¹ Ge' sa' iko' utukng ka imu', ayo-age, iko' kati utukng hebat sarat'n ato hikmat ya' nyarita rahasia Jabata ka imu'. ² Sa' ko' mutus'a ya' kati pane jaipun ka samaan imu' salait'n manurut Kristus Yesus, ladakoh ini' da gat'n nyalib. ³ Iko' samahu nigemu' ka sadat'n da lamah, ka sadat'n da buut ge' sampe bakutur. ⁴ sarat'nko' atopun baritako' inya ka sadat'n sarat'n hikmat da pasti, tapi nige bukti Roh ge' kuasa, ⁵ Biar imanmu' kati badasar ka hikmat talino, salait'n ka kuasa Jabata. Jabata Muji Hikmat-A Nabo Roh ⁶ Kai' muji hikmat ka antara ayo'a da dewasa, tapi inya hikmat jaman diah ato umpat'n panguasa-panguasa jaman diah da aok gat'n mangkuhas, ⁷ Salait'n kai' da muji'a hikmat Jabata ka sadat'n rahasia, hikmat da basukat'n da ka Jabata tatap da tinga pamule jaman ya' kamuliaan ite. ⁸ Kati ani panguasa-panguasa jaman diah da nganal'a. Sa', pama ayo'a laka nganal'a, ayo'a kati aok parnah nyalib Tuhan da mulia. ⁹ Barang, ulah da gat'n nulis, "Jai da kati parnah matu mile, ge' rajak kati parnah gat'n dangah, ge' tinga parnah mungkas ka sadat'n ate talino, samaan dakoh Jabata ngalaka nyadia ya' ayo'a da mangasihi-A." ¹⁰ Barang, Jabata ngalaka muji' hal-hal diah ka ite nabo Roh sa Roh nyalidik samaan hal, sampe ka sadat'n Jabata. ¹¹ Sa' asipun ka antara talino da pane hal-hal umpat'n talino salait'n roh talino da ani ka sadat'n'a? lakoh uga, kati ani sook da pane hal-hal umpat'n Jabata salait'n Rohj Jabata. ¹² Mati, ite ngalaka narima, inya roh umpat'n dunia, malait'n roh da umpat'n Jabata supaya ite kaat'n pane hal-hal da gat'n anugerah Jabata ka ite. ¹³ Hal-hal da uga kai' nyarat'n diah, inya ka sadat'n sarat'n da gat'n nabo hikmat talino, salait'n da gat'n ngajar nabo Roh nige ngabanding hal-hal da rohani nige da rohani. ¹⁴ Barang, talino da kati rohani kati narima hal-hal da rohani da brasal umpat'n Roh Jabata barang hal-hal dakoh ngarupa da baga bagi'a. Ini' kati kaat'n mahami'a barang hal-hal dakoh hanya kaat'n gat'n nilai sacara rohani. ¹⁵ Talino da rohani manilai samaan hal, tapi ini' sadi kati gat'n nilai asipun. ¹⁶ Sa', "Asipun da pane pikiran Tuhan sahingga kaat'n nasehat'a?" da kai' umpu pikiran Kristus