¹ Ja̧'hua̧nö̧ ja̧'a̧ TÖ̧Ä̧NÄ̧HUA̧ ucuocuinö Moiserö pa̧'a̧nö̧ pä'ö: ² Kä̧hua̧ttö̧ ä̧cuo̧mȩnä̧ mo̧ro̧ ja̧'a̧ jareö a̧'ȩ päi'omenä ucutumä jo̧mȩnö̧ cu̧ju̧nä̧rä̧tu̧cu̧'a̧nö̧ ja̧'a̧ Tö̧ä̧nä̧hua̧ ö̧jodemä, tta̧di̧tä̧cuä̧ ucuocu pä̧cuä̧huode'inä. ³ Cutätucuajá i̧so̧ca̧nä̧ jȩchi̧nö̧ i̧jȩcuo̧ca̧nä̧mä̧, ucumä juo̧ca̧ i̧so̧ca̧ i̧sä̧ta̧ 'to'epö tta̧cuä̧rä̧cua̧jä̧. ⁴ Mesa isodä cui'chächaja ja̧'hua̧nö̧ i'chächö ji̧yȩtä̧ jö̧ta̧'a̧nä̧ yoräteunä cutajá. Ja̧'hua̧nö̧ o'ca'a cui'chächajá tejähua jua̧u̧ttu̧tä̧ tejähuore cuaditajá. ⁵ I̧sa̧rä̧ 'cu iyähuodä ja̧'tu̧huodanä cutajá a̧mȩu̧nä̧ i̧so̧ca̧ ttö jȩchi̧nö̧ i̧jȩcuo̧ca̧ ä'ca. Ucumä cu̧tä̧cua̧jä̧ tto̧'ȩcuä̧ta̧ Tö̧ä̧nä̧hua̧ ö̧jode doächäcuähuome ä'ca. ⁶ Ja̧'hua̧ta̧'a̧nö̧ cu̧tä̧cua̧jä̧ i̧sa̧rä̧ ku'icu iyähuiodä Tö̧ä̧nä̧hua̧ ö̧jode do'ächäcuähuome ä'ca, huȩnȩ ucuocuäcuähuome'inä. ⁷ Ja̧'hua̧ta̧'a̧nö̧ cu̧ju̧nä̧cua̧jä̧ Tö̧ä̧nä̧hua̧ ö̧jode ja̧'hua̧ta̧'a̧nö̧ huȩnȩ ucuocuäcuähuome kä'co päte'ö i̧so̧'tä̧ rö̧o̧'tä̧ jua'a jacuämä ajiya acunä. ⁸ Jo̧mȩnö̧ u̧mi̧nä̧'i̧nä̧ sobucuächönä juätädö kö̧nä̧tu̧cui̧, ja̧'hua̧ta̧'a̧nö̧ u̧mi̧ isaränä do'ächäcuähuome'inä i̧sä̧tä̧ äcuädö rö̧nä̧tu̧cui̧. ⁹ A̧dȩja̧ 'cucuettö tu'epätucui Tö̧ä̧nä̧hua̧ ö̧jode ja̧'hua̧ta̧'a̧nö̧ juodenä ko̧cu̧'i̧nä̧ o'cajuiyönä. Ucumä kä̧'ȩpö̧ cu̧ju̧na̧ja̧ o'cajuiyönä tto chö'äremä; ja̧u̧mä̧ surojö juiyö jä̧cua̧'a̧. ¹⁰ Ucumä cu'cucuȩtä̧cua̧jä̧ i̧so̧ca̧ 'cu'icu iyähuome o'cajuiyönä juȩnȩ a̧di̧cuä̧mä̧. Ucutä kä̧'ȩpö̧ cu̧ju̧nä̧cua̧jä̧ TTÖ chö̧'ä̧ro̧ca̧mä̧ ja̧'hua̧nö̧ jo̧mȩnä̧tä̧ ttöttö surojö'inä jui̧yo̧ca̧ jä̧cua̧'a̧. ¹¹ Broncettö̧ a̧di̧cuo̧ca̧'i̧nä̧ tucuepajá jua'a chu̧huä̧rö̧'i̧nä̧ kä̧'ȩpä̧ cu̧ju̧na̧já̧ ttö chöäre päi'önä ¹² Ucutä cui̧'chä̧chä̧cua̧jä̧ Aaronrö̧'i̧nä̧ ja̧'hua̧ta̧'a̧nö̧ i̧tti̧mu̧rö̧'i̧nä̧ do'ächö huȩnȩ ucuocuäcuähuomettö̧ ja'huätörö cu̧tu̧cä̧cua̧jä̧ ajiyanä. ¹³ TTö chi'äre päi'önä kä̧'ȩpö̧ cu̧ju̧nä̧jä̧tu̧cu̧ttu̧ Aaronrö̧ cu̧'ca̧tä̧tu̧cua̧já̧, 'cucuetö ja̧'hua̧ta̧'a̧nä̧ kä̧'ȩpö̧ ku̧nä̧tu̧cui̧rö̧ ja̧u̧ jä̧cua̧'a̧ ttö pädö jiäcuähuä i̧sa̧ jä̧cua̧'a̧nö̧. ¹⁴ Ucumä cui̧'chä̧chä̧cua̧jä̧ i̧tti̧mu̧rö̧'i̧nä̧ ja̧'hua̧nö̧ i̧'chä̧chö̧mä̧ cu̧'ca̧tä̧tu̧cua̧já̧ 'ca̧tä̧'ä̧cuähuä'pi otoä'pi. ¹⁵ Ucutä cu'cucuetajá ja'huätö tä'orö cu'cucuetajita'anö ja̧'hua̧nö̧ jo̧mȩnä̧tä̧ TTÖ pädö ji'äcuähuotö ttäcuotö. Ja̧'hua̧nö̧ cu'cucuetomettö̧tä̧ yabocu 'chä̧cua̧'a̧ ja'huätö ttahuaruhä o'cotörö'inä." ¹⁶ Ja̧'hua̧nö̧tä̧ jȩpi̧nö̧ Moisemä; Ja̧u̧mä̧ TÖ̧Ä̧NÄ̧HUA̧ päinö ta'anötä jȩpi̧nö̧. Ja̧u̧mä̧ jȩpi̧nö̧ pi̧yȩ o'cajuiyönä. ¹⁷ Ja̧'hua̧nö̧ ja̧'a̧ttö̧ Tö̧ä̧nä̧hua̧ ö̧jodemä̧ jo̧mȩnö̧ ji̧na̧'a̧ mo̧rä̧ttö̧mä̧ ä̧cuo̧mȩnä̧ mo̧ro̧ kä̧hua̧tö̧ttö̧'i̧nä̧ ä̧cuo̧mȩnä̧ kä̧hua̧ a̧'ȩttö̧mä̧ dodäre a̧'ȩ päi'omenä. ¹⁸ Moisemä jo̧mȩnö̧ aditö ku̧ni̧nö̧ Tö̧ä̧nä̧hua̧ ö̧jodemä̧, kä̧cuo̧mȩ jo̧mȩnö̧ bo'copö ku̧ni̧nö̧, ku̧ni̧nö̧ kä̧cuo̧mȩ'i̧nä̧, pätecu nö'cädö ku̧ni̧nö̧ yö̧ȩpä̧rä̧cua̧'i̧nä̧ ja̧'hua̧ta̧'a̧nä̧ chu̧huä̧rö̧nä̧ ko̧cuä̧cuä̧ o'ca'inä ku̧ni̧nö̧. ¹⁹ I̧sä̧tä̧ cä'epö huä̧ni̧nö̧ Tö̧ä̧nä̧hua̧ ö̧jode juttä isode pporädäcuähuode huä̧ni̧nä̧ juȩnȩmä̧ TÖ̧Ä̧NÄ̧HUA̧ päjita'anö. ²⁰ Ja̧u̧mä̧ ȩmi̧nö̧ jȩchä̧cua̧sä̧ päinöji̧nö̧ ja̧'hua̧nö̧tä̧ jȩpö̧ rötinö juo̧ca̧ jacuä. Ja̧'hua̧ta̧'a̧nö̧ itta'ca'inä rötinö ja̧u̧nu̧ o'ca'a muecuäbi i̧sa̧ ucuoja dahuipome'inä käbi mu̧'ȩpi̧nö̧. ²¹ Ja̧u̧mä̧ i'chächinö i̧so̧ca̧ Tö̧ä̧nä̧hua̧ ö̧jode jacuä. I̧sä̧ta̧ tto'epinö Tö̧ä̧nä̧hua̧ jȩi̧nö̧ ȩco̧ca̧ tto̧ȩpä̧rö̧nä̧, TÖ̧Ä̧NÄ̧HUA̧ pä'inö ji̧nö̧ta̧'a̧nö̧. ²² Mesa isodä'inä ku̧ni̧nö̧ huȩnȩ u̧cuo̧cuä̧cuä̧huo̧ca̧ jacuä'inä, Tö̧ä̧nä̧hua̧ ö̧jodettö kä̧hua̧ u̧huo̧jua̧'a̧nä̧cu̧ttu̧, i̧sä̧tä̧ u̧mi̧nä̧. ²³ Ja̧u̧ rötinö pan o̧ppö̧ mesa roräteunä pȩjö̧nä̧ TÖ̧Ä̧NÄ̧HUA̧ ä'cajome, TÖ̧Ä̧NÄ̧HUA̧ hueäji ta'anö. ²⁴ Ja̧u̧mä̧ ku̧ni̧nö̧ ra̧pa̧ra̧ ku̧nä̧huä̧ o'cä huȩnȩ ucuocuäcuähuode jacuä, mesa ko̧mȩ jäyä, Tö̧ä̧nä̧hua̧ ö̧jodettömä kä̧hua̧ ieruhua'acunä. ²⁵ Ra̧pa̧ra̧mä̧ kä̧dȩpi̧na̧'a̧ TÖ̧Ä̧NÄ̧HUA̧ ä'cajome, TÖ̧Ä̧NÄ̧HUA̧ päinö ji̧nö̧ ta'anö. ²⁶ Ja̧u̧mä̧ ku̧ni̧nö̧ ku icu iyähuome ja̧ttu̧huo̧mȩ huȩnȩ ucuocuäcuähuoca jacuä ttö̧ȩpä̧rä̧ta̧ ä'cajome. ²⁷ 'Cu icuinö juodä adiunä a̧mȩu̧nä̧ juorö, TÖ̧Ä̧NÄ̧HUA̧ päinö ji̧nö̧ ta'anötä̧. ²⁸ Ja̧u̧mä̧ ti̧'ä̧dö̧ rö̧ni̧nö̧ i̧sä̧ta̧ Tö̧ä̧nä̧hua̧ ö̧jode ä'ca. ²⁹ Ku̧ni̧nö̧ 'cu icu iyähuome'inä Tö̧ä̧nä̧hua̧ ö̧jodecu do'ächäcuähuome, huȩnȩ u̧cuo̧cuä̧cuä̧huo̧ca̧nä̧. 'Cu'icu iyähuome iyinö u̧huä̧ju̧ iyähuä TÖ̧Ä̧NÄ̧HUA̧ päinö ji̧nö̧ ta'anö. ³⁰ Ja̧u̧ ku̧ni̧nä̧ i̧sä̧yu̧ huȩnȩ u̧cuo̧cuä̧cuä̧huo̧ca̧cu̧ i̧so̧ca̧cu̧ kä̧tȩ jo̧mȩ, ajiya'inä ku̧ni̧nö̧ ttutucähua pä'ö. ³¹ Moises'inä Aaron'inä ja̧'hua̧ta̧'a̧nö̧ i̧tti̧mu̧'i̧nä̧ ttu̧mu̧pi̧yä̧ ja̧'hua̧ta̧'a̧nö̧ ttö̧jä̧pi̧yä̧'i̧nä̧ ja̧huä̧yu̧ttu̧ töcähui'änätö ³² huȩnȩ u̧cuo̧cuä̧cuä̧huo̧ca̧ra̧'a̧ ja̧'hua̧ta̧'nö̧ Tö̧ä̧nä̧hua̧ ö'äre ka̧cuo̧ca̧ra̧'a̧ dottächa pä'ömä. Jahuätömä ja̧'hua̧ta̧'a̧nö̧ töcähui'änätö, TÖ̧Ä̧NÄ̧HUA̧ hueinö ji̧nö̧'a̧nö̧tä̧ Moiserö. ³³ Moisemä jo̧mȩnö̧ aditö ku̧ni̧nö̧ Tö̧ä̧nä̧hua̧ ö̧jode sobucuächönä ja̧'hua̧ta̧'a̧nö̧ hueinö ȩjo̧cä̧ ko̧mȩ'i̧nä̧. U̧mi̧ isaränä dottächi'omeinä i̧sä̧tä̧ ti̧'ä̧dö̧ rö̧ni̧nö̧. Ja̧'hua̧nö̧tä̧, Moisemä aditähuä cä'ädinö. ³⁴ Ja̧'hgu̧a̧nö̧ ja̧'a̧ttö̧ huȩnȩ u̧cuo̧cuä̧cuä̧huo̧ca̧ ko̧mȩmä̧ isoppa a̧ttä̧chi̧'i̧na̧'a̧, TÖ̧Ä̧NÄ̧HUA̧ öadihuämä juodettö i̧jȩcuä̧chi̧na̧'a̧. ³⁵ Moise'inä doächa pä'ömä juiyina'a huȩnȩ ucuocuäcuähuodera̧'a̧mä̧ juodenä isoppa attächi'a'attö, Jua'amä juode TÖ̧Ä̧NÄ̧HUA̧ usäruttu attächi'a'attö. ³⁶ 'Cuä'opönä ajiya isoppa Tö̧ä̧nä̧hua̧ ö̧jode u'tättö pporächi'öta'anö̧ Israel ttö̧ja̧mä̧ rötädö ihui̧nä̧tö̧. ³⁷ Ja̧'hua̧nö̧ ja̧'a̧nä̧ ajiya isoppa Tö̧ä̧nä̧hua̧ ö̧jode u'tättö pporächi'ö juiyöttömä, ttö̧ja̧mä̧ rä'opö i̧huo̧co̧tö̧ pinätö. Ja'huätömä tta̧'a̧ri̧nä̧tö̧ juoppa cäecuächomejubu. ³⁸ Jua'amä TÖ̧Ä̧NÄ̧HUA̧ öadihuä isoppa jau̧nu̧ mo̧ro̧ juode isodenä huirochö ra̧'a̧ttö̧, yodomä juode ju'tämä ucurä huirochö ri̧na̧'a̧, ocatoi'önä Israel ttä̧ja̧mä̧ topinätö̧ koromecu̧ tti̧huo̧mȩnä̧mä̧.