¹ Eico taukwete nangu cimo icakuipokolwelako, webo wemuntu, weupingula, pantu ifyo upingula umbi uleipela imilandu wemwine. ² Pantu webo weupingula ucita fimo fine. Nomba twalishiba ukuti ubupingulo bwakwa Lesa bukonka mucishinka ilyo bwaponena kulyabo abacita ififintu. ³ Lelo tontonkanya palifi, iwe wemuntu, weupingula abacita ififyonse nobe wine ucita fimofine, Bushe ukapusuka kubupingushi bwakwa Lesa? ⁴ Nangu utontonkanya panono pabucindami bwabusuma bwakwe, nokulolela ukupanika, nomucetekanya wakwe? Bushe walishiba ati ubusuma bwakwe bwabelako ukukutungulula kukulapila? ⁵ Lelo nikulibunkosa mitwe bwenu nokukana lapila kwamitima yenu eko muleisungila mwebene icipyu pabushiku bwacipyu, ubo, ebushiku bwakusokolola ubupingushi bwakwa Lesa ubwalungama. ⁶ Akabwesesha kuli cilaumo ukulinga nemilimo yakwe: ⁷ Kulyabo ukulingana nokushipikisha, imilimo iisuma ikabila ukutashiwa, ululumbi, nokukana bola, akapela umweo wamuyayaya. ⁸ Lelo kulyabo abaitwa, abashinakila cishinka lelo banakila icishalungama, icipyu necifukushi icili nokwisa. ⁹ Lesa akaleta amacushi nokucucutika pamuntu onse uucita ifyabipa, ukubalilapo abaYuda elo naba giliki. ¹⁰ Lelo ubukata, umucinshi, nomutende ukesa pali bonse abacita ifisuma, ukubalilapo abaYuda, nakuba giliki. ¹¹ Pantu takwabako akapatulula kuli Lesa. ¹² Abo bonse ababembuka ukwabula amafunde nabobene bakanaika ukwabula amafunde, ala nabonse ababembuka kumulandu wamafunde bakapingulwa namafunde. ¹³ Pantu tebakomfwa abefunde ababulungami pacinso cakwa Lesa, lelo nibakacita befunde abakalungamikwa. ¹⁴ Nomba abena fyalo, abashakwata ifunde, ukukonka necifyalilwa bacita fintu ifyamafunde, bena lifunde kubene beka, nangu tabakweto ifunde. ¹⁵ Palifi balanga ukuti imicitile ifwaikwa mwifunde yalilembwa mumitima yabo. Kampingu wabo alabemininako bukambone, namatontonkanyo yabo yalabapela imilandu nangu ukubapokololako nakubene beka ¹⁶ nakuli Lesa wine. Ifyo fikacitika ubushiku ilyo Lesa akapingula abantu bonse kufyankama fyabo, ukulingana nembila nsuma yandi, ukupitila muli Yesu Klisitu. ¹⁷ Nomba ngawaita ukweba ati uli muYuda nokushintilila pefunde nokuyumfwa muli Lesa, ¹⁸ nokwishiba ukufwaya kwakwe nokushininkisha ukwishiba icisuma pamulandu wakukonka ukufuma mwifunde; ¹⁹ ngacakuti uleitunga ukutungulula impofu, ulubuto kulyabo abali mumfifi, ²⁰ intungulushi shabawelewele, kafundisha wabana banono, ifi efyo mwakwata mwifunde ukuba ngamano necishinka, ngefi fifulunganya shani ifyo umuntu ekala umweo wakwe? ²¹ Imwe mwebafunda bambi, bushe mulaifunda mwebene? mwebashimikila pakukana iba, bushe muleba? ²² Imwe mwebalanda ukwebati mwilacita ubucende, bushe mulacita ubucende? mwebo mwebapata utulubi, bushe mulebila amatempele? ²³ Mwebo mwebaitakisha mwifunde, bushe mulasusha Lesa pakutoba ifunde? ²⁴ Pantu, "Ishina lyakwa lesa lilatukwa kubena fyalo pamulandu wenu," ngefyo calembwa. ²⁵ Pantu ukusembululwa kwabukumu kuli mwebo ngacakuti mwakonka ifunde, lelo ngacakuti mwakana ukukonka ifunde, ukusembululwa kwenu kwaba ngokukana sembululwa. ²⁶ Ngecakucita umuntu ushasembululwa akonka ifilefwaikwa pefunde. Tabe ngoushasembululwa abangowasembululwa? ²⁷ Bushe ushasembululwa kucifyalilwa takakupele imilandu? Ici nipamulandu wakweba ati walikwata amafunde ayalemwa nokusembululwa, lelo niwe katoba wamafunde! ²⁸ Pantu temuyuda uli ngomuyuda wakunse; nangu ukusembululwa ukucitwafye kunse yamubili. ²⁹ Nomba umuyuda mukati, nokusembululwa kwamumutima, nakumupashi, teulya uwakutampa. Ukutasha kwaulya muntu takufuma kubantu lelo kuli Lesa.