¹ Yala anina rija wa shilu rihilla ta nina sahara be sika ta bahar Sof, ze Yahwah kelim le ana; anina lifu Jebel seir ayamat ketir. ² Yahwah wunuso le ana, kelim, ³ 'Itakum lifu hawul jebel de kifaya; hawulu takum le dafa shamal. ⁴ Ammiru nas de, kelim le umon,'' Itkum bi ruwa mururu be huduod ta akuwana takum, iyal ta Esau, al bi geni fi Deir; umon bi kafu min itakum. Ashan kida kede itakum kutu bala kues ⁵ matakum shakila ma umon, ashan ana ma bi ruwa wedi le itakum ayi wata tumon, wele kifaya le batnna kura takum bi dusu; lannu Ana wedi jebel Seir miras le Esau. ⁶ Itakum bi biu akil takum min umon be gorosh, ashan itakum bi akulu; itakum kaman bi biu moyo be gorosh, ashan itakum bi ashrabu. ⁷ Ashan Yahwah Ilah takum bariku itakum fi shukul ta iden takum; Huwo aruf douria takum fi Sahara al azim. Lannu Yahwah Ilah takum kan fi ma itakum fi arbein sena, wa itakum kan ma ihtaj ayi haja.'' ⁸ Yala anina mururu be safa ta akuwana ta anina iyal ta Esau al gi geni fi Seir, safa sika ta Arabah, min Ailla wa min Assion Jaber. Yala anina rija wa muurube sika ta Sahara ta Moab. ⁹ Yahwah kelim le Ana, 'Matakum sibu nas ta Moab zalan, wa matkum shakila ma umon harib. Lannu Ana ma bi wedi le itakum beled tumon miras, ashan Ana wedi Ar miras le iyal ta Lot.' ¹⁰ (Emion geni hinak gobal kida, shaab ketir wa azim, wa tuwalin ze iyal ta Anak; ¹¹ de bardu be iddu umon Rafaain,ze Anakiin; lakin Moabin gi nadi umon Emmion. ¹² Hurrieen kaman kan geni fi Seir gobal kida, lakin iyal Esau gilibu umon. Umon truju umon min gidam tumon wa geni fi mahal tumon, ze ma Israel amulu le beled ta miras tuo al Yahwah wedi le umon.) ¹³ Hasa gom takum wa mururu wadi Zared.' Yala anina mururu fi wadi Zared. ¹⁴ Wa ayam al anina shilu min Gadish Berne lahadi anina wusulo le wadi Zared kan Temeniya wa teleteen sena. Kan fi zaman dak kulu rujal ta harib al fi nus nas de kulu mutu, ze Yahwah kan weri le umon. ¹⁵ Wa iden ta Allah kan did jeil dak ashan bi demiru umion min nus nas lahadi umon mutu. ¹⁶ Wekit nas al kan bi agder shakila de kulu mutu min nus nas, ¹⁷ Yahwah wunuso le ana wa kelim, ¹⁸ Aleela ita bi ruwa mururu be Ar be hudud ta Moab. ¹⁹ Kan ita bigga gerib ma Ammoniin, matakum amulu mushkula wele harib ma umon; lanu Ana ma bi wedi le itakum ayi wata ta Ammoniin miras le itakum; ashan Ana wedi uwu le iyal ta Lot miras.'' ²⁰ (Bardu de bi iddu beled ta Rafain. Rafain geni hiak gobal kida- Ammoniin bi nadi umon Zamzummin ²¹ nas Kubarin wa ketirin wa tuwalin ze Anakiin. Lakin Yahwah demiru umon min gidam ta Ammoniin, wa umon truju umon wa geni fi mahal tumon. ²² Yahwah bardu amulu nefsa haja le iyal ta Esau, al hi geni fi Seir, wekit Huwo demiru Horriin min gidam tumon, wa iyal ta Esau truju umon wa geni fi mahal tumon lahadi yom ta aleela. ²³ Ze Awuiin al geni fi gura ta Gaza, Nas Kaftorion, al ja min Kaftor demiro umon wa geni fi mahal tumon.) ²⁴ Hasa gomtakum wa rahalu takum wa mururu takum be jebel Arnon; ayinu takum Ana selimu Sihon al Amori, melik ta Hashbon, wa beled le iden takum. Badatakum shilu beled de, wa shakila takum ma huwo. ²⁵ Aleela Ana bi bada kutu kuf fi kulu nas al bi geni tihit sama; umon bi asuma akbar an itakum umon bi kafu min gidam takum.' ²⁶ Ana rasulu nas min rusol min sahara ta Gadimut le Sihon, melik ta Hashbon, be kelima ta salam, gi kelim, ²⁷ 'Kede ana mururu be beled taki; Ana bi ruwa fi sika tai; Ana ma bi lifgu shamal wele yemin. ²⁸ Itakum bi biyo le ana akil be gurush, ashan ana bi akulu; itakum bi tebiyo le ana moyo be gurush, al ana bi ashurubu; bes kede ana mururu bi kura tai, ²⁹ ze ma iyal ta Esau al bi geni fi Seir, wa Moabiin al bi geni fi Ar, amulu le ana; lahadi ma ana wusulo le Urdon le beled al Yahwah Ilah ta nina bi wedi le anina.' ³⁰ Lakin Sihon, melik ta Hashbon, ma bi sibu anina mururu be sika tuo; lanu Yahwah Ilah takum kufulu muok tuo wa sibu geliba tuo tala gowi, ashan huwo bi gilibu huwo be gowa takum. al huwo amulu aleela. ³¹ Yahwah kelim le ana, 'Ayinu, Ana bada selimu Sihon ma beled tuo gidam takum; bada takum shilu beled de, ashan itakum bi werisu beled tuo.' ³² Yala Sihon tala bara did anina, huwo ma nas tuo kulu, ashan bi shakila fi Yahis. ³³ Yahwah Ilah ta nina silmu huwo le anina wa anina gilibu huwo wa iyal tuo wa nas tuo kulu. ³⁴ Anina shilu mudon tuo kulu fi zaman dak wa demiro ayi medina- rujal wa nuswan wa iyal sukerin; anina ma sibu zol hai. ³⁵ Bes Bahaiim yao anina shilu ze ganima le nifus ta nina, sawa ma ganayim ta mudon tanin al anina shilu. ³⁶ Min Aroer, al fi nihaya ta wadi Arnon, wa min mudon al fi wadi, be sika taki le Jalaad, mafi medina la kan saab le anina. Yahwah Ilah ta nina selimu umon fi iden ta nina. ³⁷ Bes le beled ta iyal ta Ammon al itakum ma ruwa fugu, wa kulu safa ta bahar Yabbok, wa mudon ta jibal -al Yahwah .Ilah ta nina aboso anina ma bi ruwa fugu