¹ Laman intum bi beled al yahwa Rabuna takum gi ruwa wodi le intum ze worisa, wa kan intum shilu beled de wa geni fogo, ² Intum bishilu juzu min awel intaj ta zara takula min kulu shekel altala min beled al yahwa Rabuna gi wodi le intum. Intum bikutu awel untaj de fi gufa wa shilu fi mahal al yahwa Rabuna takum bi azilu ashan bikun isim bitow fogo. ³ Intum biruwa le gesis al bikun fi kidma fi zaman dak wa kelim le huwo, ana bi eiterif alela le yahwa Rabuna taki inu ana kalas wosulu fi beled al yahwa kan halif le judud ta nina ashan biwodi le nina! ⁴ Gesis bishilu gufa min ida taki wa kutu gidam mazbah ta yahwa Rabuna taki. ⁵ Inta bikelim gidam yahwa Rabuna taki “jidu tai kan arami al ma indu mahal, huwo kan ruwa fi masir wa geni hinak, wan as bitowo kana dad tomon besit, hinak huwo biga zol azim, wa ta guwa, Kaman biga kutar. ⁶ Masiriin azibu anina wa amulu nina batal, umon kutu anina ishtakal shokol al saab. ⁷ Nina kan kore le yahwa Rabuna, abuhat ta nina wa huwa kan asuma le aswat ta nina wa ayinu azab ta nina, shokol wa deigat ta nina. ⁸ Yahweh kan tala nina bara min masir ma ida al gowi, wa kwafu al kebir, be alamat wa ajaeb, ⁹ Wa huwo jibu nina fi mahal de wa wodi le nina arid de, arid al maliyan ma leben wa asel. ¹⁰ Hasa ayinu, ana kalas jibu awel min intaj ta arid al inta yahwa, kalas wodi le ana. Inta bikutu hajat de tehet gidam yahwa Rabuna taki wa abidu gidam huwo. ¹¹ Wa inta bi arfa fi kulu al kwes yahwa Rabuna taki amulu le inta, le beit bitak, inta wa al lawi, wa ajnebi al fi nus bitakum ¹² Laman inta bikalasu wodi kulu ushur ta hajat ta zera taki fi sena nimira talata, de yau sena ta wodi ushur, inta bi wodi le lawi, wa le ajnebi, le atim, wa le armala, ashan umon bi akulu fi abwab ta medina wa bikun shabanin. ¹³ Inta bikelim gidam yahwa Rabuna taki, “ana kalas tala min beit kulu ushur ta yahwa, wa wodi umon le lawi, le ajnebi, le atim, wa le armala, hasab kulu wasaya al inta kan wodi le ana. Ana kan ma kasuru ayi min wasaya bitak, wala ana nesitu umon. ¹⁴ Ana kan ma akulu ayi wahid min hajat de fi zaman ta huzun tai, wa ana kan kutu humon fi mahal tani fi zaman al ana kan ma nedif, wala ana kan wodi ayi min ushur de ashan bikerimu ma kalam mutu. Ana kan asma le sot ta yahwa Rabuna tai, ana kan ehterim kulu haja al inta kan amiru ana ashan bi amulu. ¹⁵ Ayinu tehet min mahal al mokadas al inta geni fogo, min sama, wa bariku nas taki Israel, wa turab al inta wodi le nina kalas, ze inta kan halifu le abuhat ta nina, al arid al maliyan ma leben wa asel. ¹⁶ Alela yahwa Rabuna takum wodi awamir le intum ashan bi ehterim gawanin wa kararat, intum keli hafizu wa amulu umon ma kulu gulub takum wa ma kulu nefsa takum. ¹⁷ Intum kalas alinu alela gali yahwa yau Rabuna takum, wa gali intum bi douru fi turuk / sikat towo wa hafizu gawanin towo, wa wasaya towo, wa kararat towo, wa asma le sot towo. ¹⁸ Alela yahwa kalas alinu inu intum nas towo barawu wa kas, ze huwo kan waadu intum, wa Kaman bihafizu wasaya towo, ¹⁹ Wa huwo kutu intum bikun fok fi ras kulu umon ishaab al huwo kan kalagu, wa intum biligo mejid, shuhra, wa karama. Intum bikun nas al azilu barau le yahwa Rabuna takum, .bes ze huwo kan kelim