¹ Bat al muzaharat kan kalasu, Bulis rasal le al talamis wa bat uwo seja umon, uwo kelim wada wa rua le safar le Makadonia. ² Zaman uwo kan musafir abri akalim dak wa kan wonusu kilimat ketir ta tesji le umon, uwo ja le Yunan. ³ Bat uwo kan gedi talata sahar inak, al moamara kan kowunu did uwo ma al Yahudin ze ma uwo kan kalas musafir le Suria, be kida uwo karir le ruju abri Makadonia. ⁴ Nas al gedimu uwo beid lakadi Asia kan Sopater weled ta Pyrrhus min Berea; Aristarchus wa Secundus, umon kulu mominin min Thessalonica; Gaiua ta Derbe; Timasaus; wa Tychicus wa Trophimus min Asia. ⁵ Lakin rujal del kan rua gabli nina wa kan ki istena le nina fi Troas. ⁶ Nina safir bara min Philippi bat al ayomn ta Id al kubs al ma kutu kemira fogo, wa fi kamsa ayom nina ja le umon fi Troas. Inak nina geni saba ayom. ⁷ Fi awel yomta al isbu, zaman nina kan limu sawa le kasuru kubs, Bulis wonusu le al muminin. Uwo kan katitu le safar yom al tani, wa kida uwo istemir wonusu lakadi nus lel. ⁸ Inak kan fi anuwar fi gurfa al fok makan al nina kan limu sawa fogo. ⁹ Fi al subak kan bi geni al raji sab ismu Eutychas, uwo kan fi num shedid. Ze Bulis kan gi wonusu zaman towil, rajil al sab de, lisa gi num, waga tehet min tabik nimra talata wa kan arfau fok biga mutu. ¹⁰ Lakin Bulis nezil tehet, midu nefsa tou le uwo, wa amsuku uwo. Biga uwo kelim, "Mata kun geni haznanin aktar kalas, lianu uwo biga haiy." ¹¹ Biga uwo ruwa fok tanimara wa kasuru al ees wa akulu. Bat wanasa ma umon fetera towil kalis lakadi gerib sabah, uwo safar. ¹² Umon jibu al weled de wara hai wa kan azi umon shedid. ¹³ Nina be nufusna rua gidam ta Bulis ma sefina wa safir bara le Assos, inak nina katit le silu Bulis fok ma nina. De yau sunu uwo be nefsa tou azu amulu, ashan uwo katit le rua be tehet. ¹⁴ Zaman uwo gabilu nina fi Assos, nina silu uwo fi juwa al sefina wa safir le Mitylene. ¹⁵ Biga nina safir min inak wa wosulu fi yom al tani aksi al jezira ta Khios. Yom al badu nina wosulu fi al jezira ta Samos, wa bat yom nina ja le al medina ta Miletus. ¹⁶ Fa Bulis kan kariru le safar abri Ephesus, kida gali uwo ma bi silu zaman fi Asia; fa uwo kan mustajil le ashan bekun fi Urshelim le al yom al Kamsin, iza be gudra be kulu mumkin le uwo le amulu kida. ¹⁷ Min Mietus uwo rasulu rujal le Ephesus wa ashan bi nadi shiuk ta kenisa le gabilu ma uwo. ¹⁸ Zaman umon kan ja le uwo, uwo kelim le uwmon, "Itakum be nefsa takum aruf, min awel yom gali Ana kutu kura fi Asia, kef Ana daiman bi gedi zaman tai ma itakum. ¹⁹ Ana gi akdim le Rabana ma kulu basata ta fikra wa ma moyo ena, wa fi taab al hasil le ana ashan al muamarat ta al Yahudin. ²⁰ Itakum aruf kef Ana ma rija wara min alinu le itakum ayi haja al kan kuwes, wa kef Ana derisu itakum fi gidam nas wa min bet le bet, ²¹ gi sahidu le kulu Yahudin wa Yunanien an tauba nahua Allah wa ta iman fi Rabana ta nina Yesua al Mesih. ²² Hasa ainu, Ana gi rua le Urshelim, silu ma al Roho, ma aruf sunu bi hasil le ana inak, ²³ ile gali al Roho Kudus bi ashad le ana fi ayi medina gali genzir wa ataab gi istena ana. ²⁴ Lakin Ana ma gi gedir haya tai mohim le nefsa tai, iza bes Ana bi agder kalasu al munafasa wa kamilu al kidma al Ana akudu min al Rabana Yesua, le sahidu le al injil ta al naima ta Allah. ²⁵ Hasa ayinu, Ana aruf gali itakum kulu, fi nus delin Ana rua hawli be alinu al molokut, ma bi ayinu usa tai tani mara. ²⁶ Ashan kida Ana gi ashad le itakum fi yom ta alela, gali Ana berie min al dom ta ayi zol. ²⁷ Fa Ana ma gasir wa akir waramin alinu le itakum al kulu irada ta Allah. ²⁸ Ashan kida kelikum harisn an nufustakum, wa an kulu al korufan ta yatu al Roho Kudus kalas amulu itakum mosulin. Keli kum harisin le hafisu al kenisa ta Allah, al uwo istaraw ma dom bi tou. ²⁹ Ana aruf gali bat rua tai, morofoinat al batalin bi ja fi nus takum wa ma bi arham al korufan. ³⁰ Ana aruf gali min hata fi nus takum juzu min rujal bi ja wa karabu al hag ashan juru bara al talamis wara umon. ³¹ Be kida keli kum harisin. Zekir gali le fetera ta talata senawat Ana ma wogif derisu kulu wahid min itakum ma moyo ena bilel wa nahar. ³² Hasa Ana sibu itakum le Allah wa le al kelima ta neima tou, al bi agder le abinu itakum fok wa le wodi itakum al worisa wasat kulu delin al kalas biga tahiru. ³³ Ana ma indi neya le dahab, fida, au gumasat. ³⁴ Itakum be nefsa aruf gali idenat de kadimu ihtiajat ta nefsa tai wa al ihtiajat ta delin al ma ana . ³⁵ Fi kulu hajat Ana wodi misal ta kef itakum bi saidu al daiif ma sokol, wa le kef itakum bi zekiru al kelimat ta Rabana Yesua, kelimat al uwo be nefsu kelim: ' Barakat ketir fi wodi min al le akudu." ³⁶ Bat uwo kan wonusu be teriga de, uwo raka tehet wa seli ma umon. ³⁷ Inak kan fi kore shedid wa umon hadinu Bulis wa gabilu uwo. ³⁸ Umon kan haznanin ketir be kulu ashan le sunu al uwo kan kelim, gali umon ma bi ayinu usa tou tani mara. Biga umon gedimu uwo le al sefina.