Waiman nuha ta hi hawan i do gui Betesda. ¹ Bota pon beheu ta do Mat hari raya mat Yahudi ti Mam Yesus sa la Yerusalem. ² Do Yerusalem,do midin mabata Gerbang domba Gui aiha do ji ta ba hapu Ibrani fu be Betesda,i ni serambi ailim. ³ Do serambi ji,mat foi ta hi maf hi ne ti,mat ta i mo falek,mat ta i we kabuk,mat ta i bo gatei ( hi to ling be auja ta do gui manow). ⁴ Pon ta dum wolai ta Malaikat at Mam in le la gui be I manow auja. Mancu ta matan in le la gui bai nunta auja imanow, i hawan po panyakit beheu ta do do im'tem. ⁵ Do ji, mat nuha ta inmaf na tahun 38. ⁶ Bota Mam Yesus I neng ta ido n'ne ti do ji ti innu heu,mat ne inmaf uilit heu,Mam Yesus intun i,"Au pasu ta be au hawan i?" ⁷ Mat ta inmaf ji be jawab," Mam,mat tai katuk la gui ne bai nunta auja imanow do po,woti ine bai nunta ak magalas be ka le,mat naha hi le nata heu." ⁸ Mam Yesus Infu be i,"M'sol! M'bas au kin ne ti au bo," ⁹ Bai nun pedo,mat ji hawan,in bas i kin,ti i bo.Woti wolai ji e wol sabat' ¹⁰ Woti ji,mat Yahudi hi fu be mat ta i hawan heu ji,"Wol ne e wol sabat,Au m'bas au kin i na." ¹¹ Woti,i be jawab,Mat ta ihawan aka,Infu be aka,M'bas au kin tiu bo." ¹² Hi tun i,"He manta infu be au na,"m'bas au kin ti bo?" ¹³ Woti,mat ta hawan ji,inutei Iji mana teta Mam Yesus ta isun la mat kawas ta to do nu ji. ¹⁴ Bota poi ji,Mam Yesus bot i hoi do Kautuhelpo i deu ti infu be i," M'ngo,Au hawan heu.Hamol dosa cana o be hal fitei ji jai cana be au. ¹⁵ Mat ji i bo ti ifalus be mat Yahudi fu Mam Yesus tei In be i. ¹⁶ Peto,mat yahudi hi kanca Mam Yesus pota I hamol pon beheu ji ba wol sabat. ¹⁷ Woti,Mam Yesus Infu be hi,"Hagaine Ak Mam i karjan cade,peto Ak ne mone karjan cade. ¹⁸ Jawab ji be hagara mat Yahudi hi ulu be hi pun Mam Yesus,bukun woti ponta Mam Yesus I nalanggar wol sabat po,laiye ponta Infu Kautuhelpo be I mam,berarti I be diri sama dum Kautuhelpo. Kawasa Kautuhelpo do Mam Yesus. ¹⁹ Bota,Mam Yesus be jawab be hi," Membe,Aka fu be aua,wai e I hamol pon ha poi diri n'mei gapo,membe ineng I mam I pakarjan tei;ponta I mam I karjan ji,I wai ji mone I karjan. ²⁰ Ponta, I mam I lodel i ti pajat be I wai ji pon beheu ta I hamol,ti I mam ji mone pajat be I pakarajan aita kaliu hoi be min maheran. ²¹ Ponta sama sati Mam injui hoi mat ta inmat ti i be hidop be hi,sati iwai I be hidop be mat ta ilodel hi. ²² Mam I nahakim mat nuha mone po,woti I be hal aiji beheu be I wai, ²³ Be mat beheu hormat I wai sama sata hi hormat I mam.Mat ta ihormat I wai tei,I mam ta I pasul mone hormati po ²⁴ Membe Aka fu be aua,mat ta inango ponta Aka fu ti i parca be I tai pasul Aka i nepen hidop ta kekal,ti isun la penghakiman po ponta inggai po papmat la hdop ta kekal. ²⁵ Membe Aka fu be aua,waktu i bot ti i bot hakaran ne heu,aiye mat ta inmat ngo wai Kautuhelpo I nga ti hi ta ngo ji hidop. ²⁶ Pota sati Mam i ni hidop ta doi diri n'mei,sati fudo I be be I wai hidop ta do do I, ²⁷ ti Mam I be Kawasa be I wai be I tei nahakim pota I ye wai Mancu. ²⁸ Maheran po hal aine na membe bot iwaktu mat beheu ta to do kufut hi ngo I nga. ²⁹ ti hi hapan,aiye hi ta hamol ponta fi hepen kebangkitan hidop. Woti hi ta hamol ponta fitei hepen kebangkitan po penghakiman. ³⁰ Ak hamol pon ha mone gapo pok diri n'me i.Ak kahakim del ponta ak ka ngo ti Akka hakim e adil ponta akka sung bukun po ak long ,laiye po I lo tai pasul akka. Kesaksian po Mam Yesus ta I ye po Mam Kautuhelpo ³¹ Membe Ak bersaksi po Ak diri n'mei,Ak kesaksian i banat po. ³² Woti,naha pe kesaksian po akka,ti Ak kanu ta kesaksian ta I bebe Ak ji banat. ³³ Min pasul Yohanes ti i be kesaksian heu poi ta banat. ³⁴ Woti kesaksian ta ak tarimi bukun po mancu po.Ak kafu hal aine be min mepen halamat. ³⁵ Yohanes e palita ta pan ti be tarang ti min ta pasu ta be min hanang doi ta tarang. ³⁶ woti,kesaksian ta do do Aka pale nyet kesaksian ta do Yohanes.Ponta karjan beheu Ak Mam I behoi be Aka be Ak te selesaikan,aiye karjan ta ine Ak hamol,ta be kesaksian po Akka fu Ak Mam tei pasul Akka. ³⁷ Ti,Ak Mam pasul Akka mei Akka be ke kesaksian tentang Akka.Woti,dum min mangoi nga atau meng I m,cu. ³⁸ Ti,firman i do min lom i pode,pota dum min parca be I ta hi pasul i tei. ³⁹ Min pangajat buk suci ponta min lomfu do buk suci ji min mepen hidop ta kekal,ti buk suci i mone be kesaksian po Aka, ⁴⁰ ponta min bot sik tei be mepen hidop. ⁴¹ Bukun Ak tarimi kemuliaan po mancu po. ⁴² Woti Ak keng kanu min,ponta min nim kasih Kautuhelpo do min diri po. ⁴³ Ak kot ba Mam i m'san,woti min tarimi Ak po.Membe mat naha hi pot ba hi m'san hi,pasti min tarimi i. ⁴⁴ He na min parca lape,membe min tarimi pujian po mat nuha heu nuha woti m'sung pujian ta bot po Kautuhelpo po?. ⁴⁵ Lomsus ta ko kut min sik Mam na;Mat tai nut min e Musa,I ye mat ta min ma harap I. ⁴⁶ Ponta,membe min parca be Musa,min tu no parca be Aka teta Musa nakes tentang Aka. ⁴⁷ Wotita,membe min parca tei po ponta Musa nakes,he na min parca ponta kafu i?"