¹ ja̧hua̧nö̧ ja̧'a̧ Bezalel i̧nä̧ Aholiab i̧nä̧ ja̧hua̧ta̧nö̧ o'catoinä korojueu jȩä̧cuä̧huä̧ ttu̧ttȩpä̧ru̧nä̧ huo̧tö Tu̧ä̧nä̧hua̧ ttu̧ttȩpä̧ru̧nä̧ i̧yä̧ujä̧ju̧ o'cajuiyunä̧ adicuänä ro̧o̧mȩ ttaditape, Tö̧ä̧nä̧hua̧ hueutanö̧tä̧ ttaditape ka̧cuä̧tö̧." ² Moises Bezalelrö huopinö, Aholiabrö i̧nä̧ ja̧hua̧ta̧nö̧ o'catoinä Tö̧ä̧nä̧hua̧ korojueö adicuä̧nä ttö̧ttȩpä̧rö̧nä̧ i̧yä̧jä̧ju̧rö̧ i̧nä̧, ja̧hua̧ta̧nö̧ ttami̧ iso'quinämä adijuajue ttaditapetä pä̧huä̧ri̧ji̧nä̧ö̧. ³ Moisésrö Israel ttö̧ja̧ o'cajuiyunä ttiäre iyähuä Ro̧o̧mȩ ttaditape ttiyäjäjimä ȩmi̧nä̧tö̧. ttö̧'ja̧mä̧ yitutä amocuädö päimo̧ro̧joa jö̧ta̧nö̧ ttiäre iyähuä i'cachinätö Moisésrö ttiyape ⁴ ja̧hua̧nö̧ ja̧'a̧ o'catoinä huo̧ju̧nä̧ adicuä ttö̧'ja̧ Ro̧o̧mȩ ttaditumä̧ ttaditäjäyuttutä topu aditinätö̧. ⁵ de'a jähuättö korojueö joepö adicuä ttö̧'ja̧mä̧ Moisésrö päinä̧tö̧: "ttö̧ja̧mä̧ Tö̧ä̧nä̧hua̧ tadiptape hueäji ja̧jä̧ji̧ rȩcuä̧ri̧jo̧mȩttö̧nä̧ abonä̧nö̧ i'cächätöto". ⁶ ja̧hua̧nö̧ ja̧'a̧ Moisésmä juȩnȩ tti̧ja̧cuo̧mȩttö̧ o'cato̧i̧nä̧ ttiäre iyähuä Ro̧o̧mȩ ttaditape ttiyäjäji jä̧jä̧ji̧ cättädiape hueinö̧. ja̧hua̧nö̧ ja̧'a̧ttö̧ ttö̧'ja̧mä̧ ttiyäji jä̧jä̧ji̧mä̧ cäädiinä̧tö̧. ⁷ juätumä ttaditapemä̧ rȩcuä̧ri̧ju̧mä̧ juiyiyunä ri̧ä̧nä̧ ku̧nä̧ri̧nä̧tu̧. ⁸ ja̧hua̧nö̧ ja̧'a̧ o'catoinä adicuä ttö̧'ja̧mä̧ yitutäcu aditinätu Dios u̧jodemä, dieznö tto̧ȩcuä̧ta̧ jo̧mȩnä̧ jȩpi̧nä̧tö̧ ja̧u̧ o̧ta̧mä̧ ji̧na̧a̧ pu̧jä̧ta̧ a̧di̧huä̧ta̧ttu̧ i̧nä̧ ovejas i̧jȩta̧ttö̧ ja̧'tu̧u̧nä̧ adicuattö i̧nä̧, ja̧hua̧ta̧nö̧ päruunä̧ adicua adicuattö i̧nä̧, tuunä adicuattö i̧nä, DIOS umuäyotu tta̧'cua̧juȩna̧ pu̧jä̧ta̧nä̧ ru̧nu̧ aditinätö̧, pi̧yȩ pi̧yȩmä̧ Bezalel aditähuä ja̧a̧, dea jähuättö korojueu joepu adicuä ri̧ä̧nä̧ huo̧ju̧nä̧ hua̧. ⁹ pu̧jä̧ta̧ uotomä 28nö ttömu̧nä̧ mȩö̧ pa̧ja̧cua̧ ji̧na̧'a̧. o'cajuiyunä pu̧jä̧ o̧ta̧mä̧ yorätecuäunätä̧ ji̧na̧'a̧, ¹⁰ Bezalelmä̧ cinconö tto̧ȩcua̧ta̧ ji̧na̧yo̧mȩtȩ jȩpi̧nö̧ ko̧ro̧ta̧cu̧ ju̧nä̧, ja̧hua̧ta̧nö̧ koro o̧ta̧ i̧nä̧ ji̧nä̧yo̧mȩtȩ jȩpi̧nö̧ ko̧ro̧ta̧cö̧ jö̧nä̧. ¹¹ ja̧u̧mä̧ hue'ca ja̧'chö̧nä̧mä̧ ja̧'tuö̧u̧nä̧ tuepinö jäyänä koro yoräteö ttoecuä̧ o̧tä̧ rä̧mȩhuo̧mȩ jöbu, yoräteunätä̧ jȩpi̧nö̧ koro todäre o̧ta̧ jäyänä i̧nä̧. ¹² ja̧u̧mä̧ cicuentanö̧ hue'ca jo̧mȩnä̧ a'canä̧ o̧ta̧nä̧ i̧nä̧ ja̧hua̧ta̧nö̧ cincuentanö hue'ca jo̧mȩnä̧ koro todäre o̧ta̧ beipome i̧nä̧ jȩpi̧nö̧. ja̧hua̧nö̧ ja̧a̧ttö̧ ja̧u̧ o̧ta̧mä̧ pä̧tȩcua̧nö̧ jö̧nä̧ ji̧na̧'a̧. ¹³ ja̧u̧mä̧ cincuentanö̧ ppi̧ȩcuä̧ ocä orottö adicuaa jȩpi̧nö̧ ja̧hua̧nö̧ jȩpö̧ Tö̧ä̧nä̧hua̧ ö̧jode ttoecuä o̧ta̧ ji̧nä̧ yo̧mȩtȩ päiönä jȩpi̧nö̧. ¹⁴ Bezalelmä̧ cabra i̧jȩta̧ jähuättö jȩpi̧nö̧ Dios u̧jode huä̧mȩnä̧ isode ttoepunä̧ aditape; ja̧u̧mä̧ oncenö̧ jo̧mȩnä̧ jȩpi̧nö̧ pi̧yȩ o̧ ta̧mä̧. ¹⁵ uotomä treintanö̧ ttö̧mu̧nä̧ mȩö̧ pa̧ja̧cuo̧mȩ ji̧na̧a̧, yaate tto̧ȩcuä̧ta̧ icähuetä cuatronö̧ ttö̧mu̧nä̧ mȩö̧ pa̧ja̧cuo̧mȩ ji̧na̧'a̧. yaacunä ttoecuä o̧ta̧ oncenöjö̧ i̧ri̧ä̧mä̧ yoräteunätä̧ ji̧na̧'a̧ ¹⁶ ja̧u̧mä̧ ji̧nä̧ yo̧mȩtȩ päiönä jȩpi̧nö̧ cinconö̧jö̧ tto̧ȩcuä̧ o̧ta̧ yaacunä̧ i̧nä̧ ja̧hua̧ta̧nö̧ koro seisnö̧ o̧ta̧ yaacunä̧ i̧nä̧. ¹⁷ ja̧u̧mä̧ cincuentanö̧ hue'ca jo̧mȩnä̧ jȩpi̧nö̧ tto̧ȩcuä̧ o̧ta̧ jäyä a'canä̧ ji̧nä̧yo̧mȩtȩ ka̧cuö̧nä̧ i̧nä̧, ja̧hua̧ta̧nö̧ cincuentanö̧ hue'ca jo̧mȩnä̧ pu̧jä̧ta̧ ja̧ya̧ra̧nä̧ to̧dä̧rȩ päiönä ji̧nä̧yo̧mȩtȩ ka̧cuö̧nä̧ i̧nä̧. ¹⁸ Bezalelmä cincuentanö̧ ppi̧ȩcuä̧ o̧cä̧ Bronzettö aditinö̧ isode pu̧jä̧ta̧ttö̧ adicuode yaatetä jö̧nä̧ jȩa̧pe. ¹⁹ ja̧u̧mä̧ jȩpi̧nö̧ Dios u̧jode ttoecuä jähuämä oveja ubo i̧jȩta̧ tuunä tuecuattu i̧nä̧, ja̧hua̧ta̧nö̧ korotu isotu tti̧jȩta̧ adinä̧nö̧ ju̧ttö̧ kö̧ni̧nö̧ pi̧yȩnä̧mä̧. ²⁰ Bezalelmä Dios u̧jode jähua jȩpi̧nö̧ acacia dau odiyättö jueunä ku̧nä̧'chö̧. ²¹ dau isodä uotomä dieznö ttö̧mä̧nä̧ mȩö̧ pa̧ja̧cuo̧mȩ ji̧na̧'a̧ ja̧hua̧ta̧nö̧ icähuemä̧ yaate ja̧a̧na̧ kara ka'conö̧ jö̧nä̧ ttö̧mu̧nä̧ mȩö̧ pa̧ja̧cua̧mȩ ji̧na̧a̧. ²² yaacunä dau odiyänämä o̧cä̧hui̧yä̧ taare jo̧mȩnä̧ dau isodättö adicua ki̧na̧a̧ dau isodä ji̧nä̧yo̧mȩtȩ päiönä̧ ka̧ja̧pe. o'cajuiyunä Dios u̧jode jacuä ka̧cö̧ dauodiyänämä̧ pa̧a̧nö̧tä̧ jȩpi̧nö̧. ²³ ja̧u̧mä̧ pa̧a̧nö̧tä̧ jȩpi̧nö̧ Dios u̧jode jacuä o'cajuiyunä dau odiyä ka̧cö̧nä̧mä̧: veintenö Dau odiyä kä̧hua̧ ieröhua petecu. ²⁴ Bezalelmä cuarentanö jo̧mȩnä̧ kada'ca jähuä plata jähuättö aditinö̧ dau odiyä kada'canä ö̧ju̧na̧pe, taare jo̧mȩnä̧ ki̧na̧a̧ kada'ca jähuä dau odiyä̧ dȩa̧ ji̧nä̧ yo̧mȩtȩ u̧jö̧na̧pemä̧. yaacunä taare kada'ca jähuä kina̧a̧ koro dau odiyä ji̧nä̧ yo̧mȩtȩ ka̧ja̧pe. ²⁵ Dios u̧jode u̧yu̧'ca̧ri̧ karanämä, kä̧hua̧ ieröhua päteucö, ja̧u̧mä̧ dau odiyä veintenö̧ jo̧mȩnä̧ i̧nä̧ aditinö ²⁶ ja̧hua̧ta̧nö̧ cuarentanö kada'ca jähua plata jähuättö i̧nä̧. ka̧cui̧na̧ taare kada'ca jähuä dau isodä a'canä ö̧ju̧nä̧jodänä, taare kada'ca jähuä ki̧na̧'a̧ korodä dau isodänä i̧nä̧ ja̧hua̧ta̧nö̧ jua̧a̧nö̧tä̧ 'chö̧nä̧ beipome jöbu. ²⁷ Dios u̧jode ä'ca kä̧hua̧ mo̧ä̧cha̧ patecu a'canä jähuänämä, Bezalelmä jȩpi̧nö̧ dau odiyä seisnö jo̧mȩnä̧. ²⁸ ja̧hua̧ta̧nö̧ jȩpi̧nö̧ taare dau odiyä ö̧yu̧'ca̧ri̧ ju̧ a̧u̧cuä̧ Dios ö̧jode abo ja̧'a̧nä̧. ²⁹ pi̧yȩ dau odiyämä otonänö kä̧ȩpö̧ kö̧nä̧hua̧ ki̧na̧a̧ dȩa̧nä̧ma̧, ja̧hua̧nö̧ ja̧a̧nä̧ i̧so̧mu̧ttö̧ ji̧nä̧ yo̧mȩtȩ ki̧na̧a̧ huämenämä. ja̧u̧mä̧ pa̧a̧näö̧tä̧ jȩpi̧nö̧ taarecue ö̧yu̧'ca̧ri̧nä̧. ³⁰ ochonö dau odiyä ki̧na̧a̧, platattö adicuä kada'ca jähuäcu, dieziseisnö jo̧mȩnä̧ ki̧na̧a̧ o'ca juiyunämä, kada'ca jähuä taare jo̧mȩnä̧ dau isodä a'canä kodänä ki̧na̧a̧, ja̧hua̧ta̧nö̧ taare kada'ca jähuä korodä dau isodänä̧ i̧nä̧ ja̧hua̧ta̧nö̧ jua̧a̧nö̧tä̧ yaacu 'chö̧nä̧. ³¹ Bezalelmä jȩpi̧nö̧ o̧juä̧ acacia dauttö ppöracunä, Dios ö̧jode jäyänänö dau odiyä cinconö jo̧mȩnä̧, ³² cinconö o̧juä̧ dauodiyänä ppöracunä Dios ö̧jode jäyänä i̧nä̧, ja̧hua̧ta̧nö̧ Dios u̧jode kä̧hua̧ mo̧ä̧cha̧ päteöcö cinconö o̧juä̧ dau odiyänä ppöracunä i̧nä̧. ³³ ja̧u̧mä̧ i̧sä̧juä̧ dauttö adicuäjua̧ dau isodä kä'conä 'cuäoönä jȩpi̧nö, pi̧yȩmä̧, jo'tojuttömä kä'cotä ja̧'a̧, koro odiyäcu ppöracunä ja̧ja̧pe. ³⁴ oronä töepu icuinö dau odiyämä. i̧so̧mö̧ jähuä i̧nä̧ oronä töepinö, o̧juä̧ 'cuäopome adiö 'cuäopape ja̧hua̧ta̧nö̧ o̧juä̧ i̧nä̧ oronä töepinö. ³⁵ Bezalelmä jȩpi̧nö̧ pö̧jä̧ta̧ tto̧ȩcuä̧ta̧mä̧ ja̧'tö̧u̧nä̧, päruönä i̧nä̧, ovejas i̧jȩtä̧mä tuunä, ja̧hua̧ta̧nö̧ pu̧jä̧ta a̧di̧huä̧ta̧ttö̧ i̧nä̧, DIOS ömuäyotö isoppa isotö tta̧'cua̧jȩ räopönä, adicuä huo̧ja̧ adutähuä. ³⁶ ja̧u̧mä̧ jȩpi̧nö̧ ö̧yu̧'ca̧ri̧ jähuämä acaciia dauttö, oronä tuepökanö. ö̧yu̧'ca̧ri̧ jähuä 'chö̧ä̧rö̧ o̧cä̧ i̧nä̧ oronä turpinö, ja̧hua̧ta̧nö̧ ocuränä daicö jȩpi̧nö̧ plata jähuättö dȩa̧ jähuä cuatronö jo̧mȩnä̧ ³⁷ ja̧u̧mä̧ jȩpi̧nö̧ pö̧jä̧ta̧ tto̧ȩcuä̧ta̧ isode pu̧jä̧ta̧ttö̧ adicuode doächäcuähuome ä'ca. pu̧jä̧ta̧ ja̧'tö̧ä̧ta̧ttö̧, päruattö i̧nä̧, ovejas i̧jȩta̧ tuunä töecuä̧ta̧ttö̧ i̧nä̧, pu̧jä̧ta̧ a̧di̧hua̧ta̧na̧ jȩpö̧, pu̧jä̧ta̧ 'tu̧ä̧huä̧ ttö̧'ja̧ i̧sa̧ aditähuä. ³⁸ ja̧u̧mä̧ jȩpi̧nö̧ cinconö ö̧yu̧'ca̧ri̧ jähuä 'chuä̧rö̧ o̧cä̧cö̧. huä̧mȩnä̧ i̧nä̧ ja̧hua̧ta̧nö̧ o̧juä̧ i̧nä̧ oronätuepö icuinö. kada'ca jähuä cinconömä broncettö adicuina