(Mekasu suna bisereinya peko tere Awa mang tetero nena) ¹ De ye ate bete akurung arma tere waru yau mie mro mro eyu re ate seiyunue Malaikat mekasu suna biserei nena damba,dua ende di yo kani damba da Awa mang tetero nena bu teu mekasu suna bisereinya ne eiyu ne peko tere yeu nate apa baya dirimbinde.'' ² Malaikat beisika pa na dua di eu nemane bu teu nena bupeko tere te apa da yo kani dambu durupuku,nepere kekou bisi bisi peko tere da nepe kiyapuku tetero seraibrabra srainya sa nena sengking semo wa ne kai wande nemane do sna sna te seso tipaini nena wa ne da mekai. ³ Malaikat bipa nane ye bu teu bu peko tere te nau damba durupuku damane nau nero ne sanimi wa mane da orupuku tetero no dua sou tete damba wande sasyaisi yereu nau eyu ne da werainya dua da sou. ⁴ Malaikat naming pa na nena bu teu bu peko tere te apa durupuku muse muse marwai wande bu ye tetainya nou meye na mane sanimi mane ouraipiki. ⁵ Nemane deye ate beta Malaikat nena waketupu detere arma tere bu damba meye keuna ate da seiyunue,''weye teme kiye,wena wa mro mro weye da kiye nou nue neme da kiye weye kaye te wasiye meye na mane. ⁶ Ne yo seraibrabra wena tetero mro mro seraibrabra nena wa sa nimi te apa diriyai wande Nabi seraibra nena wa sa nimi te apa diriyai damane we ye ne yo seraibrate sa waro te atoumue nete da emburu pa anenai damena waro ne yo seraibrabra nenei wane tikainainie.'' ⁷ De ye ate beta Mezbah dambere ate seiyainie,we Tuhan mang tetero,Awa mang tetero detere te da meye kiye,tepreinya nouru na teme te kiye ne dambere wena yeko kaye te da wasu na.'' ⁸ Malaikat aprau pa na nena bu teu bu peko tere te soning damba da durupuku,nepere soning te arma tere namu te ikine da tetero yei te sing namune baya dekenai. ⁹ Tetero yei sing namu ne wa te dekainya nemane ne ye Awa mang tetero te apeko senainie damena peko tere te da metere na mane mekoupuku.ne yo seraibra pepoi te na mekoipei Awa mang tetero nena poi tena seiyinipei. ¹⁰ Malaikat mekasu na bu teu bu peko tere te srainya sa nena betra damba da durupuku nena dia kepe kepe nenei peu te etiye da perai nena wa serai tere, ¹¹ Ne yo seraibra a peko tere te Awa mang tetero nena damba sero dia ne kainya pa damane ne yo seraibra nena wa serai tere ke kou bisi bisi nena wa nekai;nemane kembari pepoi tena mekoipei nenei wa te pepoi damba. ¹² Malaikat mekasu suna beisika nena bu teu bu peko tere te apa durupuku Efrat bu muse pa ne musena bu dua da keraupuku nou kreng kreng nipi te da mekambiki andewapana seraibra omo ture oto te dewa menai. ¹³ De ye dou tane Naga nena emburu,srainya sa nena emburu re wande Nabi temberarina nena emburu re aru Roh nisi kore na naming serei kiya pa dewa da mekai iro kna wa mane da, ¹⁴ Nemane damena aru Roh roh peko tere nena kembari waro bisi bisi te da mekai,nepere andewapo seraibra da yo kani dambena te nebei pa da beyu pera damba nai ya detere ya ne Awa mang tetero nena wake tuputena metere na mane detere tere keu na. ¹⁵ Dou te tende!A-I nedo neye bisi tetero mane dewa da mete.piyambaitie tetero nenei wa te sema te kenai mayong te titinai wane kenai damane tetero nena wana sate dou dou tenainie.'' ¹⁶ Damane aru Roh roh peko tere ne yo seraibrabra nebei pa kopirinainie ne nou wa do Ibrani peuna damane da Harmagedon. ¹⁷ Malaikat mekasu suna biserei nena bu teu bu peko tere te durupuku aru seku na damba,akurung arma tere waru ate betainie Awa mang tetero nena yau mie eyu re dai dia dai meta kreu meta dambere ate da seiyainie;kembari dua da mekapiki te nou pa dua da mekeya te nepe nene.'' ¹⁸ Nepere nemane eri kiya atoune warpa kurung dereunue a tipi tipi da yo kani damba detere tere da mekoupuku,tetero da yo kani dambena damena bete pere tikanipeinya wate da tupunsuku detere tere aye da masupuku. ¹⁹ Nemane dia yo detere baya deraipiki waro naming serei,apa da biriyai dia dia yo seraibrabra;wande Babel detere ne pa da Awa mang tetero neye mendo te mekou nue bu teu bu peko tere nena Anggur bu te dirimbine bu oro dere oro mane baipa da yepo ne. ²⁰ Nepere nemane kepou meye na mane dua karunai baya nai wande meko dabrabra dua da karunai baipa dua nai. ²¹ Bi bu oru mane detere doa mekasu 100 pon nena se dopre sero dambere apa da yonai tetero kna wa damba;damane tetero yei Awa mang tetero te aye da mouraine a peko senainie damena bi bu oru te da mekoupuku nemane nemena bi bu oru detere peko tere te da mekou apa da yewai.