¹ Elo namwene iciswango cilefuma pali bemba. Cakwete insengo ikumi nemitwe cinelubali. Pamulu wansengo pali ifibalika ikumi limo, napamutwe onse pali ishina lyamiponto. ² Iciswango namwene cali kwati nimbwili. Amolu yaciko yali kwati makasa yacibuli, nakanwa kaciko kwati kanwa kankalamu. Necing'wena capele iciswango amaka, icipuna cabufumu, nensambu shakutungulula. ³ Umo pamitwe yaciswango wakwete ukucenwa icilonda icikulu, lelo icilonda cilya icikulu calipolele. Necalo conse capapile ilyo calekonka iciswango. ⁴ Nabonse bapepele icing'wena, pantu calipele insambu kuciswango. Bapepele iciswango, nabo, nokutwalilila ukulanda ati, "Nani waba ngeciswango?" kabili nani engalwa naco?" ⁵ Iciswango capelwe akanwa akakulanda amashiwi wacilumba nayamiponto. Capelwe ukulanga insambu pamyenshi ine-nenshiku shitatu. ⁶ Elo iciswango caiswile akanwa kukusosa ifyamiponto kuli Lesa-ukupontela ishina lyakwe, nencende ekalako, nabonse abekala mumulu. ⁷ Neciswango capelwe amaka kukulwa nabantu bamushilo abakwa Lesa kukubacimfya. Kabili, insambu shapelwe kuli cena pabamitundu, kubantu, kundimi, nakucalo. ⁸ Nabonse abekala pacalo bakacipepa, uyo onse uyo ishina lyakwe talyalembwa, ukufuma kukubumbwa kwesonde, mwibuku lyamweo, ilyamwana wampanga uwaipaiwe. ⁹ Ngoumo ali namatwi, naomfwe. ¹⁰ Ngaumo asendwa muli bunkole, mulibunkole emo akaya. Ngaumo aipaiwa kulupanga, nakulupanga eko akepaiwa. Pano epali ukushipikisha kwakushipa necicetekelo cabantu bamushilo abakwa Lesa. ¹¹ Kabili namwene iciswango nacimbi cilefuma mucalo. Cakwete insengo shibili, calelanda ngecing'wena. ¹² Calangile insambu shonse ishaciswango cantanshi mukusangwapo kwaciko, kabili calengele icalo nabonse abekalamo ukupepa iciswango cantanshi-Ico ico icilonda calinacipona. ¹³ Cacitile ifipapusho ifyamaka. Calengele nomulilo ukuponena pacalo ukufuma kumulu pamenso yabantu. ¹⁴ Kufilangililo capelwe amaka kukubombela iciswango, caongwele bonse abekala pacalo, nokubeba ukupanga icimpasho caciswango-icacenenwe kulupanga, nomba cali momweo. ¹⁵ Casuminishiwe ukupela umweo kucimpasho caciswango pakulenga icimpasho cilande nokulenga bonse abakana ukupepa iciswango bengepaiwa. ¹⁶ Capatikishe bonse, abasulwa nabamaka, abakankala nabapina, abasha nabakaele, ukupokelela ululembo kukuboko kwakukulyo nangula pampumi. ¹⁷ Kabili cali icakosa umuntu onse ukushita nangu ukushitisha kanofye uyo onse uwakwete ululembo lwaciswango, ululi, nimpendwa iyileimininako ishina lwakwe. ¹⁸ Ici cilekabila amano. Ngomuntu nakwata ilango, lekeni asange impendwa yaciswango. Pantu nimpendwa yamuntu. Impendwa yakwe ni 666.