¹ Dingsanak-dingsanak saurang tahu bahwa kada sia-sia kami baelang ka wadah ikam. ² Walaupun kami mandarita sabalumnya, nang kaya ikam tahu, dianiaya wan dihina di Filipi, kami wani di dalam Allah gasan mahabarakan Injil* Allah ka ikam di tengah banyaknya parlawanan. ³ Sabab, nasihat kami bukan barasal matan kasasatan, katidakmurnian, atawa matan kapalsuan, ⁴ tapi sabagaimana kami sudah di satujui Allah gasan diparcayakan Injil, kaya itulah kami baucap, bukan gasan mahimungakan manusia, malainkan gasan mahimungakan Allah nang manguji hati kami. ⁵ Kami kada suah datang lawan pandiran nang marayu, kaya nang ikam tahu, atawa lawan dalih demi kasarakahan -- Allah adalah saksi kami. ⁶ Kami jua kada mancari pujian matan manusia, baik matan ikam atawa matan urang lain, meskipun sabagai rasul-rasul Kristus, kami kawa manuntutnya matan ikam. ⁷ Sabaliknya, kami basikap lamah lambut di antar ikam, kaya saurang uma nang mangasuh wan marawat kakanakan inya saurang. ⁸ Jadi, dalam kasih sayang nang besar ka ikam, kami handak manjulung ka ikam bukan haja Injil* Allah, malainkan hidup kami saurang karana ikam sudah sangat kami kasihi. ⁹ Sabab, ikam ingat, dingsanak-dingsanak, usaha wan kerja keras ikam, kaya apa kami bagawi siang wan malam supaya kami kada manjadi beban gasan ikam samantara kami mahabarakan Injil* Allah gasan ikam. ¹⁰ Ikam adalah saksi-saksi, wan Allah jua, betapa suci, bujur, wan kada bacelanya kami hidup di antara ikam nang parcaya. ¹¹ kaya ikam tahu, kami manasihati, mahibur, manyuruh ikam saurang-saurang, kaya saurang ayah ka anak-anaknya saurang, ¹² supaya ikam hidup sasuai lawan kahandak Allah, nang mangiau ikam ka dalam karajaan wan kamuliaan Sidin saurang. ¹³ Ikam jua rancak basyukur lawan Allah gasan hal ini, bahwa waktu ikam manyambut firman Allah, nang ikam dangar matan kami, ikam manyambutnya bukan sabagai pandiran manusia, malainkan sabagaimana nang saharusnya, yaitu pandiran Allah, nang rahatan bagawi di antara ikam, urang-urang parcaya. ¹⁴ Dingsanak-dingsanak, ikam sudah manjadi urang-urang nang manaladani jamaat-jamaat Allah dalam Yesus Kristus nang ada di Yudea karana ikam jua sudah maalami pandaritaan nang sama, tumatan urang-urang sabangsa ikam saurang, nang kaya buhannya alami matan urang-urang Yahudi ¹⁵ nang sudah mambunuh Tuhan Yesus wan jua para nabi* jua mausir kami. Buhannya kada mahimungakan Allah mamusuhi sabarataan urang. ¹⁶ Buhannya mahalangi kami bapandir lawan urang-urang lain Yahudi supaya buhannya kawa disalamatakan. Kaya itulah buhannya tarus mahibaki dosa buhannya, tapi murka sudah turun atas buhannya sepenuhnya. Kahandak Paulus gasan Maelangi Lagi Jemaat Tesalonika ¹⁷ Dingsanak-dingsanak, imbah gasan beberapa waktu kami dipisahakan matan ikam -- secara fisik, bukan secara roh -- kami kaganangan banar wan handak batamuan lawan ikam. ¹⁸ Sabab, kami hadak datang ka ikam, bahkan ulun, Paulus, sudah babarapa kali, tapi Iblis mahalangi kami. ¹⁹ Sabab, siapakah harapan, sukacita, atawa mahkota kabanggaan kami di hadapan Tuhan Yesus pada kadatangan Sidin? Bukankah ikam? ²⁰ Ikamlah kamuliaan wan sukacita kami.