¹ Biga Haggai al nebi wa Zechariah al nebi, jil ta Iddo, itnaba fi al isim ta al Allah ta Israil le al Yahud fi Yahuzah wa Arselim. ² Zerubbabel welet ta Shealtiel wa Jeshua welet ta Jozadak gam fok wa bada le abinu al bet ta Allah fi Arseim ma al ambia al asyidu umon. ³ Biga Tattenai al hakim ta al Wulaya Beyit al Bahar, Shethar-Bozenai, wa suraka tao ja wa kelim le umon, ''Munu wodi le itakum Karar le abinu bet de wa kalasu hetat delin?'' ⁴ Umon kaman kelim, ''Munu yau al asma ta al rujal al bi abinu mabna de?'' ⁵ Lakin ena ta Allah kan fogo al shiuk ta Yahudien wa adda tomon biga ma wogif umon. Umon kan bi istena le waraga le bi rasulu le al melik wa le karar le bi rijau le umon bekusus de. ⁶ De yau sura ta al juab ta Tattenai, hakim ta al Wulaya Beyit al Bahar, wa Shethar-Bonzenai wa suraka tao fi al Wolaya Beyit al Bahar, al umon rasal le Darius al melik. ⁷ Umon rasal kabar, katibu de le Melik Darius, ''Kede kulu salam geni le ita. ⁸ Kede al melik aruf gali nina rua le Yahudia le al bet ta al Allah azim. Uwo biga abinu ma hujar kubar wa kasabin kutu fi al hetat. Sokol de kalas biga amulu kulu wa bi rua gidam kuwes be idenat romon. ⁹ Nina asalu al shiuk, 'Munu wodi itakum karar le abinu bet de wa hetat delin?' ¹⁰ Nina kaman asalu umon asma tomon kida ita biga aruf al isim ta ayi rajil al gedimu umon. ¹¹ Umon juabu wa kelim, 'Nina yau kadamin ta al wahid al yau al Allah ta sama wa art, wa nina yau abinu bet de al kan abinu senawat wara zaman al melik azim ta Israil abinu uwo wa kalasu. ¹² Kefkan, zaman judud tanina zeilu al Allah ta sama, uwo wodi umon fogo al ida ta Nebuchadnezzar melik ta Babylonia, al Khaldien, al demiru bet de wa salu al nas fogo mihijar fi Babylonia. ¹³ Lakinkaman, fi al awel sena zaman Cyrus kan melik ta Babylonia, Cyrus sadar karar le rijau abinu al bet ta Allah. ¹⁴ Melik Cyrus kaman rijau al dahab wa hajat fida tabi le al bet ta Allah al Nebuchadnezzar kan jabu min al haikal fi Arselim le al haikal fi Babilon. Uwo rijau umon le Sheshbazzar, al uwo kan amulu hakim. ¹⁵ Uwo kelim le uwo, ''Silu hajat delin. Rua wa kutu umon fi al haikal fi Arselim. Kede al bet ta Allah biga rijau abinu inak.'' ¹⁶ Biga Sheshbazzar de ja wa kutu al asas le al bet ta Allah fi Arselim; wa uwo yau biga abinu, lakin yau lisa ma kalasu.' ¹⁷ Hasa kan uwo kuwes le melik, kede uwo biga hagigu/fetisu fi al bet ta al injazat fi Babilonia kan hukum min melik Cyrus mojud inak le abinu bet ta Allah de fi Arselim. Biga kede al melik rasulu karar tao le nina.