¹ Waktu salah satu umpatn imu' ani da basalisih nige' da laitn, barani'a ini' anu najo kaadilan ka hadapan ayo sok kudus? ² Ani'a imu' kati' pane bahwa ayo sok kudus ao' manghakimi dunia? Sak imu da manghakimi dunia, ani'a imu' kati' patut ya' mangadili pakare-pakare da paling inek? ³ Ani'a imu' kati' pane bahwa ite' ao' mangadili ayo malaikat? Apalagi hanya pakare-pakare da biasa da bilakng kano! ⁴ Jadi, sak imu' manghadap pakare-pakare da biasa ulah dakoh, jailah imu' minsakng'a ka ayo da kati' gatn ngitong sadatn jemaat? ⁵ Iko' muji' diah supaya mu' mangun. Kati' ani'a nyungan ka antaramu' da bijaksana, da aba' mangurus pakare-pakare ka antara age-age'a? Malahan, antara age nige' age anu najo kaadilan ka hadapan ayo sok da kati' pacaya. ⁷ Sabanar'a, nga jadi kagagalan kaimu' karna imu' ani umpu pakare-pakare hukum ka antara kupm. Jailah imu' kati' labih suka gatn mansara? Jailah imu' kati' labih suka gatn ngarugi? ⁸ Sabalik'a, adupmu' ta da basara ge' da umas rugi. Bahkan, imu ta da umas daladakoh taradap ayo agemu'. ⁹ Ani'a imu kati' pane bahwa sok da kati' taman kati' ao' mawarisi Karajaan Jabata? Iya' sasat! Ayo sok cabul, ayo da nyambah barhala, ayo sok da babayu, bencong, ayo da suka are-samu are, ¹⁰ ayo parangko, ayo da sarakah, ayo pamabuk, ayo da suka mampitna, ge panipu-panipu, samaan ayo'a kati' ao' mawarisi Karajaan Jabata. ¹¹ Maniungan umpatn imu' uga samu dakoh. Tapi, imu' ngalaka gatn marasih, laka gatn ngudus, ge' laka gatn ngataman sadatn gaatn Tuhan Yesus Kristus ge' sadatn Roh Jabata ite'. Ngajauhlah hal Babayu ¹² Samaan hal kaiko gatn buleh ta, tapi kati' samaan bagune. Memang samaan hal kaiko' gatn ngabuleh ta, tapi iko kati' tuh gatn parhamba wak jai pun. ¹³ Pangkuman ya' putukng, ge' putukng ya' pangkuman, tapi Jabata ao' mambinasa kadua-dua'a. Ungan inyata ya' babayu, tapi ya' Tuhan ge' Tuhan ya' ungan. ¹⁴ Jabata mangkidup Tuhan ge' uga ao' mangkidup ite' ya' kuasa-A. ¹⁵ Ania imu' ti' pane bahwa unganmu' anilah anggota-anggota Kristus? Ani'a imu' ao' nangkap anggota-anggota Kristus ge' umas ayo'a jadi anggota-anggota lonte? Kati' ata! ¹⁶ Ania imu' kati' pane bahwa sok da ningo' adup'a ka lonte ngajadi nyiteng ungan ge' ini'? Sabab, Ini' muji', "Kadua'a ao' ngajadi nyiteng dagin." ¹⁷ Tapi ao' a, sok da ningo' adup'a ge' Tuhan ngajadi nyiteng roh ge' Ini'. ¹⁸ Ngajauh ta dababayu! Satiap duse laitn da sook umas anilah ka sato ungan'a, tapi sok da babayu, baduse ka ungan adup'a. ¹⁹ Ania imu kati' pane bahw unganmu' anilah ramin Roh Kudus, da ani kasadatn imu', da mu' narima umpatn Jabata, ge' bahwa adupmu' inya ta adupmu' sadi' da umpu? ²⁰ Sabab, imu' laka gatn nabos nige' harga da lunas. Karna dakoh, nangamulia ta Jabata nige' unganmu'!