¹ Bezalel acacia dauttö i̧so̧ca̧ aditinö. Öotomä ttö̧yö̧'ca̧ri̧ da'are kä'co jo̧mȩ ji̧na̧'a̧; öcähuemä ttö̧yö̧'ca̧ri̧ yaute kä'co jo̧mȩ ji̧na̧'a̧; ja̧hua̧ta̧'a̧nö̧ jö'tojucu öotomä ttö̧yö̧'ca̧ri̧ yaute kä'co jo̧mȩ ji̧na̧'a̧. ² Ja̧u̧mä̧ päcuäi orottötä tuhuepinö acuänämä ja̧hua̧ta̧'a̧nö̧ u̧mi̧nä̧mä̧ päcuäi orottö jȩpi̧nö̧ ja̧hua̧ta̧'a̧nö̧ jäyä jähuä orottö aditinö jäyä huä̧mä̧ jo̧mȩ. ³ Ja̧u̧mä̧ pa̧ja̧cuä̧nö̧ oro kuicu a̧tti̧cu̧ ttöto'che i̧so̧mu̧ pa̧ja̧cuä̧ tti̧jä̧pu̧ huotö ja̧'a̧tä̧, ttöto'che i̧so̧mu̧ daure jähuänämä kara jäyänänö, ja̧hua̧ta̧'a̧nö̧ ttöto'che i̧so̧mu̧ dauremä kara jäyänänö. ⁴ Ja̧u̧mä̧ acacia dauttö ttöttä'ca aditinö ja̧hua̧ta̧'a̧nö̧ jättäyä'ca oronä tuhuepinö. ⁵ Ja̧u̧mä̧ ttöttäcamä ttöto'che i̧so̧mu̧ jahuä i̧so̧ca̧ jäyänä, i̧so̧ca̧ ttȩpa̧ pä'ö ja̧'a̧ pä'ömä. Ja̧u̧mä̧ päcuäi orottö micuäpi aditinö i̧so̧ca̧ ja̧'a̧tȩu̧. ⁶ Öotomä ttö̧chu̧'ca̧ri̧ daure kä'co jo̧mȩ ji̧na̧'a̧, ja̧hua̧ta̧'a̧nö̧ öcähuemä yaute ttö̧chu̧'ca̧ri̧ kä'co jo̧mȩ ji̧na̧'a̧. ⁷ Bezalalmä orottö 'tatapö aditinö querubin ta̧ju̧ru̧ i̧so̧ca̧ mi̧ȩcuo̧ca̧ to̧ca̧rȩ ja̧'a̧tȩu̧. ⁸ Ya̧tȩmä̧ pä̧tȩcuä̧nö̧ i̧so̧ca̧ micuäpi pä̧tȩcuä̧nö̧ päteö, ja̧hua̧ta̧'a̧nö̧ ka̧ra̧ querubimä karanä pä̧tȩcuä̧nö̧ jäyänänö. Adicui'a ji̧na̧'a̧ yaute jähuänätä̧ i̧so̧ca̧ mi̧ȩcuo̧'ca̧ jähuänätä̧. ⁹ Querubi öjabämä jö'tojucu 'cä̧ȩcuä̧ri̧na̧ ja̧hua̧ta̧'nö̧ a̧cuä̧jä̧mä̧ i̧so̧ca̧ mi̧ȩcuo̧'ca̧ cuä̧mȩ i̧jȩcuä̧ri̧na̧. Querubintömä ka̧ra̧ ka̧ra̧cu̧ pä̧tȩcuä̧nö̧ ki̧nä̧tö̧ ja̧hua̧ta̧'a̧nö̧ to̧pä̧ri̧nä̧tö̧ i̧so̧ca̧ mi̧ȩcuä̧räpi kä'co päteö jo̧mȩ. ¹⁰ Bezalel acacia dauttö mesaisodä aditinö. Öotome ttö̧chu̧'ca̧ri̧ daure jo̧mȩ ji̧na̧'a̧, öcähuemä ttö̧chu̧'ca̧ri̧ yaute jo̧mȩ ji̧na̧, ja̧hua̧ta̧'a̧nö̧ jutocu öotomä ttö̧chu̧'ca̧ri̧ yaute kä'co jo̧mȩ ji̧na̧'a̧. ¹¹ Ja̧u̧mä̧ päcuäi orottö tuhuepinö ja̧hua̧ta̧'a̧nö̧ jäyänämä päcuä'i orottö jäyänä ku̧nä̧huä̧ ku̧ni̧nö̧ isodänämä. ¹² Ja̧u̧mä̧ huä̧nä̧huo̧mȩmä̧ yaute ttö̧chu̧'ca̧ri̧ jo̧mȩ jina'a öcähuemä, jäyänämä orottö jȩpi̧nö̧ jäyänä jähuämä. ¹³ Ja̧u̧mä̧ pa̧ja̧cuä̧nö̧ jo̧mȩnä̧ orottö kuicu dainö ttöto'che i̧so̧mu̧ ja̧hua̧nö̧ jȩpö̧ ijicuä päteö pa̧ja̧cuä̧nö̧ ttöto'che i̧so̧mu̧ jähuhäcu todecuächönä jȩpi̧nö̧, ttö̧jä̧pu̧ pa̧ja̧cuä̧nö̧ kä̧jä̧mȩ. ¹⁴ ttöto'che i̧so̧mu̧mä̧ todecuänö ki̧na̧'a̧ ttötta'ca kä̧cuo̧mȩ adiu jä̧cua̧'a̧nö̧, mesa isodä cättepönä kä̧cua̧'a̧nö̧. ¹⁵ Acacia dauttö aditinö oro tuhhuepinö ttöttacamä o̧'quȩmä̧, ja̧hua̧nö̧ jö̧nä̧tä̧ 'cättepacuanö meso isodämä. ¹⁶ Ja̧u̧mä̧ koro juei aditinö mesa isodänä ka̧cua̧ pä'ö: sä̧srä̧mi̧yä̧'i̧nä̧, huȩ'chä̧qui̧yä̧'i̧nä̧, o̧'ta̧hui̧yä̧'i̧nä̧ ja̧hua̧ta̧'a̧nö̧ ttahua pä'ö huä̧o̧cuo̧ta̧'i̧nä̧ tti̧ä̧rȩ iyähuä totta'a pä'ö. Ja̧u̧mä̧ päcuäi orottö aditinö. ¹⁷ Ja̧u̧mä̧ lampari̧yu̧ ku̧nä̧huä̧cä päcuäji orottö 'ta'ö aditinö. Ja̧u̧mä̧ lampari̧yu̧ ku̧nä̧huä̧cämä̧ kada'ca 'chu̧huä̧ro̧mȩ ku̧nö̧ aditinö. O̧ta̧hui̧yä̧'i̧nä̧, öjohuiyä 'chu̧huä̧ro̧mȩ'i̧nä̧, ja̧'hua̧ta̧'a̧nö̧ ku̧nä̧huo̧mȩ 'chu̧huä̧ro̧mȩ'i̧nä̧ o'cajuiuyötä ji̧nä̧ ji̧yȩtȩnä̧ 'chu̧huä̧ri̧na̧'a̧. ¹⁸ Seisnö jo̧mȩnä̧ öjohuiyä ka̧cui̧na̧'a̧ o'cajuiyönämä, pätecua'anämä huäbodäcuä öjohuiyä jo̧mȩnä̧ ja̧'hua̧ta̧'a̧nö̧ pätecua'anä'inä huäbodäcuänö jo̧mȩnä̧ lampari̧yu̧ ku̧nä̧huä̧cänämä ka̧cui̧na̧'a̧. ¹⁹ Ä̧cuo̧mȩnä̧ öjonemä huä̧bo̧'ta̧cuä̧ jo̧mȩnä̧ almendro ä̧'u̧ttö̧ adicuä jä̧'i̧nö̧'a̧nö̧ jö̧ o̧'ta̧, kada'ca 'chu̧huä̧rö̧nä̧ jö̧nä̧, juhua'atäcu ä̧'u̧'i̧nä̧, ja̧'hua̧ta̧'a̧nö̧ kara'anä öjonämä huä̧bo̧'ta̧cuä̧ jo̧mȩnä̧ almendro ä̧'u̧ttö̧ adicuä jä̧'i̧nö̧'a̧nö̧ jö̧ o̧'ta̧ ki̧na̧'a̧, kada'ca 'chu̧huä̧rö̧nä̧ jö̧nä̧, juhua'atäcu ä̧'u̧'i̧nä̧, seisnö öjohuiyämä yorätehuinö lampari̧yu̧ ku̧nä̧huättömä umi ja̧'a̧cu̧ setächi'önä. ²⁰ Lampari̧yu̧ ka̧cuä̧cä jicänä̧tä kä'co jo̧mȩmä̧, pa̧ja̧cuä̧nö̧ o̧'ta̧ almendro ä̧'u̧ttö̧ adicuä jä̧'i̧nö̧'a̧nö̧ jö̧ o̧'ta̧, kada'ca 'chu̧huä̧rö̧nä̧ jö̧nä̧, juhua'atäcu ä̧'u̧'i̧nä̧ ki̧na̧'a̧. ²¹ Ä̧cuo̧mȩnä̧ todäre öjohuiyä dȩa̧'a̧mä̧ ji̧yȩnä̧tä̧ todehuina'a ja̧'hua̧ta̧'a̧nö̧ todäre päi'önä öjohuiyämä dȩa̧'a̧mä̧ i̧so̧'ta̧ jacuä jö̧nä̧ 'chu̧huä̧ri̧na̧'a̧ ja̧'hua̧ta̧'a̧nö̧ ji̧yȩnä̧tä̧ 'chuhuärönä tedehuina'a. Ja̧'hua̧nö̧ jö̧ ta'anö Huäbodäcuä päi'önä ka̧cu̧ öjohuiyä dȩa̧'a̧mä̧ i̧so̧'ta̧ jacuä jö̧nä̧ 'chu̧huä̧ri̧na̧'a̧ ji̧yȩnä̧tä̧ 'chuhuära̧'a̧ tedeönä. ²² O'cajuiyönätä̧ yorätehuina'a seisnö öjohuiyä lampari̧yu̧ ku̧nä̧huäcättö u̧mi̧cu̧ setächi'önä ki̧nö̧mä̧. 'Chu̧huä̧rö̧ o̧'ta̧'i̧nä̧ ja̧'hua̧ta̧'a̧nö̧ öjohuiyä'inä ji̧yȩnä̧tä̧ 'chu̧huä̧ri̧na̧'a̧, ya'utetä jö̧nä̧ 'ta'ö adicuina'a päcuäji orottömä̧. ²³ Bezalelmä lampari̧yu̧ ku̧nä̧huäcä'i̧nä̧ aditö kä̧nö̧mä sietenö jo̧mȩnä̧ lampara̧ o̧yu̧, 'chuhuädäcuähuä ocä'inä ja̧'hua̧ta̧'a̧nö̧ sä̧rä̧bi̧yä̧ o̧bä̧cu̧'i̧nä̧ päcuäji orottö aditinö, ²⁴ Ja̧u̧mä̧ lampari̧yu̧ ku̧nä̧huäcä'i̧nä̧ aditö kä̧nö̧mä, o̧'ta̧hui̧yä̧mä̧ päcuäji orottö ya'ute talento jo̧mȩttö̧ aditinö. ²⁵ Bezalelmä incienso ku icu iyähuome'inä aditinö. Ja̧u̧mä̧ acacia dauttö aditinö. Öotomä ya'ute ttu̧yu̧'ca̧ri̧ öoto jo̧mȩnä̧ ji̧na̧'a̧ ja̧'hua̧ta̧'a̧nö̧ öcähuemä ya'ute ttu̧yu̧'ca̧ri̧ jo̧mȩtä̧ juhua'atäcu ju'tojucumä todäre ttu̧yu̧'ca̧ri̧ öoto jo̧mȩtä̧. Ä̧ja̧ o̧na̧mä̧ ji̧yȩnȩä̧tä̧ todeu 'chu̧huä̧rö̧nä̧ ki̧na̧'a̧. ²⁶ Ja̧u̧mä̧ incienso ku icu iyähuomemä päcuäji orottö tu'epö aditinö, huä̧mȩnä̧'i̧nä̧, jäyänä'inä juhua'atäcu ä̧ja̧hui̧yä̧ onanä'inä. Ja̧'hua̧ta̧'a̧nö̧ ja̧u̧mä̧ jäyä bȩi̧pä̧ro̧mȩmä̧ orottö aditinö. ²⁷ Ja̧u̧mä̧ to̧bö̧rȩ beipome dȩa̧'a̧nä̧ pätecu be'epö rö̧nä̧huä̧ jö̧nä̧ aditinö. Ja̧u̧ o̧bö̧nä̧mä̧ i̧so̧'quȩ rä'ädö ku icu i̧yä̧huo̧ca̧ ti̧ttä̧da̧ pä'ö ji̧na̧'a̧. ²⁸ Ja̧u̧mä̧ acacia dauttö o̧'qui̧yä̧mä̧ aditäji'ca̧ orottö tu'epö aditinö. ²⁹ Ja̧u̧mä̧ a̧dȩja dahuecuoya'inä ja̧'hua̧ta̧'a̧nö̧ incienso adiu ameu'inä, ameu aditä'ija'anö jȩpö̧ aditinö.