Masalah Parkara Hukum Intang Urang Parcaya ¹ Amun ada di antara buhan ikam nang bahual, adalah inya tulak mancari kaadilan lawan urang-urang nang kada baik dan kada tulak ka urang nang kudus? ² Kada tahukah ikam bahwa urang-urang nang kudus cagar mahakimi dunia? Amun dunia dihakimi oleh ikam, apakah ikam kada pantas gasan mangadili perkara-perkara nang halus? ³ Apakah ikam kada tahu bahwa kita pacangan mangadili buhan malaikat? Apalagi hinggan perkara-perkara biasa sahari-hari! ⁴ Jadi, amun ikam mahadapi perkara-perkara biasa nangkaya itu, kanapa ikam mambawanya ka buhannya nang kada dianggap dalam jamaah? ⁵ Aku baucap kaya ini supaya ikam supan. Apakah kadada saikongnya diantara buhan ikam nang bijaksana, nang sanggup mangurus perkara-perkara intang dinsanak-dinsanaknya? ⁶ Sakalinya, antara dinsanak lawan dinsanak lainnya malah tulak mancari kaadilan lawan urang-urang nang kada parcaya! ⁷ Sabujurnya, sudah gagal buhan ikam lantaran ikam baisi perkara-perkara hukum diantara ikam. Kanapa ikam kada katuju disalahakan? ⁸ Sabaliknya, ikam sorang nang basalah balalu marugiakan. Bahkan, ikam sorang nang maulahnya gasan dinsanak-dinsanak ikam. ⁹ Apakah ikam kada tahu bahwa urang nang kada bujur kada pacangan mawarisi Karajaan Allah? Jangan sasat! Urang-urang cabul, buhan nang nyambah barhala, urang-urang nang bajinah, bencong, buhan homoseksual, ¹⁰ buhan pancuri, urang-urang nang sarakah, buhan pemabuk, buhan tukang fitnah, dan panipu-panipu, buhannya sabarataan kada pacangan mawarisi Karajaan Allah. ¹¹ Adajua diantara buhan ikam nangkaya itu. Tatapi, ikam sudah di barasihakan, sudah dikudusakan, wan sudah dibujurakan dalam ngaran Tuhan Yesus Kristus wan dalam Roh Allah kita. Mahindari Bajinah ¹² Sabarataan dibulehakan gasanku, tatapi kada samuanya bamanfaat. Mimang samua hal dibulehakan gasanku, tatapi aku kada hakun dijadiakan hamba uleh apa haja. ¹³ Makanan gasa parut, wan parut gasan makanan, tatapi Allah cagar mambinasaakan kadua-duanya. Awak kita kada gasan bajinah, tatapi gasan Tuhan, wan Tuhan gasan kita. ¹⁴ Allah mambangkitakan Tuhan wan jua cagar mambangkitakan kita liwat kuasa-Sidin. ¹⁵ Kada tahukah ikam bahwa awak ikam tu adalah anggota-anggota Kristus? Apakah aku cagar maambil anggota-anggota Kristus wan maulah buhannya jadi anggota-anggota lahung? Sama sakali kada! ¹⁶ Apakah ikam kada tahu amun urang sudah malahung inya mahuruk awaknya lawan lahung sahinnga inya jadi satu awak lawan lahung? Sabab, inya baucap, "Kaduanya cagar jadi saawak." ¹⁷ Sabaliknya, urang nang mahuruk hidupnya wan Tuhan jadi isa roh lawan-Sidin. ¹⁸ Jangan bajinah! dusa nang lainnya diulah urang diluar awaknya, tatapi urang nang bajinah, badosa wan awaknya sorang. ¹⁹ Kada tahukah ikam bahwa awak ikam itu adalah bait Ruh Kudus, Inya ada dalam awak ikam, nang ikam tarima matan Allah, bahwa hidup ikam lain hak ikam sorang? ²⁰ Sabab, ikam sudah dibayar lunas, Lantaran itu, muliakanlah Allah wan awak ikam!