¹ Panuma Yesu alandile ifi fintu, ainwine amenso yakwe nokulolesha mumulu nokulanda ati, ''Taata, inshita naisa, tatakuleni umwana wenu pakuti umwana wenu akamitatakule- ² Pamo ndefyo mwamupela amaka pabantunse bonse pakuti akapele ubumi bwa kutwalilila kuli bonse abo mwa mupela. ³ Ubu bumi bwakutwalilila: Pakuti dishibe, Lesa umofye uwacishika, nountu mwatumine, Yesu Kristu. ⁴ Na kutatakula pa calo. Nimpwisha nemilimo iyo mwampele uku bomba. ⁵ Nomba, Taata, ntatakuleni nobukata bwenu ubo na kwete namwebo elo icalo tacila pangwa. ⁶ Na sokolwele ishina lyenu kubantu abo mwampele ukufuma pa calo. Bali benu, nokubapela kuli nebo, nokusunga ishiwi lyenu balisunga. ⁷ Nomba baishiba ati ifili fyonse fintu mwampela filimukufuma kuli mwebo, ⁸ Pantu ifyo nakwata ukubapa mashiwi yonse yantu mwampele. baliya pokele na mucishinka balishibe ati nafumine kuli mwebo, nokucipokelela ati nimwebo mwantumine. ⁹ Nabapepelela. Nshipepelele icalo lelo abo bonse abo mwampela, apo benu. ¹⁰ Ifili fyonse fyandi nobe fyobe, nefyobe fyandi, nafitatakwilwa mulibena. ¹¹ Nshili mu calo, nomba aba bantu bali mu calo, ndimukwisa kuli mwebo. Taata wamushilo, basungeni mwishina lyenu ilyo mwampela pakuti bakabe bamo, ndefyo tuli buumo. ¹² Elo nali nabena, nabasungile bwino mwishina lyenu lintu mwampela. Nalibacingilile, tapali uli onse mulibena uwa onawilwe, ukufumyako umwana wa bonaushi pakuti amalemo ya fikilishiwe. ¹³ Nomba ndimukwisa kuli mwebo, lelo ndimukulanda ifi fintu mu calo pakuti bakakwate insansa shandi shikafikilishiwe muli bena. ¹⁴ Nimbapela ishiwi lyenu, ne calo calibapata pantu tali kucalo, ndefyo nebo nshili wa kucalo. ¹⁵ Nshilemyeba ukubasenda ukubafumya mu calo, lelo imwe kubasunga bwino nokubacingilila kumulwani. ¹⁶ Tabali bapano calo, ndefyo nebo nshili wapa calo. ¹⁷ Bapatuleni ku cishinka cenu. Ishiwi lyenu lyacishinka. ¹⁸ Ndefyo nebo mwantumine mucalo, efyo nanebo nabatuma mucalo. ¹⁹ Pantu kumulandu wabena naipatulako, pakuti nabo baipatuleko mucishinka. ²⁰ Tali aba beka napepela, lelo bonse abakasumina muli nebo ukupitila mwishiwi lyabo. ²¹ Pakuti bonse bakabe umo, nga mwebo, Taata, muli nebo na nebo ndimuli mwebo. Nabo bene babe muli fwebo pakuti icalo cikasumine ati mwalintumine. ²² Ubukata ubo mwampele, Nimbapela, pakuti bakabe umo ndefyo fwebo tili umo: ²³ Ndi mulibena, namwebo muli nebo- pakuti baleitwa pamo mukwi katana ukwapwililika, pakuti icalo cikeshibe ukuti mwali ntuma, nokubatemwa ndefyo nebo mwatemwa. ²⁴ Taata, ndimukufwaya balya mwampela babe nanebo kuntu ndi, nokumona ululimbi lwandi, ululumbi mwampele pantu mwalintemwa lintu umufula wa calo taulabako. ²⁵ Taata mweba lungami, icalo tacamishiba, lelo nalimishiba; naba balishiba ati mwalintumine. ²⁶ Napangile ishina lyenu ukwishibikwa kuli bena, elo nkalipanga ilyakwishibwa pakuti icitemwiko mwankwatila cikabe muli bena, nanebo nkaba muli bena.''