulu jere min inta ana ma bi jere." ³⁰ Yesuah kelim le howo, " Al hak ana gi kelim le intum, Al yom- Naam , Fi bilel de - gubal gedada ma kore maratiin inta bi anguru ana talata marat." ³¹ Lakin Pitar kelimu,, "hata iza kan ana mutu ma inta ana ma bi anguru inta." homon kulu kelimu ze de. ³² Homon ja fi mahal gi nadi Gethsemani, wa Yesuah kelim le talamiz Tuo, " Geni takum heni lesa ana gi ruwa seli." ³³ Howo shilu Pitar, Yacob, wa Yuhana ma Howo wa Howo bada ashuur batal wa galgan. ³⁴ Howo kelim le homon, " Roho tai haznan shedid, hata daraja ta mutu. Geni takum heni wa sahir takum." ³⁵ Howoruwa gedam shweya, Yesuah dengiri tehet wa bada gi seli, iza kan mumkin keli saa de ruwa gedam min Howo. ³⁶ Howo kelim, " Ya Aba, Al Abu, kulu hajat mumkin le inta. shilu kubaya de min ana. Lakin ma irada tai, keli kun irada taki." ³⁷ Howo ja wa Howo ligo talamiz gi num, wa Howo kelim le Pitar, " Simon, inta gi num? Intum ma bi agdeeir ashan bi sahir wahid saa? ³⁸ Sahir wa seli takum ashan intum ma bi dakalu fi tejeriba. Fi al hagiga Roho neshit, wa lakin jesim deyief." ³⁹ Tani mara Howo ruwa ashan bi seli, wa Howo istakdim nefsa kelimat de. ⁴⁰ Zaman Howo reja, Howo ligo homon gi num, uyun tomon tegil, homon ma arufu homon bi kelimu shunu le Howo. ⁴¹ Yesuah ja dur nimra talata le homon wa Howo kelim, " Hal intum lesa gi num wa gi akudu raha? Kefaya! Zaman kalas ja. Ainu! Ibin Al insan be selimu le iden ta nas al khutaa. ⁴² Gum takum fok; keli nina ruwa. Ainu zol al gi ja selimu ana de biga gerib. ⁴³ Zaman Howo lesa kan gi wonusu, Yahuza wahid min talamiz Tuo, Ja, wa ma howo nas ketir indu seyuf wa asayat, homon ja min ruwasa al kuhana, al kataba wa al shuyuk.. ⁴⁴ Biga zol al gi selimu Howo de wodi le homon alama, gal, " Zol al ana amulu le gubla de yahu Howo, gubudu takum Howo. wa shilu takum Howo bi hisab." ⁴⁵ Zaman Yahuza ja, be sura keda howo ja le Yesuah wa kelim, "Rabbi," wa howo amulu gubla le Howo. ⁴⁶ Biga homon medu iden tomon le Howo wa gubudu Howo. ⁴⁷ Lakin wahid min homon al kan gi wogif jambu Yesuah tala seif wa gata adana ta kadam ta reis ta kuhana. ⁴⁸ Yesuah kelim le homon, "Intum ja gubudu ana, ze ana harami , intum ja ma seyuf wa asayat? ⁴⁹ Wa zaman al ana kan ma intum wa ana kan gi derisu fi Haikal intum ma gubudu ana. Lakin de kulu hasil ashan al muktub bi temu." ⁵⁰ Kulu nas al kan ma Yesuah jere wa sibu Howo barau ⁵¹ Wa kan fi weled shab yahu gi ruwa wara Howo, wa howo lebisu gumash al salau min shejera, ashan bi kati jesim Tuo Zaman asakir gubudu Howo . ⁵² Howo agela gumash Tuo wa Howo jere ariyan. ⁵³ Homon gedimu Yesuah le reis ta kuhana. wa homon kan lemu hinak kulu ruwasa ta kahana, wa al sheyuk wa al kataba. ⁵⁴ Wa kan Pitar gi ja wara Tuo min beyed lahadi fi bet ta reis ta kahana.Howo geni fi nus ta huras al ka gi dafi jambu nar. ⁵⁵ Biga reis ta kahana wa mejelis ta Yahud kulu kan gi fetisu shuhuda did Yesuah ashan homon bi agdeir katulu Howo. Lakin homon ma ligo ayi haja. ⁵⁶ Leanu fi nas ketir gedimu shuhudat al kezib did Howo, Lakin shuhuda tomon ma gi tafigu. ⁵⁷ Baad min nas wogif fok gedamu shehada al kezib Homon kelimu, ⁵⁸ " Nina asuma Howo gi kelim gal ana bi demeru haikal de al abenu bi iden wa ana fi talata ayam bi abenu tani al ma bi abenu bi iden.'" ⁵⁹ Lesa shehada tomon ma gi tefig. ⁶⁰ Reis ta kataba wogifu fok wa asalu Yesuah, " Inta ma gi juwabu? Kalam al nas de gi wonusu did inta?" ⁶¹ Lakin Howo kan gi askut wa Howo ma juwabu. tani mara reis ta kahana asalu Howo wa kelim, " Hal Inta al Mesi, Jena ta Al mubarak?" ⁶² Yesuah kelim, " Ana Howo; wa inta bi ainu Ibin al insan zaman kan Howo geni fi yemin ta guwa wa gi ja fi sehab ta sama." ⁶³ Reis ta kahana seritu gumas tuo wa kelimu, " Hal nina lesa muhtajiin le shuhudiin? ⁶⁴ Intum asuma tejdef de. Karar takum shunu?" Homon kulu hukumu Howo ze zol al bi istehig mutu. ⁶⁵ Baad min nas bada tofo buzak le Howo wa kati uwsa Tuo wa dugu Howo w kelimu le Howo, "Naba!" Asakir shilu Howo wa dugu Howo. ⁶⁶ Zaman Pitar kan fi bet al bi tehet, wahid biniya al kadam ta reis ta kahana ja le howo. Zaman hiya ainu Pitar gi dafi fi nar, ⁶⁷ Hiya ainu pitar tamam keda, wa hiya kelimu, "Inta kan ma Yesuah al Nasiri." ⁶⁸ Lakin howo anguru, wa kelim gal, " Ana ma arufu wala gi fahim kalam al inta gi kelim de." Yala howo bada ruwa fi safa bab.yala dek kore. ⁶⁹ Lakin biniya al kadam de ainu howo wa bada kelim tani mara le nas al kan gi wogif hinak, " Zol de kan ma nas Yesuah!" ⁷⁰ Lakin howo anguru tani mara. wa baad shuweya keda nas al kan gi wogifu hinak de kelimu le Pitar, " Hagiga inta wahid min homon, Leanu inta kaman Gelilee." ⁷¹ Lakin howo bada kutu nefsa tuo fi laanat wa halifu, " Ana ma bi arufu zol al intum gi kelimu an Howo de," ⁷² Be sura keda Dek bada kore le mara al tani, Biga Pitar gum zekir kelimat al Yesuah kan kelimu le howo: " Gubal Dek ma kore maratiin, Inta bi anguru ana .talata marat," wa biga howo waga tehet wa kore