¹ Inyalah iko' sok da bebas? Inyalah iko' diu ta rasul? Inyalah iko' ngalaka mile Yesus, Tuhan ite? Inyalah imu' diu ta hasil karajeko' ka sadat'n Tuhan? ² Kalo sa' mangkat'n sok lait'n iko' inya rasul, paling kati iko' diu ta rasul bagimu', Barang, imu' diu ta meterai karasulanko' ka sadat'n Tuhan. ³ Diahlah pambelaanko' tradap ayo kup'm da mariksa iko'. ⁴ Diu ta kai' kati umpu hak ya' uman ge' nyucur? ⁵ Diu ta kai' kati ani hak ya' minsakng sook da basaut'n da saiman, samu ulah rasul-rasul da lait'n, ayo-age Tuhan, ge' uga Kefas? ⁶ Ato, diu ta hanya Barnabas ge' iko' da kati ani hak ya' kati karaje? ⁷ Asilah da parnah ,mangabdi sabage tantara nige biaya'a sadi? Asilah da ngawan'a ka kabon anggur ge' kati uman buah'a? Ato, asilah da manggambala tarnak ge' kati nyucur susu'a? ⁸ Asilah iko' da muji' hal-hal diah manurut talino? Inyalah Hukum Taurat uga muji' hal-hal da samu? ⁹ Sa' ani da gat'n nulis ka sadat'n Hukum Taurat Musa, "Iya'lah ayo kup'm ngangkuhas lambu da sadakng mangirik gandum!" Diu ta lambu da sadakng Jabata mile? ¹⁰ Ato, diu ta nyansana demi ite? Ai', demi itelah hal dakoh gat'n nulis karna da mambajak harus mambajak ka sadat'n pangharapan ge' da mangirik harus mangirik ka sadat'n pangharapan ya' kaat'n bagian'a. ¹¹ Kalo kai' manabur bani rohani ka antara ayo kup'm diu ta marabeh kalo kai' uga manuai hal-hal materi umpat'n ayo kup'm? ¹² Kalo sok lait'n umpu hak diah ka samo imu', inya ta kai' labih barhak agi? Meskipun ladiah, kai' kati manggune hak dakoh. Sabalik'a, kai' nanggong sagala sasuatu supaya kai' kati mangkat'n suatu halangan bagi Injil Kristus. ¹³ Jailah imu' kati pane kalo ayo'a da ngaraje hal-hal da kudus dakoh, uman pangkuman umpat'n Bait Jabata uga? Ge', ayo'a da malayani ka altar ¹⁴ Ladakoh uga, Tuhan marintah ayo'a da nyarita Injil ya' idup umpat'n Injil uga. ¹⁵ Barang, iko' kati parnah ngiak nyitengpun umpat'n hak-hak diah. Ge', iko' kati nulis hal-hal diah supaya gat'n gat'n umas ulah dakoh ka iko'. Sa', labih bait iko' kabis daripada sook mangkilang kabanggaanko'. ¹⁶ Karna, kalo iko' nyarita Injil, iko' kati umpu alasanya' bamegah karna kawajiban dakoh ani ka samoko'. Calakalah iko', kalo iko' kati nyarita Injil. ¹⁷ Kalo iko' nyarita Injil karna kahendakko' sadi, iko' umpu upah. Barang, kalo diah inya kahendakko', diu ta tugas da gat'n pacaya ka iko'. ¹⁸ Kalo ladakoh, jailah upahko'? Upahko' diu ta sa' iko' nyarita Injil, iko buleh nyarita Injil tanpa upah ge' kati mansara'gune'a hakko' ka sadat'n Injil. ¹⁹ Barang, sa' walopun iko' bebas atas samaan sok, iko' jadi adupko' sadi hamba bagi samaan sok supaya iko' buleh mamanang'a labih karah agi. ²⁰ Bagi sok Yahudi, iko' jadi ulah sok Yahudi supaya iko' kaat'n mamanang'a sok Yahudi. Bagi sok da idup ka saroh Hukum Taurat, iko' jadi ulah sok da idup ka saroh Hukum Taurat (meskipun iko' sadi kati ka saroh Hukum Taurat) supaya iko' kaat'n manang ka ayo'a da ani ka saroh Hukum Taurat. ²¹ Bagi ayo'a da tanpa Hukum Taurat, iko' jadi ulah tanpa Hukum Taurat (inya tanpa hukum Jabata, tapi ka saroh hukum Kristus) supaya iko' kaat'n manang ayo'a da tanpa Hukum Taurat. ²² Bagi sok da lamah, iko' jadi lamah supaya iko' kaat'n manang ayo'a da lamah. Iko' ngalaka jadi sagala sasuatu bagi samaan sok supya nige sagala cara iko' kaat'n nyalamat mani ungan sok. ²³ Iko' bulah samaan diah demi Injil supaya iko' buleh kaat'n bagian ka sadat'n'a. ²⁴ Kati pane ta imu' kalo ayo'a da talama ka sadat'n suatu partandingan samaan'a talama, tapi hanya nyungan da narima hadiah? Jadi, talamalah sadamikian supaya imu' kaat'n'a! ²⁵ Satiap sok da batanding balatih manguasai adup ka sadat'n sagala hal. Ayo'a da bulah'a ya' narima mahkota da fana, tapi ite ya' kaat'n da abadi. ²⁶ Sa' ladakoh, iko' kati talama ulah dakoh tanpa tujuan. Iko' kati ninju ulah sok da ninju angin. ²⁷ Barang, iko' malatih unganko' nige karas ge mangguasai'a supaya sa iko' laka nyarita Injil ka sok lait'n, iko' sadi kati gat'n nolak.