¹ Nang kaya itu jua pian, bini-bini, maasilah lawan laki pian. Sabab, amun antara buhannya ada nang kada taat lawan Firman, buhannya kawa dimanangakan ulih kalakuan bininya kada lawan pandiran, ² sabab buhannya malihat liwar murni wan tapandangnya sikap pian. ³ Janganlah kalangkaran pian barasal matan hiasan luar wara, misalnya mengepang rambut, mamakai parhiasan, atawa mamakai baju nang larang-larang. ⁴ Sabaliknya, handaklah kalangkaran pian barasal matan dalam batin, nang kada kawa layu, barasal matan roh nang lamah lambut wan tanang . Ngitulah nang baharga di mata Allah. ⁵ Sabab, nang kaya nitu binian-binian kudus matan zaman bahula, nang maandak harapan lawan Allah, malangkari diri; dengan cara maasi wan lakinya. ⁶ Kaya ngitu jua Sara maasi wan lakinya, Abraham, wan mangiaunya 'tuan'. Pian adalah anak Sara amun pian baulah baik wan kada dikuasai ulih rasa takutan. ⁷ Wan kaya ngitu jua pian, buhan laki, , baganalah wan bini pian lawan panuh pangartian. Hurmatilah buhannya sabagai ahli waris dalam manarima anugerah hidup supaya doa-doa pian kada tahalang. ⁸ Akhirnya, handaklah pian barataan baisi kasatuan pamikiran, balas kasih, kasih padingsanakan, hati nang lamah lambut wam karandahan hati. ⁹ Kada usah mambalas kajahatan lawan kajahatan atawa makian lawan makian. Labih baik, pian mambari barkat sabab gasan ngitulah pian dikiaw, yaitu supaya pian mawarisi barkat. ¹⁰ Sabab Kitab Suci memadahkan, "Siapa nang mancintai, wan handak malihat hari-hari nang baik, harus manjaga pandiranny dari kajahatan, wan muntungnya dari tipu muslihat. ¹¹ Inya jua kada usah baparak wan nang jahat tapi manggawi nang baik. Handaknya inya mancari pardamaian wan bausaha manyasahnya. ¹² Sabab, mata Tuhan maitihi urang nang bujur, wan talinga Sidin mandangari doa buhannya. Tapi, muha Sidin manantang urang nang baulah kajahatan. "Mazmur 34;13-17" ¹³ Siapa nang pacangan mancalakai pian amun pian rancak maulah kabaikan? ¹⁴ Tapi, amun pian harus marista gasan kabanaran, maka pian pacangan diberkati. "Kada usah takutakan wan gantar lawan buhannya nang maulah pian marista ". ¹⁵ Tapi, kudusakanlah Kristus sabagai Tuhan dalam hati pian! Basiap haja mambari jawaban, gasan siapa haja nang manuntut pian dalam hal pangharapan, ¹⁶ tapi lakukanlah ngitu dengan lamah lambut wan hurmat, wan baisi hati nurani nang jernih supaya bila pian difitnah, ulih urang nang manyambati cara hidup pian nang baik dalam Kristus inya pacangan supan. ¹⁷ Sabab, labih baik marista karana baulah kabaikan, amun nitu kahandak Allah, daripada marista karana maulah kajahatan. ¹⁸ Ulih Kristus jua sudah mandarita karana dosa-dosa, sakali haja gasan sabarataan urang, nang mati gasan nang kada bujur, karana ngitu Sidin kawa mambawa kita kahadapan Allah. Dibunuh awak, tatapi dihidupkan dalam Roh. ¹⁹ Dalam Roh, Sidin tulak mambaritaakan kabanaran gasan roh-roh nang dipenjara, ²⁰ yaitu babuhan nang dahulu kada maasi wan Allah nang sabar mahadang buhannya matan zaman Nuh, waktu Nuh maulah bahternya. Malalui bahtera ngitu, hinggan walu urang haja nang disalamatakan matan air bah. ²¹ Air bah ngitu malambangakan baptisan nang wayahini manyalamatakan pian. Baptisan kada gasan mambarsihakan nang rigat diawak, tapi marupakan parmuhunan ulih Allah gasan hati nurani nang murni malalui kabangkitan Yesus Kristus, ²² yaitu Sidin nang wayahini sudah naik ka surga wan badiam di sabalah kanan Allah; imbah ngitu barataan malaikat, babuhan pamarintah, wan panguasa ditundukkan ulih Sidin.