¹ Wa hasil inu zaman Abulus kan fi Kurunsus, Bulus baat ma mururu be safa ta manatig al fuk, uwu ja le medina ta Afasus w, wa ligu talamis hinak. ² Bulus asalu umun, ''Hal itakum akudu Roho al Kudus wekit itakum amin? Umun wunuso le uwu, ''Lala, inna zatu ma asuma an Roho al akudus.'' ³ Bulus asalu, ''Taib amidu itakum be shunu? Umun kelim, ''Be mamudia ta Yuhanna.'' ⁴ Bulu juabu, Yuhanna Amidu be mamudia ta tuba. Uwu weri le nas inu kede umun amin fi de al bi ja baad uwu, de yau Yesua.'' ⁵ Zaman nas asuma, amidu umun fi isim Rabana Yesua. ⁶ Wa zaman Bulus wedi idda tuo fugu umun, Roho al Kudus nezil fugu umun wa umun wunuso alsina wa itnaba. ⁷ Wa adad tumun bi wusulu itinashar rujal. ⁸ Bulu ruwa fi majama wa kan bi wunuso le fetera ta talata shuhur, wa bi agna umun an mulukut ta Allah. ⁹ Lakin wekit baat min Yahud gowi geliba ma der asuma, umun bada wunuso sher an gidan ta jumhur. Bulus sibu umun wa shilu talamis min uwu, bi derisu umun kulu yom fi mederesa ta zol isim tuo Tiranus. ¹⁰ Istemir le fetera ta senaten, laman delin kulu al bi geni fi Asia asuma kalam t Rabana, Yahud wa Yunanin. ¹¹ Allah kan bi amulu hajat azim be wasat ta Bulus, ¹² hata mendil tuo al uwu bi nedifu beu kan bi shilu le nas al ayanin wa ayanat tumun bi aliju wa roho al sherir bi tala min umun. ¹³ Lakin kan fi Yahud nas ta sihir al bi safir be sika ta mentika. Umun bi nadi be isim ta Rabana Yesua ashan umun bilgu gowa fi ras roho al sherir wekit umun wunuso, ''Be isim ta Yesua al Bulus bi beshiru beu, Ana bi amiru ita tala bara.'' ¹⁴ Rais ta Kahana al isim tuo kan Sakauwa, eyal tuo al saba de yau kan bi amulu hajat de. ¹⁵ roho al sherir juabu umun, ''Ana arufu Yesua, wa Bulus ana arufu; lakin itakum nas munu?'' ¹⁶ Al roho al sherir al fi zol de gum wa gilibu nas de wa fugu nas umun. Umun jere min baet dak ariyanin wa muaugin. ¹⁷ Kalam de biga maruf le nas kulu, le Yahud wa Yunanin al bi geni fi Afasus. Umun kafu, wa isim ta Rabana Yesua akrimu. ¹⁸ Bardu, ketirin min muminin ja wa iterif wa weri hajat al kaab al umun amulu. ¹⁹ ketirin al bi amulu sihir jibu kutub tumun sawa wa aragu umun kulu gidam ta nas kulu. Wekit umun iddo tamad ta hajat de, wusulu kamsin alf fida. ²⁰ Wa kalam ta Rabana inteshir be gowa. ²¹ Hasa baat Bulus timu kidima tuo fi Afasus, uwu kariru fi Roho tuo ashan bi mururu be Makadunia wa Akaiya fi sika tuo le Urshelim; uwu kelim, ''Baat kan ana ruwa hinak, Ana lazim bi ayinu Romia. ²² Bulus rasulu itenin min musaidin tuo le Makadunia, Timusaus wa Arastus, al saidu uwu. Lakin uwu geni fi Asia le fetera. ²³ Wa fi zaman dak kan fi muzaharat hasil fi Afasus be kusus teriga tumun. ²⁴ Lanu fi insan isim tuo Dimitrus, al bi amulu hayakil ta fida le artamis, bi jibu le uwu maksab ketir. ²⁵ Uwu limu nas kulu al bi amulu shukul de wa kelim le uwu, ''Ya rujal, itakum arufu inu inna bi ligu gurush ketir min shukul de. ²⁶ Itakum asuma wa ayinu, ma bes fi Afasus, lakin tegriben Asia kulu, Bulus de beshiru wa gairu nas ketir. Uwu bi wunuso inu mafi rabunat al amulu ma idda. ²⁷ Ma bes katar inu tijara ta nina ma bi rudu, lakin haikal ta ilaha ta nina al kebir Diana bi ayinu ma indu faida. Wa hiaya bi fagidu shukul kebir tuo, hiaya al Asia kulu wa alam kulu bi abudu.'' ²⁸ Wekit umun asuma kalam de, umun kan mala be zalan wa kure, kelim, ''Azim uwu Diana (artamis) ta Afasus.'' ²⁹ Medina kulu mala be teshwish, wa nas jere sawa le mashehad. Umun gubudu sabihat ta Bulus al bi safir ma uwu, Gaius wa Arestus, al ja min Makadunia. ³⁰ Bulis der dakalu fi nus al jumhur ta nas, lakin al talamis abusu uwo. ³¹ Kaman, juzu ta al muazifin ta al muhafasa ta Asia al kan asdika tou rasulu le uwo risala gi asalu uwo kede ma dakalu le munasa. ³² Juzu min nas kan gi kore wahid haja, wa tanin tani barau, fa al jumhur kan fi toswis. Agalabia minum ma bi aruf le umon kan ja sawa ma bat. ³³ Baad min jumhur nasihu Iskandar, al kan Yahudin bi lizu . Iskandar ashiru be idda tuo der difa nefsa tuo gidam ta shaab. ³⁴ Lakin wekit umun arufu inu uwu Yahudi, umun kulu kure be sout wahid le muda ta saa kamil, bi wunuso, ''Azima Rabuna ta Artamis.'' ³⁵ Zaman umda al madina kan sakitu al jumhur, uwo kelim, "Itakum rujal ta Ephesus, de yatu rajil al ini uwo ma bi aruf gali al medina ta al Ephesien yau gi hafisu haikal ta Artemis al azim wa ta sura al kan waga tehet min samawat? ³⁶ Ayinu takum biga gali hajat del ma bi anguru, itakum afrud kede askut wa ma amulu haja be istijal. ³⁷ Fa itakum kalas jibu rujal del le mahkama de umon la nyakamu al haikal wele al mujedifin ta rabanat na. ³⁸ Ashan kida, iza Demetrius wa al rujal al nahatin umon al kan ma uwo indu al tuhuma did ayi wahid, al mahkama moftu wa fi hukam inak. Kede umon isteki badun tomon. ³⁹ Lakin iza takum gi fetisu ayihaja an mowadi tanin, bi hillu badin fi al jemeiat al adi. ⁴⁰ Uwo hagiga nina kalas biga fi kutura ta tuhuma an yom ta muzahara de. Mafi ayi sabab le adam nizam de, wa nina ma bi agder kelim wadih." ⁴¹ Zaman uwo kan kelim zede, uwo ferteku al jemeia.