Nasihat Gasan Parnikahan ¹ Wayahini, manganai hal-hal nang pian tulisakan wan ulun: sabaiknya lalakian supaya jangan manggawil babinian. ² Tatapi , lantaran ada nang bajinah, satiap lalakian bagusnya baisi bini sorangan wan kayaitu jua babinian baiknya baisi laki sorangan. ³ Laki harus malaksanaakan kawajibannya wan bininya, kayaitu jua bini wan lakinya. ⁴ Bini kada berhak atas awaknya sorang, tatapi lakinya. Kayaitu jua laki kada berhak atas awaknya sorang, tatapi bininya. ⁵ Kada buleh pian barambangan, kacuali pian sama-sama satuju gasan samantara waktu haja supaya pian baisi waktu gasan badoa. Imbah itu, babulik pulang supaya iblis kada mancobai pian lantaran pian kada kawa manahan nafsu. ⁶ Tatapi, aku baucap kayaini jangan dianggap parintah, tapi gasan nasehat. ⁷ Ulun baharap sabarataan urang kaya ulun. Tatapi, sabarataan urang ada karuniannya sorang matan Allah, nang sorang dalam hal ini, balalu nang lain dalam hal nang itu. ⁸ Gasan nang kada manikah wan buhan janda, ulun bapadah haja labih baik bubuhannya jaka kawa tatap haja nangkaya ulun. ⁹ Tatapi, amun bubuhannya kada kawa mangandaliakan diri, labih baik buhanya manikah . Sabab, labih baik manikah dari pada tabakar oleh hawa nafsu. ¹⁰ Gasan nang sudah manikah, ulun mambari parentah-parentah ini ( lain matan ulun, tapi matan Allah), yaitu bini kada buleh maninggalakan lakinya, ¹¹ ( tatapi amun inya sudah talanjur maninggalakan lakinya, inya harus tatap kada buleh balaki, atawa babulik badamai wan lakinya), balalu laki kada buleh manyarakakan bininya. ¹² Gasan nang lainnya, ulun bapadah (ulun, lain Tuhan) bahwa amun ada dinsanak nang baisi bini nang kada parcaya, wan binian nangitu hakun hidup lawan inya, janganlah inya manyarakakan bininyaitu. ¹³ Nangkayaitu jua pabila ada binian baisi laki nang kada parcaya, wan lalakian nang itu hakun hidup lawan inya, janganlah inya maninggalakan lakinya itu. ¹⁴ Lantaran laki nang kada parcaya itu dikudusakan liwat bininya, wan bini nang kada parcaya dikudusakan liwat lakinya. Amun kada kaitu, anak-anakpian adalah anak-anak najis, tatapi wayahini bubuhannya kudus. ¹⁵ Tatapi, amun nang kada parcaya itu handak bapisah, biarakan haja inya bapisah. Amun sudah nangkaya itu, dinsanaksabarataan kada lagi taikat. Tatapi, Allah sudah mangiau kita gasan hidup intang damai sejahtera. ¹⁶ Sabab, kayaapa ikam tahu, hai bini, kalau pian cagar manyalamatakan lakipian? Atawa, kaya apa pian tahu , hai laki, kalau pian pacangan manyalamatakan binipian? Tatap Nangkaya Rahat Dikiau Allah ¹⁷ Tapi, kaya nang sudah Tuhan tetapkan gasan satiap urang, nangkayaapa Allah mangiau bubuhan asing-asingnya, tataplah hidup nangkaya itu. Nangkaya itu jua ulun parintahakan gasan sabarataan jamaat. ¹⁸ Apakah ada urang nang wayah dikiau inya sudah disunat? jangan manyuruh inya mahilangakan tanda-tanda sunatnya. Adakah urang nang wayah inya baluman disunat? jangan jua inya disunat. ¹⁹ Sabab, basunat atawa kada basunat, kada panting. Tapi, nang panting adalah kataatan wan parintah-parintah Allah. ²⁰ Satiap urang musti badiam nangkaya wayah inya dikiau. ²¹ Apakah pian dahulu budak pas wayah dikiau? jangan pian kuatir hal itu. Tapi, amun pian jua kawa jadi urang bibas, labih baik pakai kasampata nangitu. ²² Sabab, inya nang pas wayah dikiau adalah budak, inya adalah urang merdeka ampun Tuhan. Nangkaya itu jua, wayah urang merdeka dikiau, inya adalah budak Kristus. ²³ Pian udah ditebus wan harga lunas, lantaran itu jangan lagi pian jadi buadak manusia. ²⁴ Dinsanak sabarataan, biaralah satiap urang tatap badiam wan Allah, intang kaadaan wayah inya dikiau. Nasehat Gasan Urang nang Balum Manikah ²⁵ Wayahini, masalah urang-urang nang balum manikah, aku kada baisi parentah matan Tuhan. Akan tatapi, pandapat aku sabagai urang nang oleh kasih Tuhan, kawa dipercaya. ²⁶ Ulun maanggap hal ini pas rahatan naglih wayahini, yaitu labih baik bagi satiap urang supaya tatap tinggal nagkaya apa adanya. ²⁷ Apakah ikam taikat wan bini ikam? jangan mahandaki basarak. Apakah ikam balum taikat wan bini ikam? jangan jua mancari pulang bini nang lain. ²⁸ Tatapi, pabila ikam manikah, ikam kada badosa, Wan, pabila babinian bujang manikah, inya kada badosa jua. Tatapi, buhannya nang manikah pacangan mangalami kasulitan-kasulitan hidup duniawi, wan aku handak ikam luput matan hal-hal nangkaya itu. ²⁹ Dinsanak sabarataan, maksudlun adalah waktunya udah parak. Jadi mulai wayahini, biarhaja buhannya nang baisi bini, hidup saolah-olah kada baisi bini, ³⁰ buhannya nang manangis saolah-olah kada manangis, buhannya nang balanja saolah-olah kada baisis apa-apa. ³¹ wan buhannya nang mamakai hal-hal dunia saolah-olah kada mamakainya. Sabab, kaadaan dunia ini rahat lanyap. ³² Ulun handak pian bibas dari kakawatiran. Urang nang kada manikah mamikirakan hal-hal tentang Tuhan, nangkaya apa sakiranya inya kawa mahimungi Tuhan. ³³ Akan tatapi, urang nang manikah mamikirakan hal-hal duniawi, nangkaya apa inya kawa mahimungi bininya, ³⁴ wan parhatiannya tabagi-bagi. Babinian nang kada manikah wan buhan gadis mangkawatirakan hal-hal tentang Tuhan supaya inya kawa kudus, baik awak atawa ruhnya. Tapi, babinian nang manikah mangkawatirakan hal-hal dunia ini, nangkaya apa inya kawa mahimungi lakinya. ³⁵ Ulun bapadah hal ini gasan kauntungan pian sorangan, kada gasan manjabak pian, tatapi gasan kabaikan supaya palayananpian gasan Tuhan kada taganggu. ³⁶ Amun ada urang nang udah maanggap inya baulah nang kada pantas wan gadisnya lantaran gadisnya itu udah liwat umur wan kaya itu jua saharusnya, biar ai inya maulah apa nang dikahandakinya, inya kada badusa; biar ai buhannya manikah. ³⁷ Tapi, inya nang udah mantap da;am hatinya, kada marga dipaksa, baisi hak atas kahandaknya sorang, wan udah bulat dalam hatinya untuk kada manikahi gadisnya itu, maka inya udah batindak baik. ³⁸ Jadi, amun inya manikahi babinian itu inya babuat bujur, tatapi amun inya kada manikahi babinian itu, kaputusannya itu gin baik. ³⁹ Bini taikat salawas lakinya masih hidup. Tapi, pabila lakinya maninggal, inya bibas untuk manikah wan siapa haja nang dikahandiknya, asalkan urang itu da;am Tuhan. ⁴⁰ Akan tatapi, manurut pandapatlun, inya akan labih bahagia amun inya tatap dalam kaadaannya, wan manurutlun, ulun jua baisi Ruh Allah.