¹ Ja̧'tu̧huä̧ta̧ttö̧'i̧nä̧, tädönä tu̧huä̧ta̧ttö̧'i̧nä̧ ja̧'hua̧ta̧'a̧nö̧ tu̧huä̧ta̧ttö̧'i̧nä̧ jahuätömä ttu̧'ca̧tä̧huä̧ti̧yu̧ adihuäjuai o̧ta̧ 'tö̧'i̧nä̧tö̧, ro̧o̧mȩ aditö ttö̧'ca̧tä̧huä̧cuȩmä̧. Jahuätömä Aarón ö̧'ca̧tä̧huä̧ti̧yu̧ ro̧o̧mȩ do'ächö ö̧'ca̧tä̧huä̧cuä̧ta̧'i̧nä̧ 'tö̧'i̧nä̧tö̧, TÖ̧Ä̧NÄ̧HUA̧ Moisésrö hueinöta'anötä̧. ² Bezaletmä orottö 'ca̧tä̧cuä̧huä̧ta̧ aditinö, ja̧'tu̧huä̧ta̧ttö̧'i̧nä̧, tädönä tu̧huä̧ta̧ttö̧'i̧nä̧ ja̧'hua̧ta̧'a̧nö̧ tu̧huä̧ta̧ttö̧'i̧nä̧ juhua'atäcu lino i̧sä̧ta̧ ppö'cähu̧ta̧ttö̧'i̧nä̧. ³ Jahuätömä orottö obi päi'önä 'ta'inä̧ttö̧ ja̧'hua̧ta̧'a̧nö̧ ja̧u̧mä̧ 'torinätö̧ appiyä jö̧nä̧, ja̧'tu̧huä̧ta̧'i̧nä̧, tädönä tu̧huä̧ta̧nä̧'i̧nä̧ ja̧'hua̧ta̧'a̧nö̧ tu̧huä̧ta̧nä̧'i̧nä̧ juhua'atäcu lino i̧sä̧ta̧nä̧'i̧nä̧ ti̧ttä̧da̧ pä'ö, pi̧yȩmä̧ adicuämä huo̧jua̧tä̧ aditinö. ⁴ Jahuätömä sacerdote ö̧'ca̧tä̧huä̧ta̧ u'upi'ca jähuämä̧ korota̧ ö̧yu̧'ca̧ri̧cu̧ boecuächönä aditinä̧tö̧. ⁵ Adihuäjuäi lino i̧sä̧ta̧ttö̧ äcänä ti̧ä̧dä̧cuä̧huä̧ta̧'i̧nä̧ 'tu̧'i̧nä̧tö̧; ö̧'ca̧tä̧huä̧ta̧cu̧ todeunä tö̧'i̧nä̧tö̧, lino pö̧jä̧ta̧ ppö'cähuäta̧ttö̧'i̧nä̧, orottö'inä, ja̧'tu̧huä̧ta̧ttö̧'i̧nä̧, tädönä tu̧huä̧ta̧ttö̧'i̧nä̧ ja̧'hua̧ta̧'a̧nö̧ tu̧huä̧ta̧ttö̧'i̧nä̧, TÖ̧Ä̧NÄ̧HUA̧ Moisésrö hueinöta'anö̧tä̧. ⁶ Ónices o'quittö rö̧nö̧ aditinä̧tö̧, orottö adicuä huämenä sello jä̧'i̧nö̧'a̧nö̧ jö̧nä̧ 'co̧'ö̧, ja̧'hua̧ta̧'a̧nö̧ 'co̧'ö̧ ttaditäjimä̧ Israel i̧tti̧mö̧ 12nö̧ huotö ttimi ji̧na̧'a̧. ⁷ Bezalelmä 'ca̧tä̧cuä̧huä̧ta̧ u'upi'canä inä o'qui rötinö̧ Israel i̧tti̧mö̧ doce huotörö amöcuädäcuähuä jö̧nä̧; TÖ̧Ä̧NÄ̧HUA̧ Moisésrö hueinöta'a̧nötä. ⁸ Ttamöcanä rä̧ta̧mä̧ aditinömä, adicuä huo̧jua̧tä̧ aditinö̧ 'ca̧tä̧cuä̧jhuä̧ta̧ aditäji ta'anö̧tä̧. Orottö'inä, oveja i̧jȩta̧ ja̧'tu̧huä̧ta̧ttö̧'i̧nä̧, tädönä tu̧huä̧ta̧ttö̧'i̧nä̧ ja̧'hua̧ta̧'a̧nö̧ tu̧huä̧ta̧ttö̧'i̧nä̧ juhua'atäcu adihuäjuäi lino i̧sä̧ta̧ttö̧'i̧nä̧ aditinö. ⁹ ja̧huä̧ta̧mä̧ öotcu'inä öcähuecu'inä yorätehuina'a. Jahuätömä ttamöcanä rä̧ta̧mä̧ todärenä jäbetinätö̧. Ja̧huä̧ta̧mä̧ öoto'inä käcuoräcu'inä ya'ute ttumönä pa̧ja̧cuo̧mȩ jö̧nä̧ ji̧nä̧ta̧. ¹⁰ Ku̧ni̧nä̧tö̧ pa̧ja̧cuä̧nö̧ o̧mä̧nä̧ inä o'qui adihuäjuäittö. Ä̧cuo̧mȩnä̧ i̧sä̧mä̧nä̧mä̧ ki̧na̧'a̧ rubí ido'qui'inä, topacio ido'quiínä ja̧'hua̧ta̧'a̧nö̧ granate ido'qui'inä. ¹¹ Todäre päi'önä i̧sä̧mä̧nä̧mä̧ ki̧na̧'a̧, esmeralda ido'qui'inä, safiro ido'qui'inä ja̧'hua̧ta̧'a̧nö̧ diamante ido'quinä. ¹² Huäbodäcuä päi'önä i̧sä̧mä̧nä̧mä̧ ki̧na̧'a̧ jacinto ido'qui'inä, ágata ido'qui'i̧nä̧ ja̧'hua̧ta̧'a̧nö̧ amatista ido'qui'i̧nä̧. ¹³ Pa̧ja̧cuä̧nö̧ päi'önä i̧sä̧mä̧nä̧mä̧ ki̧na̧'a̧ berilo ido'qui'i̧nä̧, ónice ido'qui'i̧nä̧ ja̧'hua̧ta̧'a̧nö̧ jaspe ido'qui'inä. Pi̧yȩ inä o'quimä orottö adicuome jacuä ȩqui̧pö̧nä̧ ȩnä̧hui̧na̧'a̧. ¹⁴ Docenö huotö Israel i̧tti̧mö̧ jö̧ ta'anö rötinä̧tö̧ Inä o'quimä, o'catoi'önä ttimi pi̧yä̧ ottinöta'anötä̧. Ttudo'che i̧so̧bö̧nä̧ sello jö̧nä̧ 'co̧'ö̧ ttadita'a jä̧'i̧nö̧'a̧nö̧ yotucunä ttimipi̧yä̧mä̧ ji̧yȩtȩnä̧ huȩnȩcuä̧chi̧na̧'a̧ docenö huotömä. ¹⁵ Amöca isäbimä̧ aditinä̧tö̧ äcuädö ru̧nä̧huä̧sa̧ päcuäi orottötä metähua'a. ¹⁶ Orottömä ȩnä̧huo̧mȩ todäre jo̧mȩnä̧ aditinä̧tö̧ ja̧'hua̧ta̧'a̧nö̧ oro o̧bö̧ to̧bö̧rȩ juhua'atäcu ja̧u̧ to̧bö̧rȩmä̧ u̧yu̧'ca̧ri̧ jo̧mȩ pö̧nä̧ be'epö runinätö. ¹⁷ Jahuätömä oro o̧sa̧ to̧sa̧rȩ mȩtä̧huä̧sa̧mä̧ ru̧ni̧nä̧tö̧ ttamöcanä räbi u̧yu̧'ca̧ri̧nö̧ pö̧nä̧. ¹⁸ Jahuätömä kara'anä todäre u̧yu̧'ca̧ri̧cu̧ todehuächi'önä todetinä̧tö̧. Jahuätömä 'ca̧tä̧cuä̧huä̧ta̧ u'upi'quiyumä ko̧ro̧ta̧cu̧ todehuächi'önä todetinä̧tö̧ ä̧cuo̧mȩnä̧ ji̧nö̧ ta'anö. ¹⁹ Jahuätömä i̧so̧bö̧ to̧bö̧rȩ aditinä̧tö̧ aditäjä'cotömä ttamuca räbi u̧yu̧'ca̧ri̧nä̧ ru̧ni̧nä̧tö̧, beipome jäyä jacuänä ja̧'a̧cu̧nä̧. ²⁰ Jahuätömä oro o̧bö̧ to̧bö̧rȩttö̧'i̧nä̧ koro o̧bö̧ aditinätö̧ aditäjä'cotömä amöcanä rä̧ta̧ u'upi'quiyu dȩa̧'a̧nä̧ ä'cacunä todehuächi'önä rö̧ni̧nä̧tö̧, ttäcänä ti̧ä̧dä̧cuä̧huä̧ta̧tä̧ huä̧mȩnä̧nö̧ tta̧mö̧canä rä̧ta̧ 'tö̧ä̧huo̧mȩ beipome. ²¹ Jahuätömä amöcanä räbi o̧bö̧mä̧, ö̧'ca̧tä̧huä̧ta̧nä̧ rö̧jö̧ o̧bö̧cu̧ todehuächi'önä ja̧'tu̧huä̧ta̧nä̧ ti̧'ä̧dö̧ ru̧ni̧nä̧tö̧, ja̧'hua̧nö̧ pporochi'oca'a rä̧cua̧'a̧nö̧ äcänä ti̧ä̧dä̧cuä̧huä̧ta̧ huä̧mȩnä̧ ö̧'ca̧tä̧huä̧ta̧ 'tu̧ä̧huo̧mȩ beipomemä. Pi̧yȩ jȩpi̧nä̧tö̧ ttamöcanä räbi ttö̧'ca̧tä̧huä̧ta̧ttö̧ 'quiyönä 'chu̧huä̧rä̧cua̧'a̧nö̧. Pi̧yȩ aditinä̧tö̧ TÖ̧Ä̧NÄ̧HUA̧ Moisésrö hueinä ta'anötä̧. ²² Bezalelmä sacerdote ö̧'ca̧tä̧huä̧ta̧ tädönä tu̧huä̧ta̧ttö̧ jo̧mȩnö̧ aditö cä'ädi̧nö̧, 'tu̧huä̧ ttö̧ja̧sa̧ aditähuä jä̧ji̧mä̧. ²³ Pö̧jä̧ta̧ kä'co isäju 'tä̧ȩcui̧na̧'a̧ U jä̧cuo̧mȩmä̧. U̧ru̧pä̧'quȩ jo̧mȩnä̧ jäyänämä i̧sa̧bä̧nä̧ 'tu̧ä̧hui̧na̧'a̧ quȩrä̧chi̧'ö̧ juiyäcua'anö. ²⁴ 'Ca̧tä̧cuä̧huä̧ta̧ dȩa̧'a̧nä̧ to̧rä̧dä̧cuä̧huo̧mȩ dȩa̧'a̧dä̧mä̧, o̧ba̧ ru̧ni̧nä̧tö̧ ja̧'tu̧huö̧ttö̧'i̧nä̧ tädönä tuhuöttö'inä, tuhuöttö'inä ja̧'hua̧ta̧'a̧nö̧ lino i̧sä̧ta̧ttö̧'i̧nä̧ adicuä. ²⁵ Jahuätömä päcuäi orottö campana aditinä̧tö̧ ja̧'hua̧ta̧'a̧nö̧ o̧ba̧ 'cä̧tȩ jo̧mȩ ö̧'ca̧tä̧huä̧ta̧ beipome dȩa̧'a̧ ru̧ni̧nä̧tö̧. ²⁶ Campanamä ya'utetä ja̧'hua̧ta̧'a̧nö̧ i̧sä̧ba̧'i̧nä̧ jiba̧tȩtä̧ Aarón ö̧'ca̧tä̧huä̧ta̧ beipomemä. Pi̧yȩmä̧ aditinä̧tö̧ TÖ̧Ä̧NÄ̧HUA̧ Moisésrö hueinö ta'anötä̧. ²⁷ Aarón'inä, i̧tti̧mö̧'i̧nä̧ huä̧mȩnä̧ ttö̧'ca̧tä̧huä̧ti̧yu̧ aditinätö̧. ²⁸ Jahuätömä lino pö̧jä̧ta̧ttö̧ öcäyuhuä'ca'inä a̧'cua̧tö̧ Unämä lino pö̧jä̧ta̧ juä'opö, adihuäjuäi Lino i̧sä̧ta̧ jacuänä 'ca̧tä̧cuä̧huä̧ta̧ttö̧, ²⁹ ja̧'hua̧ta̧'a̧nö̧ ttäcänä juäocuä̧ta̧ lino i̧sä̧ta̧ ja̧'tu̧huä̧ta̧ttö̧'i̧nä̧, tädönä tu̧huä̧ta̧ttö̧'i̧nä̧ ja̧'hua̧ta̧'a̧nö̧ i̧sa̧ i̧jȩta̧ tu̧huä̧ta̧ttö̧'i̧nä̧ a̧'cua̧tö̧ adicuä i̧sa̧mä̧ aditinö. Pi̧yȩmä̧ aditinä̧tö̧ TÖ̧Ä̧NÄ̧HUA̧ Moisésrö hueinö ta'anötä̧. ³⁰ Jahuätömä päcuäi orottö 'co̧'ö̧ u'uttähuä i̧sä̧bä̧ aditinä̧tö̧, jahuätömä ja̧u̧ ppöttähuänä sello jä̧'i̧nö̧'a̧nö̧ 'co̧'ö̧ rutinä̧tö̧ "TÖ̧Ä̧NÄ̧HUA̧MÄ̧ surojö jui̧'a̧" pä'ö. ³¹ Jahuätömä isappänä ja̧'tu̧huappänä öcäyuhuä'ca huä̧mȩ jo̧mȩ ti̧'ä̧di̧nä̧tö̧. Pi̧yȩmä̧ aditinä̧tö̧ TÖ̧Ä̧NÄ̧HUA̧ Moisésrö hueinö ta'anötä̧. ³² Ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧ ö̧jo̧de ca̧ca̧cu̧ pä̧cuä̧huodemä aditö cä'ädinä̧tö̧. Israel ttö̧ja̧mä̧ o'cajuiyötä jȩpi̧nä̧tö̧. ³³ Jahuätömä o'cajuiyönä TÖ̧Ä̧NÄ̧HUA̧ Moisésrö jiähuinö ta'anötä̧ jȩpi̧nä̧tö̧. Jahuätömä TÖ̧Ä̧NÄ̧HUA̧ ö̧jo̧demä Moisés ö̧ja̧'a̧cu̧ i'cächinä̧tö̧: Isode'inä, juodetä ttaditä̧cuä̧'i̧nä̧, o̧bö̧'i̧nä̧, äpate jäyä jahuä'inä, o̧'qui̧yä̧'i̧nä̧, kada'ca o'ca'inä ja̧'hua̧ta̧'a̧nö̧ ja̧u̧tä̧ o'ca 'chu̧huä̧rä̧cuȩ'i̧nä̧; ³⁴ mu̧ä̧cuä̧cuȩ o̧ta̧ oveja ubo i̧jȩta̧ tuhuönä tu̧huȩcuä̧ta̧'i̧nä̧, mu̧ȩcuä̧ta̧ aje päcäyä i̧jȩta̧'i̧nä̧, ³⁵ ja̧'hua̧ta̧'a̧nö̧ tto'epö ötö'cö jiäu ȩco̧ca̧ mu̧ȩcuä̧ta̧'i̧nä̧ juhua'atäcu ȩcuä̧cuȩ o̧'quȩ'i̧nä̧ ja̧'hua̧ta̧'a̧nö̧ mu̧ȩcuäbi'inä. ³⁶ Jahuätömä ttu̧cuȩ rutähuodä'inä i'cächö kä̧nö̧mä̧, juorö ttä̧di̧tä̧cuä̧mä̧ o'cajuiyötä ja̧'hua̧ta̧'a̧nö̧ pan ä'ca jo̧mȩ tti̧yä̧cuȩ'i̧nä̧, ³⁷ päcuäi orottö adicuäcä cuoö ku̧nä̧huä̧cä'inä juhua'atäcu i̧sä̧mä̧nä̧ ka̧cu̧ la̧pa̧ri̧yu̧'i̧nä̧, ja̧u̧tä̧ ppächönä kä̧cuȩ'i̧nä̧, cuoönä rȩdȩcuä̧cuȩ'i̧nä̧; ³⁸ ku icu iyähuo̧ca̧ orottö adicuo̧ca̧'i̧nä̧, a̧dȩja dahuecuä'inä, incienso chopönä kuhuähuä'inä, TÖ̧Ä̧NÄ̧HUA̧ ö̧jo̧decu doächäcuähuome rö̧huä̧ta̧'i̧nä̧; ³⁹ ku icu i̧yä̧huo̧ca̧ broncettö a̧di̧cuo̧ca̧nä̧ huȩnö̧ ȩttä̧huä̧cä'inä, kada'ca o'ca'inä, ppächönä adicuä'inä ja̧'hua̧ta̧'a̧nö̧ tucäcuähuome 'chu̧huä̧ro̧mȩ'i̧nä̧. ⁴⁰ Jahuätömä kä'co isarä ttoecuä o̧ta̧'i̧nä̧, icui'quiyu'inä ja̧hua̧ta̧'a̧nö̧ ja̧u̧tä̧ kada'ca chu̧huä̧rä̧cuä̧'i̧nä̧ juhua'atäcu kä'co isaräcu doächi'äcuähuome ttoecuä o̧ta̧'i̧nä̧ i'cächinä̧tö̧; ti̧ä̧dä̧cuä̧huä̧ o̧chu̧'i̧nä̧, isode ti̧'ä̧dö̧ ta'u ku̧nä̧huä̧'i̧nä̧ ja̧'hua̧ta̧'a̧nö̧ TÖ̧Ä̧NÄ̧HUA̧ ö̧jo̧de ppä'ädipö tta̧di̧tä̧cuȩ'i̧nä̧, ca̧ca̧cu̧ pä̧cuä̧huode. ⁴¹ Jahuätömä ȩpi̧nä̧tö̧ ro̧o̧mȩ kä̧nö̧ 'ca̧tä̧hui̧'ö̧'cotö ttaditäcuä̧'i̧nä̧, sacerdote Aarón ja̧'hua̧ta̧'a̧nö̧ i̧tti̧mö̧ sacerdotestö jö̧nä̧ aditö ttö̧'ca̧tä̧huä̧ti̧yu̧'i̧nä̧ i'cächinä̧tö̧. ⁴² Ja̧'hua̧nö̧tä̧ Israel ttö̧ja̧mä̧ adicuämä o'cajuiyötä aditinä̧tö̧ TÖ̧Ä̧NÄ̧HUA̧ Moisésrö hueinö ta'anö̧tä̧. ⁴³ Moisésmä usähuinö ttadijäjimä o'cajuiyönä̧tä̧, ja̧'hua̧ta̧'a̧nö̧ jahuätö ttaditäjimä topinö. TÖ̧Ä̧NÄ̧HUA̧ hueinö ta'anö̧tä̧ jahuätömä aditinätö̧. Ja̧'hua̧nö̧ ji̧yä̧cu̧ Moisésmä TÖ̧Ä̧NÄ̧HUA̧ i̧mi̧nä̧ adiutä̧ ja̧ pä'ö ucuocu ku̧ni̧nö̧.